Omaheero nounanḓengu wombapitisimo

1. Matu tjiwa vi kutja ombapitisimo omahongero wOmbeibela omananḓengu tjinene?

EṰE tu kara nondjoroka tjinene indu tji pe novandu mbu mave papitisiwa. Ovakriste ovatenga va ri nondjoroka tjingeyo indu tjaave munu ovandu ovengi amave papitisiwa meyuva ra Pentekoste 33 O.Z. Pomaworonganeno ngo, Petrus wa yandja ehungi nda kahurura kutja ounanḓengu tjinene okupapitisiwa. (Oviung. 2:​38, 40, 41) Kombunda, omuapostele Paulus wa tjanga kutja “ovirihongwa ovitenga vyokuzuvarisa Kristus” vi kamburira mo ‘omahongero omihingo vyombapitisimo.’ (Hebr. 6:​1, 2) Ku nao, ombapitisimo i tjimwe tjomahongero omananḓengu wOmbeibela ngu tu rihonga, nu matu hepa okuizuva nawa. Omena raye?

2. Omena raye tje ri ounanḓengu okuzuva nawa omahongero wOmbeibela ohunga nombapitisimo?

² Tjimuna omazikameno omawa wondjuwo tji ye vatera kutja ondjuwo ai ha u, omazuviro omawa ohunga nombapitisimo maye yenene okutuvatera kutja tu kare nongamburiro yomasa. Eṱe matu hepa okuzuva otjiṋa hi nawa, kutja tu nondando yokupapitisiwa poo twa papitisiwa oure wozombura ozengi. Ku nao, morupa ndwi matu kazira omapuriro nga: Hapo ombapitisimo i heya tjike? Hapo pombapitisimo pe tjitwa tjike? Nu omena ra ye tji tu papitisiwa mena ra Tate, nOmuna, nombepo ondjapuke?

HAPO OMBAPITISIMO I HEYA TJIKE?

3. Hapo ombapitisimo i raisa ye ku varwe?

³ Indu tji wa papitisiwa u raisira varwe kutja wa yakura ouatjiri ohunga na Jehova Mukuru na Jesus Kristus. Wina u raisa kutja we ritanaura komauvi woye nokurundurura ehupo roye kutja u karere Jehova. Nu u yakura kutja Mukuru u ungurisa Jesus okutuyama nu u raera Mukuru mongumbiro kutja u nonḓero yokutjita ombango ye okupitira motjira tje. Indu tji wa tjiti omakwizikiro poo omeriyandjerero ngo nopapitisiwa, ove u uta ehupo ndi mari ku twara komuinyo waaruhe.

4. Hapo okupundisiwa kehi yomeva nokupitisiwa ku raisa tjike? (Wina tara kotjiperendero.)

⁴ Indu tji mo papitisiwa u pundisiwa auhe kehi yomeva okuzambo o pitisiwa,a tjimuna omundu ngwa pakwa okuzambo a pendurwa. (Sasaneka nOvakolose 2:12.) Omena raye omasasanekero ngo tji ye ri omawa? Indu tji mo pundisiwa kehi yomeva, ove u raisa kutja wa isa okuhupa omuano mbwoo hupu rukuru. Indu tji mo pitisiwa kehi yomeva, u raisa kutja wa utu ehupo epe rokutjita ombango ya Mukuru.

5. Omomuano uṋe omerirongerisiro kombapitisimo mu ye sasanekwa kotjiungura tja Noa tjokutunga otjitendeze? (1 Petrus 3:​18-21)

⁵ Lesa 1 Petrus 3:​18-21. Eṱe matu yenene okusasaneka otjiungura tjokurirongerisa kombapitisimo ku notjiungura tja Noa tjokutunga otjitendeze. Indu tji mo utu okurihonga ohunga na Jehova, mape ya omikambo mbi mo sokutoora kutja u papitisiwe avi munika tjimuna omizeu tjinene tji mo sasaneke ku notjiungura otjizeu Noa tja ri na tjo indu tja tunga otjitendeze. Hapo ove mo hepa okutoora omikambo avihe mbyo? Ii. Omena raye tji matu tja nao? Tara kotjihorera tja Noa. Mukuru wa raera Noa omuano mu ma sokutunga otjitendeze, nu Noa aa sokukongorera omuano auhe mbu ma raerwa kutja ma yamwe komupupo. Mena rombatero nongamburiro nonḓuviro ye ku Jehova, eye wa yenena okutunga otjitendeze. Tjimuna Noa, ove mo yenene okuungura ‘atjihe tji wa raerwa i Muhona.’—Gen. 6:22.

6. Petrus aa hee tjike indu tja tja ombapitisimo ‘mai ku yama’?

⁶ Mezeva 21, omuapostele Petrus wa tjanga kutja ombapitisimo “mai mu yama.” Posi ya i hi katji nokuheya kutja okupapitisiwa ootjiṋa atjiyerike tji mo sokutjita kutja u isirwe komauvi woye. Ombunguhiro ya Jesus aiyerike ondji mai yenene okutjita kutja omauvi woye ye isirwe. (1 Joh. 1:7) Nandarire nao, okupapitisiwa otjiṋa otjinanḓengu tjinene mena rokutja Jehova we tu rakiza kutja tu tjite nao. Nu tji twa papitisiwa, eṱe tu mu ningira kutja me tu pe ‘omeritjiviro omawa womomutima.’ Jehova ma kara nondjoroka okuisira omauvi wetu mena rombunguhiro ya Jesus. Momuano mbwo, ombapitisimo ‘mai ku yama’ poo mai tjiti kutja u kamune omuinyo waaruhe.

HAPO POMBAPITISIMO PE TJITWA TJIKE?

7. Hapo ombapitisimo i sokukayendisiwa vi?

⁷ Ombeibela kai tu raere ovingi ohunga nokupapitisiwa, pendje nokutja omundu tji ma papitisiwa u sokuhitisiwa auhe kehi yomeva. Posi yokutja, Omatjangwa ye tu vatera okutjiwa imbi mbi ri ovisemba okutjita. Otjotjihorera, omirari vyOmbeibela vi vatera imba mbu mave papitisiwa okutjiwa omuano mbu mave sokurihwikika, nu wina vi vatera imba mbu mave tarere okutjiwa omuano mbu mave sokuritjinda. (1 Kor. 14:40; 1 Tim. 2:9) Potuingi omunene wombongo ongu papitisa, posi ya eṱe katu yandja ondjozikiro yapeke ku ye. (1 Kor. 1:​14, 15) Wina otjivarero tjovandu mbe ri pombapitisimo kutja otjingi poo otjiṱiṱi katji varwa otjotjiṋa otjinanḓengu.—Oviung. 8:36.

8. Omapuriro yeṋe imba mbu mave papitisiwa ngu ve purwa, nu omena raye? (Oviungura 2:​38-42) (Wina tara kotjiperendero.)

⁸ Ombeibela i raisa kutja eṱe matu ‘sokuhongonona notjinyo tjetu’ kutja tu yamwe. Imbwo oomuano mu matu raisa ongamburiro yetu. (Rom. 10:​9, 10) Eṱe tu tjita nao, indu tji matu papitisiwa. Imbwo ombu ri omukambo omusemba okutoora kutja tu yamwe. Mena repu ndo, imba mbu mave papitisiwa ve purwa omapuriro yevari. Epuriro etenga, “Okuzikamena kombunguhiro ya Jesus Kristus, ove we ritanaura komauvi woye nu we riyandja omuini ku Jehova okutjita ombango ye?” Epuriro ndi ri yandja ombango komuano omundu me rirongerisa, nu riri tjimuna erakiza Petrus nda yandja kovandu meyuva ra Pentekoste. Epuriro oritjavari, “Ove mo tjiwa kutja omeriyandjerero woye nombapitisimo mavi ku tjiukisa otja umwe wOvahongonone va Jehova pamwe notjira tje tji tji hongorerwa i ombepo ondjapuke?” Epuriro ndi ri tu zemburukisa kutja matu hepa okuhupa otja komeriyandjerero wetu kutja tu kongorere omuhunga mbu matu pewa i Jehova okupitira motjira tje nokumukarera pamwe novakambure ovakwetu, tjimuna Ovakriste veserewondo etenga. (Lesa Oviungura 2:​38-42.) Imba mbe zira kutja ii komapuriro ayevari ngo, ve yenena okupapitisiwa.

9. Omikambo viṋe omundu auhe mbi ma sokutoora kutja ma tjate ku Jehova?

⁹ Nandarire ngunda au hi ya uta okurihonga ouatjiri, ove mape ya oo hupu ehupo ewa nu ko na pu wa tjita ouvi ounene. Poo mape ya ovanene voye ve ku kurisira mouatjiri, nu ve ku vatera okusuvera Jehova. Indu tji pe ri nao, hapo mo hepa okuritanaura nokupapitisiwa kutja u tjate ku Mukuru? Ii. Eṱe atuhe twa kwatwa nouvi nu mena ra nao katu yenene okurira omapanga wa Mukuru. (Eps. 51:5) Posi ya, indu tji twe rihongo ovingi ohunga na Jehova tu toorora okutjita imbi mbi ma vanga nungwari kavyo mbi mbi matu vanga. Indu tji twa tjiti nao, tu yenena okuritanaura natu utu okuhupa ehupo ndi tjata ku Tate wetu womeyuru. Nu okuzambo tu yenena okupapitisiwa.—Oviung. 3:19.

10. Ovikwaye mbi mo sokutjita indu tji wa papitisiwa otjokaṋepo kongamburiro yarwe?

¹⁰ Indu tji wa papitisiwa otjokaṋepo kongamburiro yarwe, ove ngunda mo hepa okupapitisiwa otja umwe wOvahongonone va Jehova. Omena ra ye? Mena rokutja ove koo zuu nawa ouatjiri ohunga na Jehova Mukuru na Jesus. Nu nandarire kutja ove we riyandja omuini ku Mukuru mongumbiro, omakwizikiro woye kaye zikamenene ku imbi Mukuru mbye vanga. Indu omuapostele Paulus tja hakaena novarumendu moEfesus mba papitisirwe nokuhinokutjiwa nawa omahongero wa Kristus, eye wa tjita kutja ve papitisiwe rukwao.b (Oviung. 19:​1-5) Ndino, Jehova wina u yakura ombapitisimo yomundu indu omundu ngo tji ma zuu nawa imbi Jehova mbi me mu hongo na mbi ma undjire ko ku ye.

“MENA RATATE NOMUNA NOMBEPO ONDJAPUKE”

11. Okupapitisiwa “mena raTate nOmuna nOmbepo Ondjapuke” ku heya tjike? (Mateus 28:​18-20)

¹¹ Jesus wa rakiza kutja ovahongewa ovape ve papitisiwe “mena raTate nOmuna nOmbepo Ondjapuke.” (Lesa Mateus 28:​18-20.) Hapo eye aa hee tjike? MOmbeibela embo ndi ‘ena’ potuingi ri hungirira kongaro yomundu. Oro wina mape ya ari hungirire komerizirira poo kouvara omundu mbwe na wo. Indu tji twa papitisiwa mena ra Jehova na Jesus ku heya kutja owo ve nousemba nomasa okuturaera imbi mbi matu sokutjita. Nu indu tji twa papitisiwa mena rombepo ondjapuke, ku heya kutja matu hongorerwa po i yombepo ndjo. (Sasaneka na Mateus 10:41) Ngatu katare kutja omomuano uṋe mu matu yenene okutjita nao.

12. Omomuano uṋe mu tu papitisiwa mena ra Tate? (Omavandururiro 4:11) (Wina tara .)

¹² Mena ra Tate. I hi matji hee kutja tu kambura kutja Jehova oTate wetu ngu ri momayuru poo ngwe tu pa omuinyo. Nu tu kambura kutja oMukuru omunamasaayehe, Omuute woviṋa avihe. (Lesa Omavandururiro 4:11.) Eṱe tu tjiwa kutja eye u Zuvira ozongumbiro zetu, nu tu ungurisa ena re indu tji matu kumbu na tji matu raere varwe ohunga na ye. (Eps. 65:2) Posi ya, pe notjiṋa tjarwe tji matu hepa okutjiwa indu tji matu papitisiwa mena ra Tate. Imba mbaave puratene ku Petrus meyuva ra Pentekoste aave tjiwa ohunga na Jehova, posi ya aave hepa okuzuva nawa kutja Jehova ongu yandja omuinyo waaruhe okupitira mu Jesus Kristus erike.—Rom. 5:8.

13. Omomuano uṋe mu tu papitisiwa mena rOmuna? (Wina tara .)

¹³ Mena rOmuna. I hi matji hee kutja eṱe tu kambura kutja Jesus Omuna wa Mukuru. Jesus ongu ri “ondjira,” pu mape hee kutja eye erike ongu tjita kutja tu kare noupanga ouwa ku na Jehova. (Joh. 14:6) Eṱe tu kambura kutja Jesus we tu ṱira, kutja tu yenene okukamuna omuinyo waaruhe. Mena ra nao tu vanga okuhorera ku ye eyuva arihe, nu ka meyuva ndi matu papitisiwa uriri. (1 Joh. 2:6) Ku nao, tjimuna Jesus, eṱe tu kayenda komurungu okuzuvarisa noupyuke, nokuhinokuyandjera otjiṋa okututjaera. (Luk. 4:43) Eṱe nandarire tu riyandjera okutatumisiwa mena rokutja tu kongorera Jesus nu tu karera Mukuru nouṱakame. (2 Tim. 3:12) Eṱe tu yandja ondengero ku Jesus ‘otjotjiuru tjombongo,’ ku nao tu kongorera omuhunga waimba mba tu wa pewa okuhongorera nokutjevera ovemukongorere nondjoroka.—Ef. 4:​8, 11, 12; 5:23.

14. (a) Omomuano uṋe mu tu papitisiwa mena rombepo ondjapuke? (Wina tara .) (b) Ozombapitisimo zeṋe zarwe ovatwirisiwa nḓu ve papitisiwa? (Tara kokawongo nga, “Ozombapitisimo ovatwirisiwa nḓu ve papitisiwa.”)

¹⁴ Mena rombepo ondjapuke. Eṱe tu yakura ouatjiri wokutja ombepo ondjapuke kamundu nu karupa rwooMukuru vetatu mumwe, posi ya omasa wa Mukuru. Eṱe tu tjiwa kutja Jehova wa ungurisa ombepo ondjapuke okuvatera ovaprofete ve kutja ve tjiwe imbi mbyaave sokuhungira, nokuvatera ovatjange vOmbeibela okutjanga imbi mbyaa vanga kutja vi tjangwe mOmbeibela. (2 Petr. 1:​20, 21) Eṱe tu kondja kutja atu ha tjiti ouvi ounene, mena rokutja tji twa tjiti nao maku tjiti kutja ombepo ondjapuke i zepo pweṱe na mombongo wina.—Ef. 4:30.

15. Hapo matu sokurimanena okutjita tjike?

¹⁵ Indu tji wa papitisiwa rukuru, kayende komurungu okurizemburukisa omuini kutja omena raye ombapitisimoc nokuhupa otja komakwizikiro ngu wa tjita ku Jehova tji vi ri oviṋa ovinanḓengu. Posi ya, hapo tjike indu tji u hi ya papitisiwa? Hapo pe notjiṋa tji tji ku tjaera kutja o ha papitisiwa? Orupa ndu maru kongorere ko maru kahungirira koviṋa mbi mo sokutjita kutja u yenene okupapitisiwa.