Մկրտվե՞մ, թե՞ ոչ (մաս 2): Պատրա՞ստ եմ մկրտությանը

Եթե Աստվածաշնչի չափանիշների համաձայն ես ապրում և ձգտում ես մտերմանալ Եհովայի հետ, բնականաբար մտածում ես մկրտվելու մասին։ Իսկ ինչպե՞ս կարող ես իմանալ՝ պատրաստ ես այդ քայլն անելու, թե ոչ։a

Այս հոդվածում՝

• Որքա՞ն գիտելիքներ պետք է ունենամ

• Ի՞նչ պետք է անեմ

• Ինչ են ասում հասակակիցներդ

Որքա՞ն գիտելիքներ պետք է ունենամ

Մկրտությունը դպրոցական քննություն չէ, ուստի մեծ քանակությամբ նյութեր անգիր անելու կարիք չկա։ Սակայն քեզ հարկավոր կլինի «բանականությունդ» գործի դնել և ամրապնդել հավատդ այն բանում, որ Աստվածաշնչի սովորեցրածը ճշմարտություն է (Հռոմեացիներ 12:1)։ Օրինակ՝

• Համոզվա՞ծ ես, որ Աստված գոյություն ունի և արժանի է, որ երկրպագես իրեն։

  Աստվածաշնչում ասվում է. «Նա, ով մոտենում է նրան, պետք է հավատա, որ նա գոյություն ունի և վարձատրում է նրանց, ովքեր ջանադրաբար փնտրում են իրեն» (Եբրայեցիներ 11։6)։

  Հարցրու ինքդ քեզ. «Ինչո՞ւ եմ հավատում Աստծուն» (Եբրայեցիներ 3:4)։ «Ինչո՞ւ պետք է երկրպագեմ նրան» (Հայտնություն 4:11):

  Օգնության կարիք ունե՞ս։ Տես «Ստեղծագործությո՞ւն, թե՞ էվոլյուցիա—Մաս 1։ Ինչո՞ւ հավատալ Աստծուն» հոդվածը։

• Համոզվա՞ծ ես, որ Աստվածաշունչը Աստծու Խոսքն է։

  Աստվածաշնչում ասվում է. «Ամբողջ Գիրքը Աստծու ներշնչմամբ է գրված և օգտակար է սովորեցնելու, հանդիմանելու, ուղղելու, արդարությամբ խրատելու համար» (2 Տիմոթեոս 3։16)։

  Հարցրու ինքդ քեզ. «Համոզվա՞ծ եմ, որ Աստվածաշնչում մարդկանց գաղափարները չեն արձանագրված» (Եսայիա 46:10; 1 Թեսաղոնիկեցիներ 2:13):

  Օգնության կարիք ունե՞ս: Տես «Ինչպե՞ս կարող է Աստվածաշունչը օգնել ինձ։ Մաս 1. ուսումնասիրիր Աստվածաշունչը» հոդվածը։

• Համոզվա՞ծ ես, որ Եհովան քրիստոնեական ժողովի միջոցով է իրագործում իր նպատակը։

  Աստվածաշնչում ասվում է. «[Աստծուն] լինի փառքը ժողովի և Քրիստոս Հիսուսի միջոցով բոլոր սերունդներում հավիտյանս հավիտենից։ Ամեն» (Եփեսացիներ 3։21)։

  Հարցրու ինքդ քեզ. «Ժողովների ժամանակ սովորածս բաներին վերաբերվում եմ որպես մարդկային գաղափարների՞, թե՞ աստվածային իմաստության» (Մատթեոս 24:45)։ «Կանոնավոր հաճախո՞ւմ եմ ժողովներին, անգամ այն օրերին, երբ ծնողներս չեն կարողանում (եթե նրանք թույլ են տալիս)» (Եբրայեցիներ 10:24, 25):

  Օգնության կարիք ունե՞ս: Տես «Ինչո՞ւ արժե հաճախել Թագավորության սրահում անցկացվող հանդիպումներին» հոդվածը։

Ի՞նչ պետք է անեմ

Մկրտվելու համար հարկավոր չէ կատարյալ լինել։ Սակայն պետք է հստակ ցույց տաս, որ իսկապես ցանկանում ես «հեռանալ չարից և բարին գործել» (Սաղմոս 34։14)։ Օրինակ՝

• Աստվածաշնչի չափանիշներո՞վ ես առաջնորդվում։

  Աստվածաշնչում ասվում է. «Մաքուր խիղճ ունեցեք» (1 Պետրոս 3։16)։

  Հարցրու ինքդ քեզ: «Ինչի՞ց է երևում, որ ըմբռնողականությունս «մարզել եմ ճիշտն ու սխալը զանազանելու համար»» (Եբրայեցիներ 5։14)։ «Կարո՞ղ եմ մտաբերել այնպիսի դեպքեր, երբ դիմակայել եմ հասակակիցներիս ճնշմանը։ Ինչպիսի՞ ընկերներ ունեմ. նրանք խրախուսո՞ւմ են ինձ ճիշտն անել» (Առակներ 13:20):

  Օգնության կարիք ունե՞ս։ Տես «Ինչպե՞ս կարող եմ մարզել խիղճս» հոդվածը։

• Պատասխանատվությա՞մբ ես մոտենում քայլերիդ։

  Աստվածաշնչում ասվում է. «Մեզանից յուրաքանչյուրը իր անձի համար պիտի հաշիվ տա Աստծուն» (Հռոմեացիներ 14։12)։

  Հարցրու ինքդ քեզ. «Որքանո՞վ եմ ազնիվ ինքս ինձ և ուրիշների հետ» (Եբրայեցիներ 13:18)։ «Ընդունո՞ւմ եմ սխալներս, թե՞ հակված եմ թաքցնել դրանք կամ մեղքը բարդել ուրիշների վրա» (Առակներ 28:13):

  Օգնության կարիք ունե՞ս։ Տես «Ինչպե՞ս վարվեմ, եթե սխալ բան եմ արել» հոդվածը։

• Շարունակո՞ւմ ես մտերմանալ Աստծու հետ։

  Աստվածաշնչում ասվում է. «Մոտեցեք Աստծուն, և նա կմոտենա ձեզ» (Հակոբոս 4։8)։

  Հարցրու ինքդ քեզ. «Ի՞նչ եմ անում, որ ավելի մտերմանամ Աստծու հետ։ Որքա՞ն հաճախ եմ Աստվածաշունչ կարդում» (Սաղմոս 1:1, 2)։ «Կանոնավոր աղոթո՞ւմ եմ» (1 Թեսաղոնիկեցիներ 5:17): «Կոնկրետ բաների մասի՞ն եմ աղոթում։ Ընկերներս մտերի՞մ են Եհովայի հետ» (Սաղմոս 15:1, 4):

  Օգնության կարիք ունե՞ս։ Տես «Ինչպե՞ս կարող է Աստվածաշունչը օգնել ինձ։ Մաս 2. Աստվածաշնչի ընթերցանությունը հաճելի դարձրու» և «Ինչո՞ւ պետք է աղոթեմ» հոդվածները։

ԱՌԱՋԱՐԿ. Մկրտությանը նախապատրաստվելիս կարդա «Երիտասարդների հարցերը. գործնական խորհուրդներ» գրքի 2-րդ հատորի 37-րդ գլուխը։ Հատկապես ուշադրություն դարձրու 308-րդ և 309-րդ էջերի շրջանակներին։