Jòb rete fidèl

ÈSKE gen moun ki t ap ret fidèl ak Bondye, si yo ta jwenn gwo eprèv e si yo ta wè lè yo obeyi, sa pap fè yo jwenn avantaj materyèl? Se kesyon sa a Satan te poze sou Jòb, e Jòb te bay yon bon repons pou li.

Nan epòk Izrayelit yo te ann Ejip, Jòb, yon fanmi Abraram, t ap viv nan zòn yo rele Arabi jodi a. Nan epòk sa a, zanj yo nan syèl la te rasanble devan Bondye, e Satan, zanj rebèl la, te nan mitan yo tou. Devan tout zanj ki te la yo, Jewova te fè konnen jan l fè Jòb, sèvitè fidèl li a, konfyans. Anfèt, Jewova te di pa gen okenn lòt moun ki te fidèl menm jan ak Jòb. Men, Satan te fè konnen se paske Bondye beni Jòb e li pwoteje l ki fè Jòb kontinye ret fidèl. Satan te fè konprann tou si Jòb ta pèdi tout sa l posede, li t ap manke Bondye dega.

Bondye te kite Satan fè Jòb pèdi richès li, pitit li, e finalman, sante l. Kòm Jòb pa t konnen se Satan ki te lakòz tout sa k t ap rive l yo, li pa t ka konprann poukisa Bondye te pèmèt li pase anba eprèv sa yo. Malgre sa, li pa t janm vire do bay Bondye.

Twa fo zanmi te vin kot Jòb. Yo te di l yon seri pawòl ki nan plizyè paj nan liv Jòb la pou yo eseye fè l kwè, san yo pa t gen rezon, se pini Bondye t ap pini l pou peche kache li te fè. Yo te menm fè konprann Bondye pa pran plezi nan moun k ap sèvi l yo, ni li pa fè yo konfyans. Jòb pa t pran nan fo rezònman yo t ap fè yo. Avèk konfyans, Jòb te fè konnen l ap kontinye ret fidèl jis li mouri!

Men, Jòb te fè yon erè. Li te chèche jistifye tèt li twòp. Gen yon jèn gason ki rele Eliyou ki t ap koute sa k t ap di yo e ki te pale avèk yo tou. Li te reprimande Jòb paske Jòb pa t wè sa k pi enpòtan se defann dwa Jewova genyen pou l dirije a, se pa defann okenn moun. Mete sou sa, Eliyou te korije fo zanmi Jòb yo yon fason ki fèm.

Apre sa, Jewova Dye te pale ak Jòb pou l korije fason l te panse a. Jewova te atire atansyon Jòb sou anpil mèvèy ki gen nan kreyasyon an pou l te ka ede l konprann jan moun piti devan Bondye. Avèk imilite, Jòb te kite Bondye korije l. Kòm Jewova gen “anpil konpasyon ak anpil mizèrikòd”, li te fè Jòb retounen vin an sante, li te fè l vin gen de fwa sa l te posede anvan yo e li te fè l vin gen dis pitit (Jak 5:11). Lefètke Jòb te ret fidèl devan Jewova lè l te jwenn gwo eprèv, li te montre se yon fo akizasyon Satan te fè lè Satan te fè konnen pa gen moun k ap ret fidèl ak Bondye lè l jwenn eprèv.

— Selon liv Jòb la.