«Արդեն հոգնել եմ»
Երբ կիսաքանդ տուն ես տեսնում, մտածում ես, որ երկար տարիներ այն լքված ու անուշադրության է մատնված եղել։ Ինչ խոսք, ժամանակի ընթացքում տունը քայքայվում է քամու և անձրևների պատճառով։ Այն խարխուլ է և թվում է, թե ուր որ է փուլ կգա։
ԿԱՐԵԼԻ է ասել, որ այսօր շատ ընտանիքներ քայքայման եզրին են կանգնած։ Գուցե կարծում ես, որ ձեր ամուսնությունն էլ է փլուզվում։ Եթե իսկապես շատ խնդիրներ կան ձեր ընտանիքում, ապա մի՛ հուսալքվիր։ Չկա այնպիսի ընտանիք, որ խնդիր չունենա։ Աստվածաշունչը նույնպես նշում է, որ ամուսնացածները «նեղություն» կունենան (1 Կորնթացիներ 7։28)։
Այս խոսքերի ճշմարտացիությունը շեշտելով՝ հետազոտողների մի խումբ հետևյալն է ասում. «Ամուսնությունը մեր հասարակության մեջ ամենավտանգավոր բանն է, այդուհանդերձ, բազում մարդիկ ամեն օր ամուսնանում են»։ Այդ հետազոտողները նաև ավելացնում են. «Այն, ինչ սկսվում է ուրախությամբ և բազում խոստումներով, կարող է դառնալ ցավալի իրականություն անհատի ողջ կյանքի ընթացքում»։
Իսկ ի՞նչ կարելի է ասել քո և կողակցիդ փոխհարաբերությունների մասին։ Կարելի՞ է ասել, որ դուք
● միշտ վիճում եք,
● դառը խոսքեր եք ասում իրար,
● հավատարիմ չեք,
● ատելությամբ եք լցված միմյանց նկատմամբ։
Այդ դեպքում ի՞նչ կարող ես անել, եթե քեզ թվում է, թե ուր որ է ձեր ամուսնությանը վերջ կդրվի։ Արդյո՞ք խնդրի լուծումը ամուսնալուծությունն է։
[շրջանակ/նկար 3-րդ էջի վրա]
«ԱՄՈՒՍՆԱԼՈՒԾՈՒԹՅՈՒՆԸ ԴԱՐՁԱՎ ՍՈՎՈՐԱԿԱՆ ԲԱՆ»
Այսօր գնալով մեծանում է այն մարդկանց թիվը, ովքեր ամուսնալուծվում են։ Օրինակ՝ Միացյալ Նահանգներում տարիներ շարունակ ամուսնալուծությունը արտասովոր բան է համարվել։ 1960–ականներից հետո, ինչպես նշում է Բարբարա Դեֆոն իր գրքում, «ամուսնալուծվողների թիվը զարմանալիորեն արագ աճեց» (The Divorce Culture)։ Նա նաև գրում է. «Այս թիվը կտրուկ աճեց ընդամենը մեկ տասնամյակ հետո և այդպես մինչև 1980–ականների սկիզբը, որից հետո Արևմտյան երկրներում այս հարցում կայունություն նկատվեց։ Այս կտրուկ և շարունակական պրոցեսի արդյունքում ընդամենը երեք տասնամյակ հետո արտասովոր համարվող ամուսնալուծությունը դարձավ սովորական բան»։