Anẹ Ego Ki Jọn Li

Ma d’Ẹnukpuchẹ Jọn t’unyi uga ef’ewo Patmọs. Ọmọ lẹ i dẹ oñ Jisọs d’anẹ ego ọlojoji mẹgwẹfa [16] ñ’ọ. Anẹ ego ki dẹ-i adu ña amẹñwu ki anya che ejọgba. Ef’anẹ ego ki dẹ-i, Ẹnukpuchẹ Jọn li ọna k’odu Jihofa anya fọ, alu k’Ojanẹ-wñ anya wa kpai ọna k’ọgbọ ilẹ-i chakaa anya dẹ alu ki Jihofa atene ki dẹ.

Ef’anẹ ego ka, Jọn li Jihofa ki gwanẹ oji ede-wñ ef’ojale, abogijo ogwu nyoke mẹlẹ [24] la gwanẹ l’ede lẹ daka. Abogijo lẹ ny’afẹ efufu, ikẹbẹ ọjamalia la d’oji ma. Ọmamanya na ada, abalẹ ekwukwu ukọla ọkpabana la na kw’ojede lẹ dufu. Am’abogijo ogwu nyoke mẹlẹ-i [24] dojikanẹ ñwu Jihofa, ma la ar’ọ. Ef’anẹ ego omunẹ, Jọn li amonẹ wewe k’ẹnẹ duu ma neke gbaluka n ku ma kw’ojanẹ duu, kpai amonẹ duu kpai ichi duu ku ma arẹ Jihofa. Jisọs ki ch’Ọmala lẹ, na dide ma, i la nẹ ma alo tugbo k’omi ki ad’iñmi ñwu onẹ dẹ. Ubilẹ, ef’anẹ ego omunẹ, Jọn li alu ki Jisọs j’onu, ki la chanẹ ech’ọda ọfẹ-wñ ef’ojale kpai abogijo ogwu nyoke mẹlẹ [24] lẹ. Ef’anẹ ego ki Jọn dabi ñọ li, Jọn li alu ki Jisọs ak’ogwu bọ Setan ki che dragọn lẹ kpai amonuchẹ-wñ. Oñ Jisọs m’uma ko rikpolo kw’efojale w’anẹ ilẹ-i.

Ubilẹ, Ọñ Jọn ñọ li Ọmala lẹ kpai amonẹ icham ny’ọgwọkọ ugbo ogwumẹlu nyọgbọ meji nyoke mẹlẹ [144,000] ku ma dago oj’Uwo Zayọn. Jọn la ñọ li onuchẹ Ọjọ ka ki awi l’ilẹ daka, onuchẹ lẹ na ka ñwu amonẹ ku ma ch’okpo Ọjọ, ku ma la d’ojima ñwu.

Ubilẹ, Jọn ñọ li anẹ ego lugbo alu ku ma aj’ogwu Amagẹdọn le. Ef’ogwu lẹ, Jisọs kpai abogwu-wñ fu Setan kpai abogwu-wñ du. Ef’anẹ ego e-otitala, Jọn li alu k’abo ki def’ojale kp’abo ki d’anẹ ilẹ achẹñwu dama t’okate. Setan kpai abo duu ku ma achẹñwu ẹbiẹnẹ duu la le w’ukpoji. Oñ abo duu ku ma def’ojale kp’abo duu ku ma d’anẹ ilẹ chakaa chanẹ erẹ Jihofa kate, ma la ajẹñwu odu-wñ ki fọ.