Dị Ka Apple Ọlaedo

APPLE—lee ka ha na-esi adị ụtọ ma n’anya ma n’ire! Bible ji mkpụrụ osisi a na-adị ụtọ mee ihe n’ụzọ iji ihe tụnyere ihe nke na-akpali iche echiche mgbe ọ sịrị: “Mkpụrụ osisi apple ọlaedo n’ime nkata ọlaọcha ka okwu e kwuru na mgbe kwesịrị ya bụ.” (Ilu 25:11) Gịnị ka okwu a pụtara?

“Mkpụrụ osisi apple ọlaedo n’ime nkata ọlaọcha” pụrụ ịbụ ihe a pịrị apị, dị ka efere ọlaọcha a kpụrụ akpụ nke nwere mkpụrụ osisi ọlaedo n’elu ya. Ebe ọ bụ na amaokwu ndị bu nke a ụzọ n’isiakwụkwọ nke a kwuru okwu banyere ịbiakwute onye eze, amaokwu nke a pụrụ izo aka n’onyinye ndị e nyere onye ọchịchị—ihe ọlaedo nke dị n’ụdị mkpụrụ osisi apple e tinyere n’efere ọlaọcha. (Ilu 25:6, 7) Ọ bụ ihe mara mma n’anya nke ukwuu, n’ezie!

E nwere otú ụdị ịma mma ahụ n’okwu kwesịrị ekwesị, dị ùgwù, nke bịara n’ezi oge, ma è dere ya ede ma è kwuru ya n’ọnụ. Ha na-adị ụtọ, na-agba ume, na-abakwa uru n’ọtụtụ ụzọ. Ihe ndị dị n’ime Bible e ji ike Chineke dee dị ka “mkpụrụ osisi apple n’ime nkata ọlaọcha” mara mma karịsịa.

Dị ka okwu amamihe nke Eze Solomọn n’Ilu 25:11 na-egosi, ọ “chọrọ ịchọpụta okwu nile na-atọ ụtọ, na ihe e deziri edezi, bụ́ okwu nile nke eziokwu.” (Eklisiastis 12:10; Ilu 25:1) Ọtụtụ narị afọ n’ihu, onyeozi ndị Kraịst bụ́ Pọl dere, sị: “Ihe ọ bụla e deworo n’akwụkwọ nsọ bụ ihe si n’obi Chineke pụta, ọ bakwara uru.” (2 Timoti 3:16) Ee, Bible nwere ndụmọdụ, amụma, na okwu na-ese onyinyo ihe ụfọdụ, na eziokwu ndị bara uru nke na-enwupụ enwupụ ma maa mma dị otú ahụ nke na ha karịrị ọrụ nke onye ọkpụ ụzụ kasị mma nke ukwuu. Ọzọkwa, onye ọ bụla na-enweta amamihe site n’Okwu Chineke, bụ́ Bible, na-enweta ihe onwunwe dị oké ọnụ ahịa, ọ pụkwara inwe olileanya nke ndụ ebighị ebi.—Ilu 4:7-9; Jọn 17:3.