Owuwe Ihe Ubi Nkeezi Onye Na-ezisa Ozi ọma

WILLIAM R. BROWN gara Africa na mbụ n’afọ 1923. N’ịkpọrọ nwunye ya na nwa ya, ‘ọ rụrụ ọrụ onye na-ezisa ozi ọma’ na Gambia, Ghana, Liberia, Nigeria, na Sierra Leone. (2 Timoti 4:5) Mkpụrụ nke ọrụ ya mipụtara pụrụ iche nke ukwuu.

Onye a obodo ya bụ West Indies abụghị onye òtù nke otu n’ime chọọchị nile nke Krisendọm, n’ezie o tinyeghịkwa aka na ndọrọ ndọrọ ọchịchị. Kama nke ahụ, o ṅomiri Jisọs na ndị ozi ya site n’ịkpọsa aha na ọkaaka nke Jehova, na-emesi ike ịdị mkpa nke ihe mgbapụta, na ikwusa ozi ọma nke Alaeze ahụ. (Matiu 9:35; 20:28; Jọn 17:4-6) William R. Brown jiri Bible mee ihe mgbe nile, na-arụtụ aka na ya dị ka ikike ikpeazụ n’okwu nile metụtara ozizi na okwukwe. (2 Timoti 3:16) Ọ na-ekwusi nke a ike nke ukwuu nke na a maara ya dị ka Bible Brown.

Site ná ngọzi Jehova, mkpụrụ ndị Bible Brown kụrụ puru ma too. Taa, n’ala ndị ahụ ebe o butere ụzọ, ihe fọrọ nke nta ka ọ bụrụ 200,000 ndị Africa ararawo ndụ ha nye Onye Okike ha ma, n’akụkụ nke ha, na-ekwusa ozi ọma nke Alaeze ahụ gwa ndị ọzọ. (Matiu 24:14; 1 Ndị Kọrint 3:6-9) A maara ndị Kraịst a na-arụsi ọrụ ike n’ebe nile maka ime ihe n’eziokwu ha na ịbụ ndị a pụrụ ịtụkwasị obi. Ha na-enwe obi ụtọ ịbụ Ndịàmà Jehova na ndị nọ n’okpuru Kraịst, bụ́ Eze ahụ na-achị achị.

Owuwe ihe ubi dị otú ahụ bụ ihe si n’ezi izisa ozi ọma nke ndị Kraịst pụta. A na-ewekwa ihe ubi dị otú ahụ gbaa ụwa gburugburu na kọntinent ọ bụla mmadụ bi. N’ime ihe ruru 200 ala, ihe karịrị nde anọ nke ndị ikom na ndị inyom dị umeala n’obi abụwo ndị “e wetara n’ubi,” ha na-ekwupụtaghachiri ndị ọzọ okwu nke mmụọ ozi ahụ na-ezisa ozi ọma: “Tụọnụ egwu Chineke, nyekwa ya otuto; n’ihi na oge hour nke ikpe ya abịawo.” (Mkpughe 14:7) N’ikwu eziokwu, nanị ụzọ a pụrụ isi nweta olileanya n’ọgbọ anyị a nọ ná nsogbu bụ ichigharịkwuru Chineke na ido onwe anyị n’okpuru ọchịchị Alaeze ya.