Թագավորության խոստումները։ «Ամեն բան նոր եմ անում»

ՃՅՈՒՂԻՑ պոկում ես կարմրաթուշ, շողշողուն խնձորը և վայելում ես նրա անուշ բույրը։ Զամբյուղդ նորից լցվել է։ Արդեն ժամեր են անցել, բայց դեռ չես հոգնել ու կարող ես էլի աշխատել։ Ճյուղերի արանքից երևում է մայրդ, որ նույնպես խնձոր է քաղում և ուրախ զրուցում է ընտանիքիդ անդամների և ընկերների հետ, որ եկել են օգնելու։ Նա նույնպես շողում է թարմությամբ։ Ճիշտ այնպիսին է, ինչպիսին մնացել է մանկության քո հուշերում։ Արդեն դժվար է հավատալ, որ մի ժամանակ այն աշխարհում, որն այլևս չկա, աչքիդ առաջ նա թոշնեց, ծերացավ, մաշվեց հիվանդությունից ու հեռացավ կյանքից։ Դու սգում էիր ու արտասվում նրա սառը հողաթմբի առաջ... Բայց հիմա նա այստեղ է՝ քո կողքին՝ կենսուրախ ու կայտառ, ինչպես բոլորը, որ հարություն են առել։

Կգա՛ այդ օրը, մենք հաստա՛տ գիտենք։ Համոզված ենք, քանի որ Աստծու բոլոր խոսքերն են իրականանում։ Այս բաժնում կքննարկենք, թե ինչ իրադարձություններ են լինելու մոտ ապագայում՝ մոտեցնելով մեզ Արմագեդոնին։ Նաև կհիշենք Թագավորության այն հիասքանչ խոստումները, որ իրականություն կդառնան դրանից հետո։ Որքա՜ն երջանիկ կլինենք, երբ մեր աչքերով տեսնենք՝ ինչպես է Թագավորությունը իշխում ողջ երկրի վրա, և ինչպես է ամեն բան նոր դառնում։