Jekọp M’ẹñwu Ogwu Gba

Aijik ch’ọma ọdọ ọgbọ meji ny’oke mẹlẹ [44] ẹgba ki di Rebeka ch’ọya. I afẹdọ-wñ nyọnyọ. I dẹ pẹẹ, ma f’ọma meji nẹ. Ma ch’ogwu ọnẹkẹlẹ meji.

E-ki ch’ogijo efu ma, odu-wñ kọ Isọ. Odu e-imọtọ la kọ Jekọp. Isọ añeju ki na d’ọdọda, i ch’ẹnẹ ki meju edọdẹ am’ẹla nyọnyọ. Ama Jekọp ch’ẹnẹ ki añeju egwugwu unyi.

Iko lẹ, ichẹñwu k’ata onẹ lekwu, ọmọgba-wñ ma ad’ojile anẹ kp’ọkọ k’ata-wñ nẹ ñwu. Ẹñwu lẹ ma adọ k’ẹñwu ogwu-i. Efu akwọra unyi Aijik, amẹñwu ogwu ki Jihofa gbalutanẹ ñwu Ebraham ñọ defu amẹñwu-i gẹ. Isọ kwula ñwu ugbalutanẹ lẹ n. Ama, Jekọp che ma kaki ẹñwu ki Jihofa gbalutanẹ lẹ chẹñwu ogbogaga i che.

Ọjọ ka, Isọ w’unyi kw’oko ọdẹ edẹ, ọla-wñ la chẹ kpa nyọnyọ. I chanẹ egb’ukpo ujẹñwu ki Jekọp ọmaye-wñ ahi. Oñ i ka ñwu kakini: ‘ebi akpa mi ololo! Agba d’ujẹñwu ekpikpa lẹ ñwu mi k’u jẹ!’ Jekọp kakini: ‘Na du ñw’ẹ, ama m’ọda ọmọgba-wẹ du ta ñwu mi ejodudu ta.’ Isọ dohi kakini: ‘Ọda ọmọgba chekwu duu ñwu mi n! Ẹ neke mu du. Ujẹñwu na tene k’u jẹ-i ta.’ Ẹ neju kakini ẹñwu ki Isọ che lẹ chẹñwu ọmẹmẹlẹ i che? Ehee, i ch’ẹñwu ọmẹmẹlẹ i che n. Isọ m’ẹñwu ogbogaga du tinyọ, todu ochibu ujẹñwu ekpikpa ka.

Alu k’Aijik mu gb’ogijo nyọnyọ, iko lewa ki d’ẹnyọ ñwu ọmọgba-wñ ọnẹkẹlẹ. Ama, Rebeka ch’abunẹ Jekọp ọma-wñ ki ch’okekele Isọ ki gb’ẹnyọ kwugbo ata-wñ. Alu ki Isọ lewa f’ẹñwu-i ma, ẹdọ-wñ mu kpabiẹ nana oñ i f’ibe kpẹ alu ki ad’ọmaye-wñ Jẹkọp kpa. Aijik kpai Rebeka atene dide ọma ma Jekọp, oñ ma ka ñwu kakini: ‘Ra lo t’ugbo Leban ọmaye iye-wẹ, k’ẹ nya gwugwu ọmọ pẹẹ ta, gbẹgba k’ẹdọ ọmaye-wẹ nyi.’ Jekọp neti r’ibe k’ata kp’iye-wñ du ñwu, i la ra le t’ọmọ t’odu ọlai-wñ.