“Gabiga Ókè nke Isi Izu Okè”

“EBE agha na-amalite n’uche ndị mmadụ, ọ bụ n’uche ndị mmadụ ka anyị ga-ewu ebe siri ike nke udo.” (Nkwekọrịta nke Òtù Agụmakwụkwọ, Sayensị, na Ọdịbendị nke Òtù UN) N’iburu okwu a n’uche, na 1993 ihe karịrị 500 ndị ọkachamara gara nzukọ UN banyere ịkwasa ngwá agha tụlere òkè okpukpe na-ekere n’iwu ụdị ebe siri ike ahụ.

Jonathan Granoff, onye nọchitere anya Njikọ Ndị Ọkà Iwu Maka Nchebe Ụwa, duziri nzukọ ahụ. Ọ sịrị: “Ọ̀tụ̀tụ̀ nke ọgụ okpukpe na agbụrụ a na-alụ ugbu a gabigara ókè nke omume ndị mepere anya, ikekwe gabiga ókè nke isi izu okè.” E hotara okwu John Kenneth Galbraith n’ụzọ ziri ezi n’oge nzukọ ahụ: “E gbuwo ọtụtụ ndị n’aha okpukpe karịa ka e gbuworo ná ngụkọta nke agha nile na ọdachi nile ndị na-emere onwe ha.”

Dr. Seshagiri Rao kwuru, sị: “Ndị dibịa kwesịrị ịdị na-agwọ ọrịa, ọ bụghị ịgbasa ya. Ọdinala okpukpe dị iche iche ekwesịghị ịgbasa ịkpọasị na ajọ ịlụ ọgụ megide ibe ha. E bu n’uche ka ha bụrụ ikike nke mkpezi. Ma, ihe bụ ezie bụ na ha arụwo ọrụ ma ka na-arụkwa ọrụ dị ka ikike nke nkewasị.”

Ụfọdụ afọ gara aga, Catholic Herald nke London kwuru na a pụrụ ijide udo n’aka “ma ọ bụrụ na chọọchị nile nke taa pụrụ ikwupụta nkatọ ha katọrọ agha.” Otú ọ dị, akwụkwọ akụkọ ahụ gbakwụnyere: “Anyị maara na nke a agaghị eme ma ọlị.” Otu onye nọn Katọlik kwuru n’otu mgbe, sị: “Lee ka ụwa ga-esi dị iche ma ọ bụrụ na anyị nile eteta ụra n’otu ụtụtụ kpebisie ike ịhapụ ibuli ngwá agha ọzọ, . . . dị nnọọ ka Ndịàmà Jehova!”

[Ebe E Si Nweta Foto Dị na peeji 32]

Tom Haley/Sipa Press