Wat Matthew Wen Write

23 Den Jesus tell all da peopo an his guys: 2 “Da scribes an da Pharisees* wen give demselfs da right fo be like Moses. 3 So all da tings dey tell you fo do, do um. But no copy wat dey do, cuz dey all mout an no do wat dey tell. 4 Da rules dey make iz jus like one heavy load dey make peopo carry, but dey no like even help litto bit or carry um demselfs. 5 Dey make shua oddas can see evryting dey do. Like dey make da box dey wea* az one charm moa big, an da tassels moa long on da bottom of dea clothes. 6 Dey like fo sit in da mos importan place at da dinna table an in da front* seats in da synagogs.* 7 An dey like peopo give dem spesho attention wen dey greet um in da market, an fo peopo call dem Rabbi.* 8 But you guys, no let anybody call you Rabbi, cuz you ony get one Teacha, an all you guys iz braddahs. 9 An no call anybody on earth yoa faddah, cuz you ony get one Faddah, He stay in da heavens. 10 An no let anybody call you leada, cuz you ony get one Leada, dass da Christ. 11 But da one dass da greates gotta take kea oddas. 12 Whoeva make like he moa importan goin come shame, but whoeva stay humbo goin come importan.

13 “You goin get it, you scribes an Pharisees! You guys so two-face! Cuz you lock da door fo da Govament in da heavens. You not goin inside an you block da guys dat like go in. 14* ——

15 “You goin get it, you scribes an Pharisees! You guys so two-face! Cuz you travel all ova from mauka to makai fo make one new believa,* an wen he come one, he goin be moa worse den you. An if you deserve fo go Ge·henʹna,* den even moa he deserve fo go too.

16 “You goin get it, you blind leadas, who tell: “No mean notting if anybody swear on da tempo. But if anybody swear on da gold of da tempo, den he gotta do wat he promise.” 17 You blind buggahs! Wass moa importan, da gold or da tempo dat make da gold spesho? 18 An you tell: “No mean notting if anybody swear on da altar. But if anybody swear on da gif on da altar, den he gotta do wat he promise.” 19 You blind guys! Wass moa importan, da gif or da altar dat make da gif spesho? 20 So den, whoeva swear on da altar, not ony swearing on da altar but on evryting dat stay on um. 21 An whoeva swear on da tempo, not ony swearing on da tempo but on God dat stay dea too. 22 An whoeva swear by heaven, stay swearing by God’s throne an on da one dat sit on um.

23 “You goin get it, you scribes an Pharisees! You guys so two-face! Cuz you give da ten percent of da mint, da dill, an da cumin, but you no pay attention to da moa importan tings in da Law, like bein fair, showing faith, an mercy. Dass tru, you suppose to give da ten percent, but dat no mean you no need do da odda tings. 24 You blind leadas, you take out da gnat from yoa cup but you chug down da camel!

25 “You goin get it, you scribes an Pharisees! You guys so two-face! Cuz you clean da outside of da cup an da dish real good, but inside stay dirty, cuz you ony like take tings from oddas an make yoaself happy. 26 Blind Pharisee, firs clean da inside of da cup an da dish, so dat da outside can come clean too.

27 “You goin get it, you scribes an Pharisees! You guys so two-face! Cuz you jus like da painted graves dat look good on da outside, but inside get bones an stay all pilau. 28 You guys jus lidat, on da outside look like you guys doin da right ting, but inside you guys two-face an no pay attention to God’s laws.

29 “You goin get it, you scribes an Pharisees, you guys so two-face! Cuz you fix up da graves of da prophets an make nice da tombs of da workas fo God.* 30 Den you tell, “If I wen live back den, no ways I would help my ancestas kill da prophets.” 31 So, you yoaself tell you guilty of bein sons of da guys dat wen murda da prophets. 32 So den, go pau da job yoa ancestas wen start.

33 “You snakes, you jus like sons of poisonous snakes, how you goin run away? God goin judge you an throw you in Ge·henʹna. 34 Cuz of all da bad tings you do, I goin sen you prophets, smart guys, an guys dat teach.* Some of dem you goin kill an hang on da pos, an some of dem you goin beat in yoa synagogs an make dem suffa evry place dey go, 35 an den da blood of all da righteous guys dat wen get killed on dis earth goin be on you. From da blood of Abel to da blood of Zech·a·riʹah da son of Bar·a·chiʹah, who you killed in front da tempo nea da altar. 36 Fo shua, dis generation goin have to pay fo all dese tings.

37 “Peopo of Jerusalem, da killa of da prophets an da one dat stone da guys sent to her. How much times I wanted fo gadda you togedda jus like one hen gadda her chicks unda her wings! But you neva like. 38 Try look! God goin leave yoa house. 39 An I tell you dis, you not goin see me anymoa from now til you say, “Da one who come in Jehovah’s* name iz da one who stay blessed!””