Abraham Kpai Sera Gb’omu Ọjọ Gbọ

Bebẹl ch’ewo ki ma jiji ru Ur n. Ọmo lẹ, amonẹ ad’ojikanẹ ñwu am’ọjọ wewe ki ma che Jihofa n. Ama, i n’ọnẹkẹlẹ ka ki di Ur ki che Jihofa kate i arẹ. Odu-wñ kọ Ebraham.

Jihofa ka ñwu Ebraham kakini: ‘Kw’ojanẹ-wẹ k’e la kw’ugbo am’efu-wẹ k’ẹ lo t’ojanẹ k’u na adu ña wẹ.’ Ubilẹ, Ọjọ gbalutanẹ ñwu kakini: ‘Ojanẹ wẹ anya nana, U la anya d’ẹnyọ ñwu amonẹ wewe oji anẹ ilẹ-i todu wẹ.

Ebraham m’ugbo ki Jihofa akp’ọ alo n, ama i kẹdọn’Ọjọ. Oñ Ebraham kp’ọya-wñ Sera kp’ata-wñ Tẹra manyu ọma efu-wñ Lọt gb’omu Jihofa gbọ, ma la m’anẹ ma ñọ le t’ulẹ ọnajiji lẹ.

Ebraham ch’ọdọ ọgbọ mẹta ny’oke mẹgwẹlu [75] iko k’owñ kp’abo akwọra unyi-wñ lew’ojanẹ ki Jihofa atene ku ma lo lẹ. Odu ojanẹ lẹ kọ Kenan. Ọmọ lẹ, Ọjọ kọla ñwu Ebraham. I gbalutanẹ ñwu kakini: ‘Anẹ ki l’ẹ daka k’ẹ li-i, na du ñwu amọma-wẹ.’ Ama, Ebraham kpai Sera mu d’ogijo mẹ, ma la n’ọma duu ta n. Abu Jihofa ajẹñwu ugbalutanẹ ki dẹ-i ki chẹ le?