Ken N’ẹdọfulu F’ọmaye-wñ Kpa

Ubi ki Adam kpai If kwef uchẹ Idẹn, ma bi amọma wewe. Ọma-ma ọnẹkẹlẹ ejodudu che Ken, eluchẹ i la che. Ọma-ma ọnẹkẹlẹ ekeji che Ebẹl, adide ala owñ Ebẹl che.

Ọjọ ka, Ken kpai Ebẹl ch’ichẹbọ ñwu Jihofa. Ẹ m’ẹñwu ki che ichẹbọ eche? Ele ọkpu ka i che. Ẹdọ Jihofa chẹ bọ ru ichẹbọ ki Ebẹl che, ama ẹdọ-wñ bọ ru e-ki Ken che n. E-lẹ jẹñwu Ken wẹdọ nyọnyọ. Jihofa d’ufeti ñwu Ken oji ẹdọfulu-wñ todu i neke chẹñwu ẹbiẹnẹ. Ama, Ken kọ eneti r’ufeti lẹ.

Gbak’e-lẹ, Ken ka ñwu Ebẹl kakini: ‘Le b’umi k’a lo t’oko.’ Alu ki Ken kpai ọmaye-wñ Ebẹl kate d’oko, Ken kwanẹ t’Ebẹl ọla, i la m’u du kpa. Ẹñwu Jihofa ache oji-ọla ki dẹ? Jihofa d’olefi ñwu Ken lefu eno t’ọnajiji b’abo akwọra unyi-wñ tẹ. Ken neke dabi w’ugbo abo akwọra unyi-wñ gẹ n.

I che n’ẹñwu k’a neke kọchẹ kwef ọhiala-i? A neke chanẹ ew’ẹdọ nyọnyọ ichẹñwu k’ẹñwu ma l’ikpa alu k’a neju ki le n. Ichẹñwu k’a li kaki uwẹdọ abẹk ẹdọfulu chanẹ egbọgba efu wa abẹki ichẹñwu k’onẹ d’ufeti ñwu wa todu ku ma li kak ali lẹ chanẹ egbọgba nyọgba efu wa mẹ, a ki hika rida k’a we jẹñwu ẹdọfulu abẹk uwẹdọ ki gb’uwa ọgba ef’ẹñwu duu k’a che.

Ebẹl afẹdọ Jihofa, i la chẹñwu ki nyọ. Todulẹ, Jihofa arewa-wñ. Ọjọ adu dabi dajikwanẹ w’efilẹ ichẹñwu ki m’ilẹ-i rida ti paradais.