Wat Mark Wen Write
2 But few days layta, Jesus go back Ca·perʹna·um, an evrybody wen hea dat he wuz at home. 2 Had so much peopo come in da house, neva have room, not even by da door. An he started fo tell dem da good news. 3 An four guys wen bring him somebody dat wuz cripple. 4 But cuz had plenny peopo, dey no could bring um by Jesus. So dey make one puka in da roof fo lower da cripple guy down on da stretcha. 5 Wen Jesus see how much faith dey get, he tell da guy on da stretcha: “My braddah, yoa sins stay let go.” 6 Some of da scribes* wuz dea, an dey tink to demself: 7 “How come dis guy stay talking lidat? He no moa respeck fo God, da way he talk. Nobody can fogive sins, ony God.” 8 But right away, Jesus could tell wat dey wuz tinking, so he sed to dem: “How come you tinking dese tings in yoa heart? 9 Iz easy fo say to da cripple guy, “Yoa sins stay let go.” But you tink jus anybody can say to dis guy, “Stan up, pick up yoa stretcha, an walk home”? 10 But so dat you know God give me, da Son of man,* da right fo let go sins on da earth—” den he tell da guy dat no can move: 11 “I tell you, stan up, pick up yoa stretcha, an walk home.” 12 So he stan up, an right away he pick up his stretcha an wen walk in front all dem. Evrybody drop dea jaws an start fo tell good tings about God. Dey tell: “We neva see notting lidis befoa.”
13 So Jesus go by da sea again, an all da peopo keep coming to him, an he start fo teach dem. 14 Wen he wuz walking, he spock Leʹvi da son of Al·phaeʹus sitting at da tax office. He tell um: “Come be my followa.” So he get up an follow Jesus. 15 Layta on, Jesus go Leʹvi’s house fo eat. Plenny tax collectas an sinnaz wen start fo eat wit Jesus an his followas, cuz plenny of dem wen follow him. 16 But wen da scribes dat wuz Pharisees* see him eating wit da sinnaz an tax collectas, dey tell Jesus followas: “How come he grind wit tax collectas an sinnaz?” 17 Wen Jesus hea dem, he tell um: “Da guys dass strong no need one docta, but da sick guys need um. I wen come fo help sinnaz, not da guys dat tink dey righteous.”
18 John’s followas an da Pharisees would fast.* So da guys dat follow John come by Jesus an ask: “How come us an da guys dat follow da Pharisees fast, but yoa followas no do dat?” 19 So Jesus tell dem: “Wen you go one wedding, da groom’s frenz no goin feel sad if he stay dea ah? Az long az da groom stay wit dem, dey no moa reason fo fast. 20 Bumbye da time goin come wen da groom no goin be dea wit dem. Dass da day wen his frenz goin fast. 21 If you get one puka in yoa clothes, you not goin sew one patch wit one piece cloth dat you neva shrink yet. If you do dat, da new piece cloth goin shrink an rip away an make one even bigga puka. 22 Dis da same ting wit putting new wine in one old wine bag.* If you do dat, da bag goin buss an be no good an da wine goin spill. Moa betta fo put new wine in one new wine bag.”
23 Wen Jesus wuz goin thru da wheat fields on da Sabbath,* his followas wen start fo pick da grain. 24 So da Pharisees tell Jesus: “Eh, try look dem! How come dey doin stuff dey not suppose to on da Sabbath?” 25 But he tell dem: “You neva read wat David an his guys did da time dey wen run outa food an wuz hungry? 26 You neva read in da story about A·biʹa·thar da main pries, da time David wen go inside God’s house an eat da spesho bread fo God? Nobody wuz suppose to eat um, ony da pries guys. He even wen give some to da guys dat wuz wit him.” 27 Den he sed to dem: “Da Sabbath wuz made fo help peopo, not fo be moa importan den peopo. 28 So da Son of man stay in charge of even da Sabbath.”