Jekọp Kpai Isọ F’ọla-ma Ñọru

Jihofa gbalu ñwu Jekọp kak i adide-wñ alu ki dide Ebraham kpai Aijik. Jekọp dodo ugbo ku ma adọ Haran. Ọmọ i n’ọya, i n’akwọra unyi lile, i la ch’anana.

Otitala-wñ, Jihofa ka ñwu Jekọp kakini: ‘Mu dabi alo t’ojanẹ wẹ.’ Todulẹ, Jekọp kp’abo akwọra unyi-wñ chanẹ ulẹ edabi t’ojanẹ-wñ. Alu ki d’ejọna, abo ka lewa ka ñwu Jekọp kakini: ‘Ọmaye-wẹ Isọ awa, abokẹlẹ ọgwọkọ meji [400] la jugbo-wñ!’ Jekọp chanẹ ech’okpo kaki Isọ anya k’uja b’owñ kp’abo unyi-wñ. Jekọp ch’adua ru Jihofa kakini: ‘Agba mu mi gba kwef’ọwọ ọmaye-mi.’ Ọjọ ñwa-wñ Jekọp k’amẹñwu ele kp’uchẹ ledo Isọ, amẹñwu ele lẹ ch’amala, am’ewọ, am’okwunọ, am’inyakulumi kpai am’ọkẹkẹtẹ.

Odu ọjọ lẹ, alu ki Jekọp kate dẹ, i li onuchẹ Ọjọ ka! Onuchẹ Ọjọ lẹ kpai Jekọp chanẹ ejuja, ma la juja gbogbo gb’ọjọ ñwa odudu. Dagba ki Jekọp chẹ ch’agbe, i b’ọwọ lọ ñwu onuchẹ Ọjọ lẹ n, tak onuchẹ lẹ kakini: ‘T’umi nọ k’u lo.’ Ama Jekọp kakini: ‘U jẹ ñw’ẹ lo n chai ẹgba k’ẹ m’ẹnyọ ko ñwu mi.’

Otitala-wñ onuchẹ Ọjọ lẹ m’ẹnyọ ko ñwu Jekọp. Abajọ-i Jekọp che ma kaki Jihofa anya t’ọwọ nọ ñwu Isọ ki ch’o ẹḅiẹnẹ n.

Odudu ọjọ lẹ, Jekọp li Isọ kw’ọna jiji kpai abokẹlẹ ọgwọkọ meji [400] ugbo-wñ. Jekọp kwo t’ọgba ñw’abo akwọra unyi-wñ ledo Isọ, i la d’ojikanẹ ñwu Isọ onu mebie. Isọ ra ledo Jekọp, i la mu gba mẹdọ. Amọmaye mejeji lẹ mu kwo r’akwu, ma la f’ọlama ñọru. Abu ẹ neju kaki ẹdọ Jihofa dẹ lugbo ọna ki Jekọp che le?

Ubilẹ, Isọ mudabi t’unyi-wñ le, Jekọp onugo la le t’unyi e-wñ. Amọma ọnẹkẹlẹ ki Jekọp bi ch’ẹgweji [12]. Odu ma che Rubẹn, Simiọn, Lifai, Juda, Dan, Naftali, Gad, Ashẹr, Isakar, Zẹbiulọn, Josẹf kpai Bẹnjamin. Ẹnẹ ka ef’amọma lẹ k’odu-wñ kọ Josẹf owñ Jihofa du chekwu lefu ejadu abo-wñ. Ẹ che m’ọna ki che le? K’a tejanẹ.