Ọkọ Noa

I lew’iko ka, amonẹ chane ewewe ef’ilẹ-i, ojile ma la ch’abo ẹbiẹnẹ. Uchẹ am’onuchẹ Ọjọ ka ki def’ojale onugo mu d’abo ẹbiẹnẹ. Ma kw’efojale ma lew’efilẹ. Ẹ che m’ẹñwu ki chi ku ma ch’abalẹ? Todu ku ma neke k’añọla onẹ ny’ọla, ku ma la chanẹ en’ọya.

Abobulẹ lẹ la bi amọma ñwu am’onuchẹ lẹ. Amọma-ma ọnẹkẹlẹ ku ma bi lẹ mu gbakachi, ma la n’ukpahiu nyọnyọ. E-lẹ jẹñwu ma la ach’amonẹ alachi, ma ach’uma agbe kpai ma la ach’uma ẹbiẹnẹ. Jihofa neke k’eju r’ẹñwu abalẹ ki na che alo n, todulẹ i tu ki f’abo ẹbiẹnẹ lẹ kpa rinyọ ef’uwobi omi.

Ama, i che n’ọnẹkẹlẹ ka ki ch’ojoji todu i afẹdọ Jihofa, odu ọnẹkẹlẹ lẹ che Noa. I n’ọya kp’amọma ọnẹkẹlẹ mẹta. Odu-ma che Shẹm, Ham kpai Jafẹt. Ẹtẹta ma la che n’ọya. Jihofa ka ñwu Noa ki f’ọkọ lile ka kọ todu k’owñ kp’abo akwọra unyi-wñ ki j’efu-wñ ki neke gba ma tanẹ kwef uwobi lẹ. Ọkọ chẹñwu ki neke n’eju omi ki ma alo tanẹ n. Jihofa ñọ ka ñwu Noa ki k’amẹla wewe w’efu ọkọ lẹ todu ku ma neke deju.

Noa chanẹ ekọ ọkọ lẹ ẹrẹrẹ. I d’ọdọ ọgbọ meji ny’oke mẹgwa [50] kọ ọkọ lẹ. Ma kọ ọna ki Jihofa ka ñwu ma ku ma kọ gbagẹdẹ. Adiko lẹ, Noa d’ufeti ñwu amonẹ lugbo uwobi omi lẹ. Ma muda neti ru Noa n.

Otitala-wñ, iko lewa ku ma lo tefu ọkọ lẹ. Ka g’ẹñwu ki wa che anubi lẹ.