Una D’oji Egbe Ajo

Mosis dodo ef’ewo Midian ọdọ ọgbọ meji [40]. I n’ọya, i la n’amọma. Ọjọ ka, alu ki na dejutẹ amala-wñ amẹru uwo Sinai, i li ẹñwu awuwu ka. Una d’oji egbe ajo, ama una muda jo egbe lẹ n! Ẹgba ki Mosis le mẹru ki li ẹñwu ki chi, i gb’omu ukọla kwefu egbe lẹ kakini: ‘Mosis!: ‘Mosis! Ẹ ki tẹmẹru emi n. M’ẹda wẹ gwọ b’ẹrẹ wẹ tẹ todu k’anẹ ugbo k’ẹ dago lẹ afọ.’ Jihofa akọla lẹ lalu onuchẹ-wñ.

Ailo fi Mosis mu, abalẹ i m’ọwọ-wñ du beju ma. Omukọla lẹ la kakini: ‘Uf’ọbata abo mi Israẹl li mẹ. Na gba ma kwefu ọwọ abo Ijipti, k’u la ko ma w’ojanẹ ki nyọ. Uwẹ ana k’abo mi kw’ojanẹ Ijipti dufu.’ Ẹ kpibe kak i neke chi Mosis awuwu n?

Mosis n’ene kakini: ‘Ẹñwu n’aka ichẹnwu ku ma tu mi ene kakini ẹnẹ kp’ẹ uche?’ Ọjọ dohi ñwu kakini: ‘Ka ñwu ma kakini Jihofa, Ọjọ e-Abraham, Ọjọ e-Aijik kpai Ọjọ e-Jekọp oñ kpẹ mi w’ugbo mẹ-i.’ Ubilẹ, Mosis kakini: ‘Ichẹñwu k’amonẹ lẹ kọ neti ru mi fa?’ Jihofa m’ẹñwu ki ajẹñwu ma ma ka k’owñ kpẹ Mosis uchẹ du ñwu. I ka ñwu Mosis ki m’ọkpa ki defu ọwọ-wñ du rọ tanẹ. Ubilẹ, ọkpa lẹ mu d’ejo! Ẹgba ki Mosis gwọnyu onunu ejo lẹ, i mu rida t’ọkpa gẹ. Taki Jihofa ka ñwu kakini: ‘Ẹgba du k’ẹ me-i du ñwẹñwa, i adu tejugede ka k’omi kp’ẹ uchẹ-i.’

Ubilẹ, Mosis kakini: ‘U ch’ẹnẹ ki meju ekọla n.’ Taki Jihofa gbalutanẹ ñwu kakini: ‘Omi aka ñwẹ ẹñwu k’ẹ na ka, Omi la ñọ kpẹ ọmaye wẹ Erọn ki ch’abunẹ wẹ.’ Alu ki Mosis fu ma kaki Jihofa d’ugbo-wñ, Mosis m’ọya-wñ kpai amọma-wñ ẹnẹkẹlẹ ko dabi ti Ijipti.