Pinhod Mun Inilaon nan Immannung?

IMMANNUNG panggep hi ngandiye? Panggep inadan dakol an damdamagon di tatagu. Kal-inah dinamdamag mu damdama datuwen nihaad hi baba:

• On in-nganuy ditaun Maknongan?

• On mapoppog di gubat ya ligat?

• Ngay maat i ditau nu mate tau?

• On tumagun tu nadan nate?

• Ngay aton an mundasal ota donglon Maknongan?

• Ngay aton ta waday amlong hi biag?

Danay panamakam hi sungbat datuwe? Nu mundamag a nadah sabasabalin tatagu, agge nun-iʹingoy sungbat da. Taon hi damagom inadan lider di relihyon onu nadan edukadu, hinnahinnatkon damdamay sungbat da. Mabalin an ad uwani ya kay niptok nan ibagbagan di udum, mu umey algo ya kal-inah mumbaliw.

Mu waday liblu an kawad-an di madinol an sungbat. Hituwe ya liblun adi munlangkak. Din nundasal hi Jesu-Kristo i Maknongan, kalyonay: “Nan Hapit mu ya immannung.” (Juan 17:17, NW) Ad uwani ya inila tauh nae an Hapit, hinae nan Bibliya. Ituwen pumbahaan, mainnilaam di kittay, omu makaawwatan ya immannung, an sungbat di Bibliya inadan nihaad hi ngatu.

On In-nganuy Ditaun Maknongan?

NAPE DAMAGON TAU: Wahtu tau nah luta an napnuh dakol an gagaʹiho. Dakol di relihyon hi mangitudtuddu an nalpu anun Maknongan nadan punligatan.

NGAY ITUDTUDUN DI BIBLIYA: Bokon man anhan hi Maknongan di nalpuwan di gagaʹiho. ‘Daʹyun inilanan mun-awat . . . adi munliwat [onu mangat hi gagaʹiho] hi Apu Dios’ kalyon di Job 34:10. Waday makakkaphod an panggep Maknongan hi tagu. Hiya nan intuddun Jesus an idasal tau: “Ama min wadah langit, hana ot ta . . . [umali nan Pumpatulam]. Hana ot ta hay pinhod muy maat tuh luta umat hi langit.” (Mateo 6:9, 10) Pilmiy pamhod ya pangipaptok Maknongan i ditau hiya nan ongal di insakripisyu na ota masiguradu an maat nan panggep na.​—Juan 3:16.

Tigom bo nan Genesis 1:26-28; James 1:13; oya 1 Pedro 5:6, 7.

On Mapoppog di Gubat ya Ligat?

NAPE DAMAGON TAU: Ingganad uwani ya dakol day mungkakate gapu hi gubat. Annamin di tatagu ya pinatna da an nunligat.

NGAY ITUDTUDUN DI BIBLIYA: Ibagan Maknongan han timpu an malinggop di interon luta. Nah Pumpatulana, nu munturay nan gubilnu na hi langit, “adi da mo mundadaan an makigubat.” Hay aton da ya “pandayon day ispada dat kapyaon dah aladu.” (Isaiah 2:4) Poppogon tun Maknongan di annamin an ligat ya gagaʹiho. Impasiguradun di Bibliya: “Ma-idona moy ligat, maid moy dogo, ya mahkit ya kate, adi u-umyung di tatagu ya maid moy humlun hi eda kog-an te mahannotan mon am-in nadan wada handi [nid-um nadan ligat ya gagaʹiho ad uwani].”​—Revelation 21:3, 4.

Tigom bo nan Psalms 37:10, 11; 46:9; oya Mikah 4:1-4.

Ngay Maat i Ditau nu Mate Tau?

NAPE DAMAGON TAU: Kadaklan inadan relihyon ya itudtudu da an nu matey tagu, waday humiwweh adol an muntultuluy an matagu. Nan udum ya mamati dan mabalin anun pundogohon nan nate nadan matagu hiya nan mamogwa da. Dakol da boy mamati an mapuʹpuuran nadan gagaʹiho hi impierno.

NGAY ITUDTUDUN DI BIBLIYA: Nu matey ohan tagu, maid moh yana. “Nadan nate ya maid di inila da,” kalyon di Ecclesiastes 9:5. Gapu ta nadan nate ya adi da makanomnom, adi makagibok, ya adi makapadas hi ­ngandiye man, hiya nan adi da bo mabalin an pundogohon​—onu boddangan​—nadan matagu.​—Psalms 146:3, 4.

Tigom bo nan Genesis 3:19 oya Ecclesiastes 9:6.

On Tumagun tu Nadan Nate?

NAPE DAMAGON TAU: Pinhod taun miʹtagut-tagu, oya miʹam-amlong inadan pohpohdon tau. Normal lang an iliwon taun tigon nadan nate an iiba tau.

NGAY ITUDTUDUN DI BIBLIYA: Kadaklan inadan tatagu an nate ya mamahuwan da. Impasiguradun Jesus an “nadan wahdi inadan pangnomnoman an lubukan ya donglon day hapit na ya humawwang da.” (Juan 5:28, 29, NW) Hiyah nae nan original an panggep Maknongan, nadan mamahuwan ya mabalin an miʹtagu nah paraiso an luta. (Isaiah 65:21-25) Adi na lang basta taguwon nadan makaʹun-unud an tatagu, mawadaan da pay hi perpekton adol ya munnananong an biag. Kalyon di Bibliya, “nadan ­[maphod an tatagu] ya boltanon da nan luta, ya mihaʹad dah tun munnananong.”​—Psalms 37:29, NW.

Tigom bo nan Job 14:14, 15; Lucas 7:11-17; oya Acts 24:15.

Ngay Aton an Mundasal ota Donglon Maknongan?

NAPE DAMAGON TAU: Nadan tatagu hi halus annamin an relihyon ya mundasal da. Mu hay pun-gibok di dakol ya adi masungsungbatan nadan dasal da.

NGAY ITUDTUDUN DI BIBLIYA: Din intuddun Jesus an mundasal, kalyonay adi “ipanidwa” umat inadan udum an tatagu an “andukke” di dasal da. (Mateo 6:7) Pinhod nan ibaga, adi tau ipanidwan ibagabaga nan hiya-hiyan hapit nah pundasal tau onu nadan nitudok onu nimemorya. Nu pinhod taun donglon Maknongan di dasal tau, mahapul an mundasal taun adi mikontra nah pinhod na. Ota maat tauh nae, mahapul an adalon tau nan pinhod Maknongan ya in-unnud taun diye. Kalyon di 1 Juan 5:14: ‘Am-in di ibaga taun hiya ya idat na hin miunnud nah pinhod na.’

Tigom bo nan Psalms 65:2; Juan 14:6, 14; oya 1 Juan 3:22.

Ngay Aton ta Waday Amlong hi Biag?

NAPE DAMAGON TAU: Dakol di tatagun mamati an hay pihhu, kinasikát, onu kinapintas di mangdat hi amlong. Hiya nan, hiyay eda hamakon​—mu taon hi wada mon didah diye, hinkomtang damdamay amlong da.

NGAY ITUDTUDUN DI BIBLIYA: Imbagan Jesus nan sekreton di amlong din kalyonay: “Ong-ongal di amlong nadan tatagun mangngol ya mangun-unud hi kalin Apu Dios.” (Lucas 11:28) Nan immannung an amlong ya mahamak lang nu ikaligatan taun idat nan naispirituan an kahapulan di adol tau​—nan pun-adalan hi immannung panggep i Maknongan. Hinaen immannung ya wada nah Bibliya. Nu inilaon tau nan immannung, boddangan ditaun mangimatun nah talagan importante ya ngan nan adi. Nu mumpaboddang tauh Bibliya nah pundesisyonan ya pangi-e tauh biag tau, mawadaan tauh maphod an biag.

Tigom bo nan Proverbs 3:5, 6, 13-18 oya 1 Timothy 6:9, 10.

Hituwe ya tikke lang an sungbat di Bibliya nadah onom an damdamagon di dakol an tagu. Pinhod mun inilaon di dakol pay? Nu oha a inadan munhamhamak hi immannung, siguradun pinhod mun adalon pay di udum. Kal-inah pinhod mun inilaon pay di sungbat datuwe: ‘Nu ipaptok ditaun Maknongan, nape ta dakol di ligat ya gagaʹiho? Ngay aton ta pumpumhod di biag di pamilya?’ Mangdat di Bibliya hi makapnek an sungbat i datuwen damdamagon tau, oya nadan dakol pay an pinhod taun mainnilaan.

O mu, dakol day adi mumbaha hi Bibliya. Kalyon day makaʹuktul anu an liblu ya naligat an maawatan. On pinhod mun boddangan daan manigo nah sungbat way Bibliya? Waday duwa an idat nadan Saksin Jehovah an bumoddang i heʹa.

Nan oha ya nan broshur an Maphod an Mipainnila an Nalpun Maknongan!, nakapya ota bumoddang nah tatagu an manginnila hi sungbat di Bibliya inadan importanten damdamagon da. Nan mikadwa ya nan liblin programan di pun-adalan hi Bibliya. Waday umalin iiba yun Saksin Jehovah an kwalipikadun bumoddang i daʹyu an mun-adal hi Bibliya nah pinhod yun oras ya lugar hi uray kittay an timpu. Milyon-milyon an tatagu hi interon luta di naboddangan ituwen programa. Dakol i diday mun-am-amlong an nangibaga: “Hinamak u mo nan immannung!”

Hituwey kaphodan an mabalin an em hamakon, maid moy udum. Nan immannung an maadal tauh Bibliya di mangibuka i ditau inadan ugali an kontrah Hapit Maknongan, linalangkak an tudtudu, ya nadan ngandiye man an tumakutan. Kalyon Jesus: “Inilaon yuy makulug [onu immannung] . . . ya mapoppog di nihbutan yu.”​—Juan 8:32.