Ihe Oriri—Ihe Na-akpata Nchegbu

“JEE, were ọṅụ rie nri gị,” ka Bible na-ekwu n’Eklisiastis 9:7. N’ezie, iri nri abụghị nanị na ọ dị mkpa kamakwa ọ bụ otu n’ime ihe ndị kasị enye obi ụtọ ná ndụ.

Tụlee banyere Thomas dị afọ 34. Ọ na-enwe mmasị iri anụ. Ọ na-erikwa ya kwa ụbọchị—ọ na-abụkarị ọtụtụ ugboro n’ụbọchị. Nri ụtụtụ ya na-agụnyekarị mmiri ara ehi, ọtụtụ àkwá, bred ma ọ bụ toast e tejuru bọta, na sausage ma ọ bụ anụ ezì. N’ebe ndị a na-ere nri ngwa ngwa, ọ na-ekwu ka e wetara ya cheesburger, poteto e ghere eghe, na ihe ọṅụṅụ ndị e ji mmiri ara ehi mee. Mgbe ọ gara iri nri n’ụlọ nri, ọ na-ahọrọ anụ ehi dị ka nri bụ isi. Ụlọ nri kasị amasị ya na-enye anụ ehi dị gram 680 na poteto e siri n’ovun nke e kukwasịrị cream na-agba na nti n’elu ya, otú na-amasị ya nnọọ. Keeki chocolate nke a wụkwasịrị chocolate ice cream bụ nri nhicha ọnụ kasị amasị ya.

Thomas dị sentimita 178 n’ogologo ma dị kilogram 89 n’arọ́; o ji kilogram itoolu bubiga ibu ókè, dị ka ụkpụrụ nduzi ihe oriri nke gọọmenti United States wepụtara na 1995 si dị. “Otú m ha n’ibu adịghị ewute m,” ka Thomas na-ekwu. “Ahụ ike m bụ ịgba. Akwụsịtụbeghị m ọrụ n’ime afọ 12 gara aga. Ọtụtụ mgbe, ahụ na-adị m mma, m na-enwekwa ume—e wezụga, n’ezie, mgbe m risịrị anụ ehi dị gram 680.”

Otú ọ dị, ọ̀ pụrụ ịbụ na ihe oriri Thomas na-emetụta ya n’ụzọ dị njọ, jiri nwayọọ nwayọọ na-eme ka ọ bụrụ onye ga-arịa obi nkụchi? N’akwụkwọ ya bụ́ How We Die, Dr. Sherwin Nuland na-ekwu banyere ‘àgwà ibi ndụ ndị na-egbu mmadụ’ ma na-agụnye ihe oriri ‘anụ red meat, mpekere anụ ézì buru ibu, na bọta.’

Olee otú nri ụfọdụ si eduje n’ọrịa obi n’ọnọdụ ọtụtụ ndị? Olee ihe dị n’ime ha nke na-akpata ihe ize ndụ? Tupu a tụlee ajụjụ ndị a, ka anyị lerukwuo anya n’ihe ize ndụ ahụ ike nke ibubiga ibu ókè.

[Foto dị na peeji nke 3]

Gịnị mere ihe oriri dị otú ahụ ji bụrụ ihe na-akpata nchegbu?