Հարցերի արկղ
◼ Ի՞նչ գործնական միջոցներով կարող ենք աջակցել ռահվիրաներին։
2009 ծառայողական տարվա ընթացքում ամբողջ աշխարհում գրեթե 800000 եղբայրներ ու քույրեր ծառայել են որպես ընդհանուր և հատուկ ռահվիրա։ Այս լիաժամ ծառայողներն իրենց լավագույնն են տվել՝ տրամադրելով ժամանակ, էներգիա և նյութական միջոցներ Թագավորության բարի լուրը տարածելու համար (Առակ. 3։9)։ Անկասկած, Եհովան թանկ է գնահատում նրանց թափած ջանքերը։ Ընդօրինակելով նրան՝ մենք նույնպես պետք է ցույց տանք մեր գնահատանքը։ Ինչպե՞ս կարող ենք աջակցել նրանց, որպեսզի ուրախ սրտով շարունակեն իրենց ծառայությունը՝ չնայած դժվարություններին։
Հատուկ ընտրված խոսքերը կարող են քաջալերել մեր ռահվիրաներին և մղել շարունակելու ռահվիրայական ծառայությունը (Առակ. 25։11)։ Կարող ենք փոփոխություններ մտցնել մեր շաբաթական գրաֆիկում, որպեսզի հնարավորություն ունենանք ծառայելու նրանց հետ։ Երբ միասին ենք գնում ծառայության, կարող ենք առաջարկել մեր ավտոմեքենան, կամ երբ հասարակական տրանսպորտով ենք երթևեկում, վճարել ճանապարհածախսը։ Իսկ եթե նրա ավտոմեքենայով ենք գնում, ապա կարող ենք որոշակի գումար տրամադրել ճանապարհածախսը ծածկելու համար (1 Կորնթ. 13։5; Փիլիպ. 2։4)։ Մենք նաև սեր կդրսևորենք ռահվիրաների հանդեպ, եթե հյուրասիրություն ցույց տանք նրանց և ժամանակ առ ժամանակ հրավիրենք մեր տուն՝ ճաշի (1 Պետ. 4։8, 9)։
Աստվածաշունչը վստահեցնում է, որ Եհովան անպայման հոգ կտանի նրանց կարիքները, ովքեր Թագավորության շահերն առաջին տեղում են դնում (Սաղ. 37։25; Մատթ. 6։33)։ Օրինակ՝ նա օգնում է իր ծառաներին քրիստոնեական եղբայրության միջոցով (1 Հովհ. 3։16–18)։ Ինչ խոսք, ռահվիրաները չեն մտածում, որ ուրիշները պարտավոր են հոգալ իրենց ֆինանսական կարիքները։ Այդ պատճառով էլ գուցե չասեն, որ ինչ-որ բանի կարիք ունեն։ Ուստի եթե ուզում ենք օգնել մեր սիրելի ռահվիրաներին և «լրացնել նրանց պակասը», պետք է լինենք ուշադիր և դիտունակ (2 Կորնթ. 8։14, 15)։
Երբ առաջին դարի Կենքրայի ժողովի եռանդուն ավետարանիչներից մեկը՝ Ֆիբեն, պատրաստվում էր ուղևորվել Հռոմ, Պողոսը այնտեղի եղբայրներին հորդորեց. «Ընդունեք նրան Տիրոջով, ինչպես որ արժան է սրբերին, և օգնեք նրան ցանկացած հարցում, ինչում որ ձեր կարիքը կունենա» (Հռոմ. 16։1, 2)։ Մենք հիանալի առիթ ունենք նման հոգատարություն ցույց տալու՝ աջակցելով մեր ժողովի ընդհանուր և հատուկ ռահվիրաներին, ովքեր առանց դադարի հռչակում են բարի լուրը (Գործ. 5։42)։