Wat Matthew Wen Write

3 Layta on, John da Baptiza go da Ju·deʹa boonies fo talk fo God, 2 an he tell: “You gotta come sorry fo yoa sins, cuz God’s Govament stay coming pretty soon.” 3 Da prophet Isaiah wen talk about dis guy John wen he tell: “Can hea somebody yelling from da boonies: “Clear da road, an make um ready fo Jehovah!””* 4 Dis guy John, his clothes come from camel hair an he wea one ledda belt. He eat grasshoppas an wild honey fo his food. 5 Dat time, peopo from Jerusalem, Ju·deʹa, an from all ova da Jordan side wen go out to John fo hea him talk, 6 an dey had tell how dey wen sin an jam up, an he baptize* dem in da Jordan Riva.

7 Wen he had see plenny Pharisee an Sadducee guys* coming to wea he wuz baptizing, he tell dem: “You guys iz jus like poisonous snakes cuz of da stuff you do. How come you stay hea? You tink you can get away an no get punish from God? 8 You gotta show dat you fo real kine sorry by da tings you do. Dass jus like one tree dat give good fruit. 9 Eh, no even tink fo make excuse an tell: “We get Abraham az oua faddah.” Cuz I telling you right now, God can make dese rocks come Abraham’s kids. 10 Da whole tree stay ready fo be cut down. So den, evry tree dat no give good fruit goin get cut down an thrown inside da fiyah. 11 I baptize all you guys wit watta cuz you stay sorry fo wat you wen do. But da guy coming afta me iz moa strong* den me an I not even good enuff fo take off his sandals. Dat one goin baptize you wit powa from God an wit fiyah. 12 He get one shovel in his hand dat he goin use fo split up da grain from da wheat plant. He goin clean up da place wea he do dat an take da grain an store um, but da junks he goin burn inside da fiyah dat no can get put out.”

13 Layta on, Jesus wen come from Galʹi·lee to da Jordan Riva fo John baptize him. 14 But John try fo stop um, an tell: “You da one should baptize me an not da odda way aroun!” 15 Jesus tell him: “Do dis fo me, so dat we can do evryting da way God like.” Den John neva try stop um anymoa an he wen baptize him. 16 Right afta Jesus get baptize an come up from da watta, Ho try look! Da sky* had open up, an John wen see God’s powa come down like one dove an go on top Jesus. 17 An den, had one voice from heaven tell: “Dis my Boy, da one I love, he make me real happy.”