Atulubọ Ẹkẹgwa

Mosis gbalu ñwu Fero kakini owñ anya dabi w’ugbo-wñ gẹ n. Ama, taki Mosis kw’ọmọ i ka ñwu Fero kakini: ‘Odu iñaliña, am’ọmọgba du ojanẹ Ijipt akwu, akw’ọmọgba Fero gbogbo w’ọmọgba am’adu wẹ akwu.’

Jihofa ka ñwu abo Israẹl ku ma hi ujẹñwu ogbogaga ka. I kakini: ‘Amẹ ki d’ọmewo abẹk ọmala ka ki ch’ọdọ ka ku mẹ d’ẹbiẹ-wñ kwuru alugbọna mẹ. Mẹ f’ẹla-wñ rọ, ku mẹ la jẹ kpai ibirẹdi ki ma n’ọjọwu n. Mẹ m’afẹ mẹ ko nyi, ku mẹ la nyi ẹda mẹ, ọla elo mẹ ki chẹ mu. Todu iñaliña eñini-i na gba mẹ tanẹ.’ Abu ẹ neju kak i dẹ ef’ẹdọ abo Israẹl iko lẹ?

Odu iñaliña, onuchẹ Ọjọ lale unyi duu ki d’ojanẹ Ijipt. Unyi duu ku ma ma d’ẹbiẹ kwuru alugbọna-wñ n, ọmọgba unyi lẹ lekwu. Akwọra unyi duu ki d’ojanẹ Ijipt oñ ẹñwu-i kẹrẹbọ, t’anana ma kp’amẹnale ma. Ama, onuchẹ lẹ lale ọgba unyi abo Israẹl duu ku ma d’ẹbiẹ kwuru alugbọna ma, ọmọgba ma duu la kwu n.

Ọmọgba Fero onugo lekwu. Tak ẹdọ Fero ñọ gba gẹ n, ẹrẹrẹ i ka ñwu Mosis kpai Erọn kakini: ‘Mẹ kwanẹ. Mẹ kw’emi alo, kp’amẹñwọrẹ mẹ. Mẹ lo ku mẹ nya rẹ Jihofa Ọjọ mẹ!’

Adiko ẹgba k’ochu afanẹ, abo Israẹl kw’ojanẹ Ijipt al’eju ọlọpu ọlọpu kpai akwọra unyi akwọra unyi ma. Abokẹlẹ Israẹl kate dabu onẹ ichamu ny’ọgwọkọ ugbo ogwumẹlu mẹfa [600,000] manyu abobulẹ kpai amọma ma wewe. Manyu gẹ, amonẹ wewe che leb’uma ku ma neke na rẹ Jihofa kp’ama. Ukpoji-wñ, Jihofa m’abo Israẹl gbatanẹ!

Todu ku ma neke na rewa alu ki Jihofa gba ma tanẹ, ma na j’ujẹñwu ogbogaga lẹ ọdọ duu. Ujẹñwu lẹ ma adọ ki Elaloji.