Հարցերի Արկղ

◼ Ինչպե՞ս պետք է արձագանքենք, երբ Թագավորության գործը քննադատության է ենթարկվում լրատվական միջոցներով։

Ժամանակ առ ժամանակ հավատուրացները և թագավորության բարի լուրի հակառակորդները քննադատում են Եհովայի ժողովրդի քարոզչական գործունեությունը և ուսմունքների դեմ են խոսում հեռուստատեսության, ռադիոյի, թերթերի և պարբերագրերի միջոցով։ Սովորաբար այս ամենի դեմ պայքարելու լավագույն ձևը արհամարհելն է։ Ինչո՞ւ։ Այդպես վարվեց Հիսուսը. «Երբ նրա մասին չարախոսում էին, փոխարենը՝ նա չէր չարախոսում։ Երբ նա չարչարվում էր, չէր սպառնում, այլ իրեն հանձնում էր նրան, ով արդարությամբ է դատում» (1 Պետ. 2։23)։

Ոմանք կարծում են, թե մենք պետք է հերքենք մեզ դեմ ուղղված մեղադրանքները և ճշմարտությունը հայտնենք ռադիոյի, հեռուստատեսության միջոցով, ինչպես նաև թերթերի խմբագրերին նամակներ գրելով։ Սակայն նման արձագանքը հաճախ ավելի մեծ հակառակության ալիք է բարձրացնում, և արդյունքում հակառակորդները ավելի շատ են սխալ տեղեկություններ տարածում մեր մասին։ Ընդհանուր առմամբ՝ Եհովայի վկաները բարի համբավ ունեն։ Շատերն են գնահատում մեր կատարած աշխատանքը և այն հրաշալի հրատարակությունները, որ տարածում ենք։ Քննադատության պատճառով մեր հավատալիքների և կազմակերպության մասին առաջացած հարցերին հաճախ կարելի է պատասխանել տնետուն ծառայության ժամանակ։ Ճիշտ տրամադրվածություն ունեցող մարդիկ կստանան իրենց հուզող հարցերի պատասխանները։ Այդպիսով հակառակորդները առիթ չեն ունենա շարունակելու սուտ լուրեր տարածել մեր մասին։ Իսկ ամենակարևորը, Թագավորության բարի լուրը կքարոզվի առանց ավելորդ խոչընդոտների, և աշակերտներ պատրաստելու գործը առաջ կընթանա, ինչպես պատվիրել էր Հիսուսը (Մատթ. 28։19, 20)։

Սակայն եթե որևէ տարածքում նման բան է եղել, ու երեցները հարկ են համարում արձագանքելու քննադատությանը՝ Եհովայի անունը և նրա ժողովրդին պաշտպանելու համար, լավ կլինի նախ դիմել կազմակերպությանը և տեղեկացնել հարցին առնչվող բոլոր փաստերը։ Կազմակերպությունը կքննի խնդիրը և համապատասխան առաջարկներ կանի։