Wat Matthew Wen Write

21 Wen dey get nea Jerusalem an come to Bethʹpha·ge on da Mount of Olives, Jesus wen sen two of his guys. 2 He tell dem: “You know dat town you see ova dea? Go dea an you goin find one young donkey wit da maddah. Untie dem an bring um to me. 3 If anybody ask wat you doin, tell dem: “Da Lord need um.” An he goin let you take um right away.”

4 Dis wen happen so dat dese words da prophet had tell would come tru: 5 “Tell da daughtah of Zion: “Try look! Yoa king stay coming. He humbo an stay riding on one young donkey.””

6 So Jesus guys wen go an do wat he tell dem fo do. 7 Dey bring da young donkey an his maddah, an put dea coats on dem, an den Jesus wen sit on da young donkey. 8 Choke peopo wen put dea coats on da road, an oddas wen cut branches from trees an spread um all ova da road. 9 Den all da guys dat walk in front an behind him yell: “God please, save da one from David’s line! Da one who come in Jehovah’s* name stay blessed! We pray to you, who stay in heaven, please save him!”

10 Wen Jesus get to Jerusalem, da whole town wuz getting all nutz. Dey tell: “Who dis guy?” 11 Da peopo keep telling: “Dis da prophet Jesus, from Nazʹa·reth in Galʹi·lee!”

12 Jesus wen go inside da tempo an throw out all da guys buying an selling stuff in dea, an he wen flip ova all da tables of da guys dat wuz changing money an da benches of da guys selling doves. 13 He sed to dem: “Da Scripchas tell, “My house goin be called one house of praya,” but you guys stay making um one house of crooks.” 14 Had blind an cripple peopo come to him in da tempo, an he heal dem.

15 Wen da main pries guys an da scribes* see da awesome tings he wen do an da boys yelling in da tempo, “God please, save da one from David’s line!” dey get all mad 16 an sed to him: “You hea wat dese boys stay telling?” Jesus sed to dem: “Yeah. You neva read in da Scripchas, “From da mout of litto kids an bebes dey goin praise you”?” 17 He wen leave dose guys an go outa da town. He go Bethʹa·ny an sleep dea.

18 Wen goin back to Jerusalem da nex morning, he wuz hungry. 19 He see one fig tree by da road an wen go ova dea, but ony had leaves, so he tell da tree: “You no goin get fruit anymoa.” Right den an dea, da fig tree wen dry up an die. 20 Wen his guys see dis, had shock dem an dey sed: “How da tree wen dry up lidat?” 21 Jesus ansa dem: “I telling you, if you get faith an no doubt, you goin be able fo do wat I did to da tree. An if you tell dis mountain, “Get up an go jump in da watta,”* goin happen. 22 An all da tings you pray fo, if you get faith, you goin get um.”

23 Afta he go in da tempo, da main pries guys an da eldas come up to him wen he wuz teaching an sed: “Wat right you get fo do all dis? An who wen give you da right fo do um?” 24 So Jesus sed to dem: “I like ask you someting firs. If you tell me, den I goin tell you why I get da right fo do dese tings. 25 Wen John had baptize peopo, who wen give him da right fo do dat? God or man?” So dey talk to each odda: “If we tell “God,” he goin say to us, “Den how come you neva believe him?” 26 But if we say, “Man,” den da peopo goin get mad cuz dey look at John az one prophet.” 27 So dey tell Jesus: “We donno.” Jesus tell dem: “Den I not goin tell you why I get da right fo do dese tings.

28 “Wat you tink? One guy had two kids. He tell da firs one, “Boy, go work in da field.” 29 Da boy tell um, “I no like.” But laytas, he feel bad an wen go work. 30 He tell da secon boy da same ting. Da boy tell: “Okay.” But he neva go work. 31 Which one of da two did wat da faddah like?” Dey sed: “Da firs one.” Jesus sed to dem: “I telling you, da tax collectas an prostitutes goin inside God’s Govament befoa you. 32 John wen come an show you da right way, but you neva believe um. But da tax collectas an prostitutes wen believe. An even wen you had see dis, you still neva feel bad an start fo believe um.

33 “Hea anodda story: Had one man dat own land an wen plant grapes. He wen put up one fence aroun um, dig one place fo smash da grapes an make wine, an put up one towa. Den he wen lease da land to farmas an go travel. 34 Wen came time fo harves, he sen his workas to da farmas fo get his grapes. 35 But da farmas wen grab his workas. Dey beat up one, kill da odda, an anodda one dey wen stone to death. 36 So he sen some moa workas, moa guys den da firs group, but da same ting wen happen to dem. 37 Finally, he sen his boy to dem an sed: “Fo shua dey goin respeck my boy.” 38 Wen da farmas see his boy, dey tell each odda: “Dis da one dat goin own da farm. We go kill um so we can take da land!” 39 So dey grab um, drag um outside da farm, an kill um. 40 So den, wen da owna of da farm come, wat he goin do to dose farmas?” 41 Dey tell um: “Cuz dey evil, he goin kill dem an lease da land to odda farmas dat goin give him da fruits wen stay ready.”

42 Jesus sed to dem: “You neva read dis in da Scripchas? “Da stone dat da buildas neva like wen come da mos importan stone.* Dis one come from Jehovah, an dass awesome fo see.” 43 Dis how come I tell you, you not goin get da blessings from God’s Govament. Da peopo dat do wat God like goin get um. 44 Da guy dat fall on da stone goin get buss up real bad. An anybody dat da stone fall on, goin get smash.”

45 Wen da main pries guys an Pharisees* hea his stories, dey knew he wuz talking about dem. 46 Even tho dey wanted fo grab um, dey wuz sked of da peopo, cuz dey wen look at him az one prophet.