Գաղտնիքը բացելու ժամանակը

Գաղտնիք պահելը նպաստում է մարդկանց միջև խաղաղ հարաբերություններին, իսկ հակառակ դեպքում վիճաբանությունները գուցեև անխուսափելի լինեն։ Բայց կա՞ ժամանակ, երբ արդեն կարելի է գաղտնիքը բացել։ Ամովս մարգարեն Աստծո մասին հետևյալն է ասում. «Եհովան ոչ մի բան չի անիլ, եթէ չ’յայտնէ իր խորհուրդը իր ծառաներին՝ մարգարէներին» (Ամովս 3։7)։ Այս խոսքերից մենք կարող ենք ինչ–որ բան սովորել գաղտնիքը պահելու մասին։ Եհովան կարող է ինչ–ինչ հարցեր որոշ ժամանակ գաղտնի պահել, իսկ հետո դրանք բացել որոշ անհատների։ Ինչպե՞ս կարող ենք ընդօրինակել Եհովային այս հարցում։

Երբեմն քրիստոնեական ժողովի վերակացուները՝ երեցները, կարող են որոշել ինչ–ինչ հարցեր գաղտնի պահել (Գործք 20։28, ԱԹ)։ Օրինակ՝ հանուն ժողովի բարօրության նրանք կարող են որոշել ինչ–որ ժամանակով գաղտնի պահել ժողովին վերաբերող որոշ հարցերի մանրամասնությունները կամ նշանակումների փոփոխությունները։

Սակայն նման դեպքում կարևոր է գաղտնեկիցներին տեղյակ պահել, թե երբ և ինչ ձևով է հարկավոր գաղտնիքը բացել, եթե ընդհանրապես այն բացահայտման ենթակա է։ Իմանալով, թե երբ պետք է գաղտնիքը բացել՝ նրանք կկարողանան այն պահել (Առակաց 25։9)։