Ụmụ Mmadụ Hà Pụrụ Ime Ka Ịda Ogbenye Kwụsị?

ỌTỤTỤ nde mmadụ toro n’amaghị ihe bụ́ ịda ogbenye. Ọ dịbeghị mgbe ha buuru ọnụ laba. N’agbanyeghị nke ahụ, ọtụtụ n’ime ndị ahụ na-emetara ndị ogbenye ebere ma na-agbalịsi ike inyere ha aka.

Otú ọ dị, ịda ogbenye ka na-akpa ndị agha obodo, idei mmiri, oké ọkọchị na nsogbu ndị ọzọ tiri ihe otiti, aka ọjọọ. Ihe ndị a na-emetụta ndị ọrụ ugbo ọkọta orie n’Africa n’ụzọ jọgburu onwe ya. A manyela ụfọdụ ịhapụ ụlọ ha ma kwaga n’obodo ukwu ma ọ bụ ịga biri ná mba ọzọ dị ka ndị gbara ọsọ ndụ. Ndị ọzọ bi n’ime ime obodo na-akwaga n’obodo ukwu n’ihi na ibi ndụ ka mma dọọrọ mmasị ha.

Inwe ọnụ ọgụgụ mmadụ karịrị akarị n’obodo ukwu na-akpatakarị ịda ogbenye. Ebe a na-akọ ubi na-adị nnọọ obere ma ọ bụrụdị na e nwere enwe. Inweta ọrụ na-esikarị ike. Ọtụtụ ndị na-aghọ ndị omekome n’ihi enweghị nnọọ olileanya. Ndị bi n’obodo ukwu na-eti mkpu maka enyemaka, ma ọchịchị ụmụ mmadụ enweghị ike ịkwụsị nsogbu na-arịwanye elu nke ịda ogbenye. N’izo aka n’akụkọ Mba Ndị Dị n’Otu wepụtara na November 2003, akwụkwọ akụkọ bụ́ The Independent nke London kwuru, sị: “Ọnụ ọgụgụ mmadụ na-amụba amụba n’ụwa na-anọ agụụ.” Ọ gbakwụnyere, sị: “Gburugburu ụwa, e mere atụmatụ na narị nde mmadụ asatọ na nde iri anọ na abụọ taa adịghị eri ihe ndị na-edozi ahụ́—ọnụ ọgụgụ ahụ na-arịkwa elu, a na-enwekwu nde mmadụ ise nọ n’agụụ kwa afọ.”

Mgbe ụfọdụ, alaka ụlọ ọrụ Ndịàmà Jehova dị na South Africa na-enweta akwụkwọ ozi site n’aka ndị ogbenye. Dị ka ihe atụ, otu nwoke nke si Bloemfontein dere, sị: “Enweghị m ọrụ, ana m ezukwa ohi n’obodo a mgbe ọ bụla ohere dapụtara. Ọ bụrụ na ezughị m ohi, anyị na-anọ agụụ ruo ụbọchị ole na ole—ka m ghara ikwu banyere oké oyi ga na-atụ anyị. O nwetụghị ọrụ dịnụ. Ọtụtụ ndị na-agagharị n’okporo ụzọ na-achọ ọrụ na ihe ha ga-eri. Amaara m ndị ọzọ bụ́ ndị na-achọ nri n’ebe a na-ekpofu ahịhịa. Ụfọdụ na-egbu onwe ha. Ọtụtụ ndị dị ka m dara mbà n’obi, ha enweghịkwa olileanya. O yighị ka ọ̀ dị olileanya dịnụ. Chineke, bụ́ onye kere anyị inwe ọchịchọ iri nri na iyi uwe, ọ́ naghị ahụ nke a?”

E nwere azịza ndị na-akasi obi nye ajụjụ ndị na-enye nwoke a nsogbu n’obi. Dị ka isiokwu na-esonụ ga-egosi, azịza ndị a dị n’Okwu Chineke, bụ́ Bible.