Omukambo omunanḓengu omundu auhe mbu ma yenene okutoora okuriyandja omuini ku Jehova kutja ma rire orupa rweṱunḓu re. Omena raye Jehova tje vanga kutja omundu auhe ma toore omukambo mbwo? Eye u vanga kutja ve kare noupanga wopopezu ku na ye, nu ve yorokere ehupo nga aruhe. (Deut. 30:​19, 20; Gal. 6:​7, 8) Jehova ka ṋiṋikiza omundu okumukarera. Eye u yandjera omundu kourike we okutoorora kutja me mu karere poo indee. Hapo ovanene vombongo mave tjiti vi indu omundu ngwa papitisiwa tja tjiti ouvi ounene? Indu eye tje hi nokuritanaura ma sokuisamewa mombongo. (1 Kor. 5:13) Nandarire kutja omundu ngo wa isamewa mombongo, Jehova tjiri u vanga kutja omundu ngo me ritanaure nu ma kare noupanga ouwa ku na ye rukwao. Epu enanḓengu orondi rokutja Jehova wa yandja otjisuta tjonguturiro, kokutja ma isire imba mbe ritanaura komauvi wawo. Jehova oMukuru worusuvero, nu u vanga kutja imba mba tjiti ouvi ounene ve ritanaure komauvi wawo.—Sak. 1:3; Rom. 2:4; Jak. 4:8. w24.08 14 ¶1-2

Oruveze omuapostele Johanes ndwa tjanga orutuu rwe orutjatatu, ovandu tjiva aave hongo ovizeze nokutjita kutja pe kare ohaṋi mombongo. Posi yokutja, varwe va kayenda komurungu ‘mongarero youatjiri.’ Owo va ri ‘nonḓuviro komatwako waNdjambi.’ (2 Joh. 4, 6) Ovakriste ovaṱakame mba, va yorokisa Johanes na Jehova tjinene. (Omiano 27:11) Matu rihongo tjike? Indu tji twa kara nouṱakame ku Jehova, matu kara nondjoroka nu matu tjiti kutja varwe ve kare nondjoroka wina. (1 Joh. 5:3) Otjotjihorera, tu kara nondjoroka mena rokutja tu tjiwa kutja tu yorokisa Jehova. Jehova u kara nondjoroka indu tji matu nakaura oviṋa ovivi nokukara nonḓuviro ku ye. Ovaengeli meyuru wina ve kara nondjoroka. (Luk. 15:10) Eṱe wina tu kara nondjoroka indu tji matu munu ovakambure ovakwetu amave kayenda komurungu okurira ovaṱakame. (2 Tes. 1:4) Nu indu ouye wa Satan tji wa nyonwa, eṱe matu kara nondjoroka mena rokutja twa panḓera pouṱakame wetu ku Jehova. w24.11 12 ¶17-18

Hapo mo sokukonḓonona omundu orure ndu ṱa pi ngunda au hi ye mu raera kutja u nonḓero mu ye? Indu tji wa hakahana okuhungira ku nomundu, eye mape ya a munu kutja u hakahana okutoora omukambo ngunda au hi ye ripurira ko nawa. (Omiano 29:20) Nungwari omundu tja munu kutja ove u nonḓero mu ye, nu o toora orure okumuraera, eye ma munu kutja u keyakeya tjinene ngunda au hi ya toora omukambo. (Omuzuv. 11:4) Zemburuka kutja, ngunda au hi ye mu raera, ko nokuhepa okutya kutja mo kupu poo mokupwa i yomundu ngo. Posi yokutja, ove mo sokutjiwa kutja wa yenene okukupa poo okukupwa, nu omundu ngo mape ya ongwe ku pwire. Hapo mo sokutjita vi indu tji wa munu kutja omundu u nonḓero move? Indu tji u hi nonḓero okumutjiwa nawa, kondja okumuraisira movitjitwa vyoye. Kamaa rire nawa okutjita kutja omundu me ripure kutja ove u nonḓero mu ye, ngunda au hi nonḓero yokuuta oupanga womorusuvero ku na ye.—Ef. 4:25. w24.05 22-23 ¶9-10