I Kebalinan na Bawtismo Anna i Importansia Natun

1. Ngatta importante nga tuddu na Biblia i bawtismo?

MAGAYAYYA ittam nu egga i bagu nga nabawtisowan! Nagayayya gapa i Cristiano ira turi ta aru nga tolay i nabawtisowan ta Pentecostes 33 C.E. Tatun nga tiempo, nipalappa ni apostol Pedro nu ngatta importante i bawtismo. (King. 2:38, 40, 41) Nitura gapa ni apostol Pablo nga nelavu “i tuddu meyannung ta bawtiso” ta “ollu ira nga magigiammu meyannung kani Cristo.” (Heb. 6:1, 2) Maski nu tadday ta pamegafuanan nga tuddu i bawtismo, mawag nga mantindiattam yatun tu mapia. Ngatta?

2. Ngatta mawag nga malippawa tam i bawtismo?

² Nu masikan i fundasion, maladda i balay. Makoffun gapa i pakalippawa ta bawtismo tapenu mapeggan ittam tu maladda nga pangurug. Maski nu ari ittam paga bawtisadu onu nabayag ittam ngana nga bawtisadu, mawag lagapa nga malippawa tam nu ngatta importante i bawtismo. Taw nga artikulo, tabbagattam yaw ira nga pakkiavu: Anni i kebalinan na bawtismo? Anni i makua ta bawtismo? Ngatta mawag nga mabawtisowan ittam ta ngagan na Yama, na Ana, anna na masanto nga espiritu?

I KEBALINAN NA BAWTISMO

3. Anni i ipasingan na bawtismo?

³ Ipasingan na pappabawtisom nga inalawa mu ngana i kinakurug meyannung kani Jehova nga Dios, anna kani Jesu-Cristo. Nabbabawyammu ngana gapa i liwa mu ira anna inulim i pattolem tapenu passerbian si Jehova. Mangurug ka gapa nga inusa na Dios si Jesus tapenu mapaliag ka anna nitabbam ta Dios gukaban na pakimallo nga kuammu ngana i uray na kavvulu i totolay ta organisasion na. Nu nitabbam yatun onu naddedika ka ngana anna nappabawtiso, mattolay ka ngana para kani Jehova anna iddanamammu nga kuan yatun tu mannanayun.

4. Anni i kebalinan na pangilammag ta danum? (Innan gapa i letratu.)

⁴ Nu mabawtisowakka, melammag anna melawakka ta danum,a kagitta na natay ka ngana tapus napaginnolay. (Ikumpara i Colosas 2:12.) Ipasingan na bawtismom i dakal nga panguli nga kingnguam ta pattolem. Ngatta? Nu melammag ka ta danum, kagitta na natay ka ngana onu niyemmammu i dati nga pattolem. Nu melawakka gapa ta danum, kagitta na bagu ngana yatun nga pattolem anna pinaka-importante ngana nikaw i pangngua ta uray na Dios.

5. Anni i napparehuan na kuammu tapenu mabawtisowakka ta pamataddag ni Noe ta arka? (1 Pedro 3:18-21)

⁵ Bibbigan i 1 Pedro 3:18-21. Egga i napparehuan na kuammu tapenu mabawtisowakka ta pamataddag ni Noe ta arka. Nu mamegafu ka pagalaman nga maggigiammu meyannung kani Jehova, kagitta na kekkaru i mawag nga kuammu, awayya na tu matageno mu nga kezziga yatun kagitta na pinamadday ni Noe ta dakal nga arka. Mawag kari nga kuammu ngamin yatun? Wan. Makasta nu parigammu si Noe. Kinagi mismu ni Jehova nu kunnasi i eksakto nga pamataddag ni Noe ta arka, anna mawag nga tuttulan na tu mapia yatun ira nga instruksion ni Jehova tapenu mapaliag ira ta Delubio. Megafu ta pangurug ni Noe, siminuttul yayya anna ta uffun na Dios, nepataddag na i arka. Kagitta ni Noe, mawayyam gapa nga makua i “ngamin nga nidob na Dios.”—Gen. 6:22.

6. Anni i kayà kagian ni Pedro turi ta kinagi na nga i bawtismo i mamaliag nikaw?

⁶ Ta 1 Pedro 3:21, nitura ni apostol Pedro nga i bawtismo i ‘mamaliag nikaw.’ Ngem siempre, arianna kayà kagian nga nu melammag ka ta danum mepaliag ka ngana onu mapakoma ngana i liwi-liwa mu. Mapakoma laman garay i liwa tam gukaban na daga ni Jesus. (1 Juan 1:7) Ngem importante i bawtismo megafu ta nidob yatun mismu ni Jehova. Nu mabawtisowan ittam gapa, ikiddaw tam ta Dios nga iddan na ittam tu marenu nga konsensia. Kunnasi nga iyawa yatun ni Jehova nittam? Pakoman na i liwi-liwa tam. I bawtismo gafu i ‘mamaliag nittam’ anna megafu tatun, mawayya tam gapa i mattolay tu mannanayun.

I MAKUA TA BAWTISMO

7. Kunnasi makua i bawtismo?

⁷ Fuera ta pangilammag ta danum, awan ngana tu kagian na Biblia nu kunnasi makua i bawtismo. Ngem uffunan ittam na Katurakan nga mammuan i mepangngo nga makua ta bawtismo. Angngarigan na, uffunan na prinsipio ira ta Biblia i kandidato ta bawtismo nu anni i mepangngo nga assinnun anna uffunan na gapa i maggiraw ira nga mammuan nu kunnasi merespeto i unnug ta bawtismo. (1 Cor. 14:40; 1 Tim. 2:9) Maruddu nga elder i mamawtiso yari tu lillitattam nakuan nga dayawan ira. (1 Cor. 1:14, 15) Ari gapa importante i karu na maggiraw ta bawtismo.—King. 8:36.

8. Anni i dua nga pakkiavu nga mawag nga tabbagan na kandidato ira na bawtismo, anna ngatta? (Kingngua 2:38-42) (Innan gapa i letratu.)

⁸ Ipasingan na Biblia nga mawag nga ‘ilammuyag tam i angngurug tam tapenu mapaliag ittam.’ (Roma 10:9, 10; innan i study note nga “hayagan mong sinasabi.”) Makua tam yatun nu mallayyagayya ittam mas ngana nu mappabawtiso ittam! Tapenu melammuyag na kandidato ira i pangurug da, egga i dua nga pakkiavu nga mawag nga tabbagadda. I ollu, “Nabbabawyammu kari ngana i liwi-liwa mu, nededikam i baggim kani Jehova, anna inalawa i pamaliag na gukaban ni Jesu-Cristo?” Iperaddam naw nga pakkiavu i kingngua ngana na kandidato tapenu mabawtisowan yayya. Kunnatun gapa i kinagi ni Pedro turi ta Pentecostes. I mekadua, “Malippawa mu kari nga i bawtismom i mangiyammammu nga tadday ka ngana nga Saksi ni Jehova anna parte ka ngana na organisasion ni Jehova?” Iperaddam gapa naw nga pakkiavu nu anni paga i mawag nga kuan na kandidato: Ipromesa na nga tuttulan na i direksion na organisasion ni Jehova anna passerbian si Jehova kavulu i wawwaragi ira. Kunnatun gapa i kingngua na Cristiano ira turi ta Pentecostes kabalidda nabawtisowan. (Bibbigan i Kingngua 2:38-42.) Nu wan i tabbag na kandidato ira tatun nga dua nga pakkiavu, ipasingan na yatun nga awayya da ngana i mabawtisowan.

9. Anni i mawag nga kuattam tapenu mapeggan ittam tu makasta nga relasion ta Dios?

⁹ Nige mu paga nga nagigiammu i kinakurug, awayya na nga makasta ngana i kukukuammu anna ari ka paga vuluvuga nga nakangngua tu madammo ira nga liwa. Awayya na nga inuffunan naka gapa na Saksi nga magana mu tapenu iddukan si Jehova. Nu kunnatun, mawag mu paga kari i mabbabawi anna mappabawtiso tapenu mapeggakka tu makasta nga relasion ta Dios? Wan. Minakkaliwa ittam ngamin anna megafu tatun, ariattam mawayya nga mapeggan tu makasta nga relasion ta Dios. (Sal. 51:5) Durante ta umaru i pakannammu tam kani Jehova, piliattam nga kuan i uray na anne ta kayà tam. Mabbabawi ittam gapa ta liwi-liwa tam anna iyemmattam i mamallussaw ta Dios tapus mattolay ittam ngana segun ta kayà na. Nu kuattam yatun ira, awayya tam ngana i mappabawtiso.—King. 3:19.

10. Ngatta mawag nga mappabawtiso i tadday maski nu nabawtisowan ngana yayya ta dati nga relihion na?

¹⁰ Nu nabawtisowakka ngana ta dati nga relihiommu, mawag kari lagapa nga mappabawtiso ka bilang tadday ta Saksi ira ni Jehova? Wan. Ngatta? Megafu ta ariammu paga nga nalippawa i kinakurug meyannung kani Jehova nga Dios anna kani Jesus. Maski gapa nu naddedika ka ta Dios gukaban na pakimallo, ariammu paga ammu tatun nga tiempo i fustu meyannung ta uray na Dios. Turi ta nakilala ni apostol Pablo i lallaki ta Efeso nga nabawtisowan ngana ngem ariadda paga ammu i kinakurug meyannung kani Jesus, kinagi na nga mawag nga mappabawtiso ira uli.b (King. 19:1-5) Nu bawtisadu gafu i tadday ta dati nga relihion na, mawag lagapa nga mappabawtiso yayya uli nu nagigiammu na i kinakurug meyannung ta uray na Dios.

MABAWTISOWAN “TA NGAGAN NA YAMA, NA ANA, ANNA ESPIRITU SANTO”

11. Anni i kebalinan na mabawtisowan “ta ngagan na Yama, na Ana, anna Espiritu Santo”? (Mateo 28:18-20)

¹¹ Nibilin ni Jesus ta bagu ira nga disipulo na nga mawag tu mabawtisowan ira “ta ngagan na Yama, na Ana, anna Espiritu Santo.” (Bibbigan i Mateo 28:18-20.) Anni i kayà kagian ni Jesus? Ta Biblia, tumukoy i uvovug nga “ngagan” ta reputasion na tadday. Tumukoy gapa yatun ta posision anna autoridad na tadday. Yari ta nu nabawtisowan ittam ngana ta ngagan ni Jehova anna ni Jesus, kayà kagian natun nga ammu tam ngana nga egga i kepangngattan anna autoridad da nga ikagi nu anni i mawag nga kuattam. Nu nabawtisowan ittam gapa ta ngagan na masanto nga espiritu, kebalinan natun nga tuttulattam ngana i pangigiya natun. Ammuattam nu kunnasi tam makua yatun.

12. Anni i kebalinan na mabawtisowan ittam ta ngagan na Yama? (Nepakannammu 4:11) (Innan gapa i letratu.)

¹² Mabawtisowan ittam ta ngagan na Yama. Kebalinan natun nga kumbinsidu ittam nga si Jehova i Yama tam ta langi nga nangiyawa tu inango ta nittam. Yayya gapa i makapangngua-sa-ngamin nga Dios anna i Namaratu ta ngamin nga ganna-gannug. (Bibbigan i Nepakannammu 4:11.) Kumbinsidu ittam gapa nga ginnan na i pakimallo tam ira anna usattam i ngagan na nu makimallo ittam anna nu ituddu tam i meyannung nisa ta tanakuan. (Sal. 65:2) Ngem ari laman tu yatun i mawag nga kurugattam nu mabawtisowan ittam ta ngagan na Yama. Ta Pentecostes, ammu ngana na magginna ira kani Pedro i meyannung kani Jehova, ngem mawag da nga kurugan nga si Jehova i mangiyawa ta mannanayun nga inango gukaban ni Jesu-Cristo.—Roma 5:8.

13. Anni i kebalinan na mabawtisowan ittam ta ngagan na Ana? (Innan gapa i letratu.)

¹³ Mabawtisowan ittam ta ngagan na Ana. Kebalinan natun nga kumbinsidu ittam nga si Jesus i tattadday nga Ana na Dios. Si Jesus “i dalan.” Mapeggan ittam laman garay tu makasta nga relasion kani Jehova megafu ta nisa. (Juan 14:6) Yayya gapa i nanavvu nittam. Natay yayya tapenu mapeggan ittam tu mannanayun nga inango. Megafu tatun, kakayà tam nga tuttulan yayya kada aggaw ari laman tu ta aggaw na bawtismo tam. (1 Juan 2:6) Matalikarag ittam nga mallayyagayya anna ariattam ipamavulu i maski anni nga mamagimmang nittam ta pagangngua tatun. (Luc. 4:43) Sigga-paran ittam gapa nga attamman i pameppersigi megafu ta matalo nga passerbiattam i Dios. (2 Tim. 3:12) Irespeto tam gapa si Jesus bilang ulu na kongregasion, yari tu tumuttul ittam ta nangitalakkan na nga mangirollu anna manangngal nittam.—Efe. 4:8, 11, 12; 5:23.

14. (a) Anni i kebalinan na mabawtisowan ittam ta ngagan na masanto nga espiritu? (Innan gapa i letratu.) (b) Anni paga i karuan nga bawtismo para ta nazelugan ira? (Innan i kahon nga “Karuan Paga nga Bawtismo Para ta Nazelugan Ira.”)

¹⁴ Mabawtisowan ittam ta ngagan na masanto nga espiritu. Inalawa tam i kinakurug meyannung ta masanto nga espiritu. Aktibo yatun nga fuersa na Dios, ari tu persona onu parte na Trinidad. Ammu tam nga inusa ni Jehova i masanto nga espiritu na tapenu igiya i profeta ira anna i nattura ira ta Biblia. Yatutta kanayuttam nakuan nga bibbigan i Biblia anna tuttulattam i tuddu na ira. (2 Ped. 1:20, 21) Lillitattam gapa i mangngua tu madammo ira nga liwa tapenu tulu-tuloy i pangiyawa na Dios ta masanto nga espiritu na ta nittam anna ta kongregasion.—Efe. 4:30.

15. Anni i ikagumattam nga kuan?

¹⁵ Nu nabawtisowakka ngana, ikagumammu nakuan nga alippawatan i “tuddu meyannung ta bawtiso”c anna tuttulammu i nipromesam kani Jehova turi ta naddedika ka anna nappabawtiso. Ngem kunnasi nu ari ka paga bawtisadu? Egga kari i mangifugag nikaw? Ta tumunug nga artikulo, gigiammuattam nu anni i kuammu tapenu mabawtisowakka.