“Ojanẹ Ọfẹ-wẹ Ki Wa”

Jihofa gbalutanẹ kakini: ‘Akwu erọ, iwọ, ọga abẹk ukwu anya dẹ gẹ n. Na ali omiakwu duu b’uma eju tẹ. Amẹñwu ẹbiẹnẹ iko igbele chakaa, amud’ẹñwu agbenyọ.’

Jihofa d’Adam kpai If gwef uchẹ Idẹn ku ma n’urẹdọ kpai ẹdẹbọ ogbegbelẹ. I dukpẹ ku ma na rẹ Jihofa, ku ma la bi amọma k’efilẹ-i chakaa ki chẹ kọ ñwu amonẹ. Amaa, Adam kpai If kọ egb’omu Jihofa gbọ, e-lẹ muda r’amẹñwu ki Jihofa atene eche da n. Ef’ọtakada-i, a f’u li mẹ kak amẹñwu ki Jihofa gbalutanẹ lewa chẹ chakaa. E-lẹ jẹñwu wa ma jalii kak Ojanẹ-wñ ad’urẹdọ ọgbolo kpai ẹnyọ b’ilẹ-i chakaa ma dabalu ki gbalu ñwu Ebraham.

I dẹ pẹẹ, Setan kpai amonuchẹ-wñ manyu abo ẹbiẹnẹ duu anya def ilẹ-i gẹ n. Abo ku ma anya def ilẹ-i ch’abo ku ma rẹ Jihofa kate, ẹnẹ duu la ach’ọga abẹk ekwu gẹ n. Gbake-i k’a ch’ọga abẹk ekwu, ọjọ duu k’a j’olu kwanẹ ọla-wa achẹ kọ ñwu ukpahiu, ẹdọ wa la ach’ẹbọ kaki a deju. Ef’ilẹ-i chakaa arida ti Paradais, abo duu la an’ujẹñwu ku ma ajẹ kpai unyi ọmẹmẹlẹ ku ma agwu. Abo lẹ la ach’abo ku ma akwula ñwu ọla-ma, i ch’abo ẹbiẹnẹ abẹk abo ku ma añeju ech’ihianyi n. Amẹla ef’oko ach’okpo wa n, awa onugo la ach’okpo ma gẹ n.

Ẹdọ wa la abọ nyọnyọ ichẹñwu ki Jihofa chanẹ ek’abo ki kwu dajikwanẹ. A ali amonẹ ku ma kwu kw’iko ki chẹjiji nyọnyọ mẹ, dabu Ebẹl, Noa, Ebraham, Sera, Mọsis, Ẹsta kpai Defid. Ọgbọ wa chakaa ak’ọwọ dama ef er’ọgbọ ilẹ-i da ti paradais. Am’ukọlọ ọmẹmẹlẹ k’a añeju nyọnyọ oñ a nya che iko lẹ.

Jihofa atene todu k’ọgbọ wa chaka ki d’ọmọ. Iko lẹ, ẹ mi Jihofa nyọnyọ t’ọna k’ẹ m’ọ abajọ-i le. Todulẹ, k’a na mẹru Jihofa t’akwobi le ọjọ duu k’ọjọñwa, eñini at’ogbegbelẹ!