Abamuru nke Obi Dị Jụụ

Ọ DỊWO anya sayensị ọgwụ na ahụ ike ọgbara ọhụrụ matara na iwe a na-achịkwaghị achịkwa na-enwe mmetụta na-ebibi ebibi n’ahụ mmadụ. Ihe karịrị otu narị afọ gara aga, akwụkwọ bụ́ The Journal of the American Medical Association (JAMA) kwuru, sị: “Mmadụ dara nwụọ n’oké iwe, ikekwe a na-ekwukwa na o nwere obi na-adịghị ike, bụ́ nke na-apụghị ịnagide nrụgide nke ọnọdụ uche ya tụkwasịrị ya. O yighị ka ọ dị onye na-eche na nke a bụ nanị njedebe nke ogologo usoro nke ụdị oké iwe ahụ, bụ́ ndị kpataworo adịghị ike ahụ a na-ekwu okwu ya n’onwe ha.”

Okwu ndị ahụ dị n’elu abụghị ihe ijuanya nye ndị na-amụ Okwu Chineke, bụ́ Bible. Ihe dị ka narị afọ 29 tupu JAMA ekwulite okwu banyere ihe ize ndụ nke iwe ọkụ, e nyere Eze Solomọn ike mmụọ nsọ ide: “Ndụ nke anụ ahụ ka obi a gwọrọ ọrịa ya bụ.” (Ilu 14:30) Okwu ndị a ka bụkwa eziokwu taa.

Site n’ịnọgide na-enwe omume dị jụụ, a na-eme ka anyị zere ọtụtụ nrịanrịa ndị a na-ejikọtakarị ha na nchekasị, dị ka ọbara mgbalị elu, isi ọwụwa, na nsogbu iku ume. Otú ọ dị, tinyere ahụ ike ka mma, mmekọrịta anyị na ndị ọzọ ga-erite uru ma ọ bụrụ na anyị agbalịa “haa aka iwe iwe, hapụkwa ọnụma.” (Abụ Ọma 37:8) A na-adọtakarị ndị mmadụ n’ebe Jisọs nọ n’ihi ịdị nwayọọ n’obi na nchegbu ya sitere n’obi maka ndị ọzọ. (Mak 6:31-34) N’otu aka ahụ, anyị ga-abụ isi iyi nke izu ike nye ndị ọzọ ma ọ bụrụ na anyị azụlite obi dị jụụ.—Matiu 11:28-30.