Ընթերցողների հարցերը

Եթե քրիստոնյան ձայներ է լսում, արդյո՞ք դա անպայման նշանակում է, որ նա դիվային հարձակման է ենթարկվում։

Ոչ։ Թեև հայտնի է, որ դևերի ներկայությունը կարող է այդ կերպ դրսևորվել, շատ անհատներ, ովքեր ձայներ են լսում կամ այլ անբացատրելի, անհանգստացնող իրավիճակներ ապրում, բժշկական հետազոտման ենթարկվելով, պարզել են, որ դրանց պատճառը առողջական խնդիրներ են։

Նույնիսկ առաջին դարում մարդիկ ակնհայտորեն տեսնում էին, որ դիվային հարձակման ենթարկվելն ու որոշակի ֆիզիկական վիճակում գտնվելը նույն հետևանքներն են ունենում։ Մատթէոս 17։14–18-ում մենք կարդում ենք մի պատանու մասին, որը բժշկվեց Հիսուսի կողմից։ Թեև պատանին ծանր էպիլեպսիայի (ընկնավորություն) նշաններ էր ցույց տալիս, իրականում նա տառապում էր դևի պատճառով։ Բայց ավելի վաղ պատահած մի դեպքում, երբ Հիսուսի մոտ բերեցին հիվանդ մարդկանց, նրանց մեջ կային «դիւահարներ եւ լուսնոտներ [ընկնավորներ]» (Մատթէոս 4։24)։ Ակներևաբար, մարդիկ հասկանում էին, որ որոշ ընկնավորներ չէին գտնվում դիվային ազդեցության տակ։ Նրանց խնդիրը առողջական էր։

Հայտնի է, որ շիզոֆրենիայով (հիվանդություն, որ հաճախ բուժվում է դեղերով) տառապող հիվանդներից ոմանք ձայներ են լսում կամ էլ տարօրինակ բաներ զգում։a Առողջական այլ վիճակներ նույնպես կարող են մտավոր խանգարում պատճառել, ինչը ոմանց կարող է մտածել տալ, թե դևերն են անհանգստացնում տվյալ անհատին։ Ուստի, երբ անհատը հայտնում է, որ ձայներ է լսում կամ անհանգստություն է զգում ինչ–​ինչ պատճառներով (թեև չպետք է բացառել դիվային հարձակումը), անպայման պետք է քաջալերել նրան, որ բժշկական հետազոտության ենթարկվի. հնարավոր է՝ նրա վիճակը ֆիզիկական պատճառներով է բացատրվում։

[ծանոթագրություն]