Jiri Uche Gị Na-ahụ Akụkọ Baịbụl Ị Na-agụ

Na Baịbụl, e nwere ọtụtụ akụkọ mere eme na-akụzi ihe ndị dị ezigbo mkpa. Ọ bụrụ na anyị ejiri uche anyị na-ahụ ihe ndị ahụ a kọrọ, anyị ga-aghọtakwu ihe anyị na-agụ, ya abakwuoro anyị uru. Lee ihe ụfọdụ ga-enyere gị aka iji uche gị na-ahụ akụkọ Baịbụl ị na-agụ.

• Na-agụpụta ya agụpụta. Ịgụpụta Baịbụl agụpụta ga-enyere gị aka iji uche gị na-ahụ ihe na-eme nke ọma. Ezinụlọ unu gụwa Baịbụl, unu nwere ike ikenye onye nke ọ bụla onye ọ ga na-agụ ihe o kwuru. Ọ ga-eme ka ọ dị unu ka ùnu nọ ya mgbe ihe unu na-agụ na-eme.

• Were ya na ị na-ahụ ihe na-eme. Gbalịa ka ị ghọta otú obi dị ndị a kọrọ akụkọ ha na ihe ha chere. Dị ka ihe atụ, jụọ onwe gị, sị: ‘Gịnị mere onye ahụ ji kwuo ihe o kwuru ma ọ bụ mee ihe o mere? Ọ bụrụ mụnwa, gịnị ka m gaara eche, ma ọ bụ olee otú obi gaara adị m?’

• See ihe ị na-agụ. Ise akụkọ Baịbụl ị gụrụ nwere ike inyere gị aka iji uche gị na-ahụ ihe ị na-agụ na ichetakwu ihe ị gụrụ ọ bụrụgodị na ị bụghị aka ochie n’ise ihe.