Արդյոք Աստված էվոլյուցիայի միջոցո՞վ է արարել կյանքի տարբեր տեսակները

Աստվածաշնչի պատասխանը

Ո՛չ։ Աստվածաշնչում հստակ ասվում է, որ Աստված է արարել մարդկանց, ինչպես նաև տարբեր «տեսակի»a կենդանիներին ու բույսերը (Ծննդոց 1։12, 21, 25, 27; Հայտնություն 4։11)։ Այնտեղ գրված է, որ մարդկային ողջ ընտանիքը սերել է Ադամից ու Եվայից՝ մեր նախածնողներից (Ծննդոց 3:20; 4:1)։ Աստծու Խոսքը թիկունք չի կանգնում այն տեսությանը, ըստ որի՝ Աստված էվոլյուցիայի միջոցով է ստեղծել կյանքի տարբեր տեսակները (այս ուսմունքը երբեմն կոչվում է թեիստական էվոլյուցիա)։ Սակայն միևնույն ժամանակ Աստվածաշունչը չի հակասում գիտական այն դիտարկումներին, որոնց համաձայն՝ յուրաքանչյուր տեսակի մեջ կան տարատեսակներ։b

• Աստված էվոլյուցիայի միջոցո՞վ է գործել

• Էվոլյուցիոն տեսությունը ներդաշնա՞կ է Աստվածաշնչին

• Ի՞նչ կարելի է ասել միջավայրի փոփոխվող պայմաններին հարմարվելու բույսերի և կենդանիների ունակության մասին

Աստված էվոլյուցիայի միջոցո՞վ է գործել

«Թեիստական էվոլյուցիա» եզրույթը ընդգրկում է տարատեսակ գաղափարներ։ Ըստ «Բրիտանական հանրագիտարանի»՝ այդ արտահայտությունն ընդգրկում է այն գաղափարը, թե «բնական ընտրությունը այն մեխանիզմներից մեկն է, որի միջոցով Աստված ղեկավարում է բնաշխարհը» (Encyclopædia Britannica)։

Թեիստական էվոլյուցիան կարող է նաև ընդգրկել հետևյալ գաղափարները։

• Բոլոր կենդանի օրգանիզմները սերել են ընդհանուր նախածնողներից հեռավոր անցյալում։

• Կյանքի մի տեսակը զարգանալով կարող է վերածվել բոլորովին այլ տեսակի (այս գաղափարը երբեմն անվանում են «մակրոէվոլյուցիա»)։

• Աստված ինչ-որ կերպ լիովին պատասխանատու է այս պրոցեսների համար։

Էվոլյուցիոն տեսությունը ներդաշնա՞կ է Աստվածաշնչին

Թեիստական էվոլյուցիան ենթադրում է, որ «Ծննդոց» գրքում արարչագործության մասին աստվածաշնչյան արձանագրությունը այդքան էլ ճշգրիտ չէ։ Սակայն Հիսուսը «Ծննդոցի» արձանագրության մասին խոսեց որպես պատմական փաստի (Ծննդոց 1:26, 27; 2:18–24; Մատթեոս 19:4–6)։ Աստվածաշունչն ասում է, որ նախքան երկիր գալը Հիսուսը ապրում էր երկնքում՝ Աստծու հետ, և օգնում էր նրան ստեղծելու «ամեն ինչ» (Հովհաննես 1։3)։ Հետևաբար այն գաղափարը, թե Աստված էվոլյուցիայի միջոցով է ստեղծել կյանքի տարբեր տեսակները, ներդաշնակ չէ աստվածաշնչյան ուսմունքներին։

Ի՞նչ կարելի է ասել միջավայրի փոփոխվող պայմաններին հարմարվելու բույսերի և կենդանիների ունակության մասին

Աստվածաշունչը չի նշում, թե մի տեսակի մեջ քանի տարատեսակներ կարող են լինել։ Եվ ոչ էլ հակասում է այն փաստին, որ Աստծու ստեղծած կենդանիների և բույսերի տարբեր տեսակները խաչասերման և նոր միջավայրին հարմարվելու պրոցեսում կարող են որոշակի փոփոխության ենթարկվել։ Ու թեև ոմանք հարմարվողականության պրոցեսները համարում են էվոլյուցիայի տեսակ, սակայն իրականում դրանց արդյունքում կյանքի նոր տեսակ չի առաջանում։