Obadya: Aprann gen lakrentif pou Bondye

Obadya te responsab kay wa Ahab, yon wa ki te mechan ki te pèmèt adorasyon Baal la lakòz moun yo ap fè yon seri vye bagay toupatou nan peyi a. Aktout sa, Obadya te aprann gen bonjan lakrentif pou Jewova “depi [l] jèn”. (1 Wa 18:​1-13.) Donk, lè rèn Jezabèl te bay lòd pou yo touye tout pwofèt Jewova yo, Obadya te konnen li te bezwen met kouraj sou li pou l anpeche mechanste sa a fèt. Menmsi se te yon sèl pwofèt Obadya te kache, li t ap met lavi l an danje. Epoutan, li te kache 100 pwofèt e l te ba yo manje pandan te gen yon gwo grangou! Imajine jan l te difisil pou l te fè sa san plizyè santèn fo pwofèt ki t ap sèvi wa a ak rèn nan pa t rive wè l. — 1 Wa 18:19.

Ki sa n ka aprann nan egzanp mesye sa a ki te gen lakrentif pou Bondye? Byenke Obadya te pè Ahab, lakrentif li te gen pou Bondye a te pi fò. Sa te ba l kouraj pou l te riske lavi l pou l te pwoteje frè l yo. Si yo entèdi vrè adorasyon an non zòn kote n ap viv la, nou menm tou nou kapab aprann gen lakrentif pou Bondye. Kalite lakrentif sa a ap ban nou fòs pou n ede frè n ak sè n k ap andire eprèv yo.