Ann ret tann fen sistèm sa a avèk konfyans

Talè konsa, Jewova pral sispann demontre pasyans pou monn sa a. Fo relijyon an pral detwi, nasyon yo pral met tèt yo ansanm pou yo atake pèp Bondye a, e Jewova pral detwi mechan yo nan Amagedon. Kretyen yo ap tann kokennchenn evènman sa yo.

Byennantandi, nou pa konnen tout detay konsènan gwo tribilasyon an. Pa egzanp, nou pa konnen egzakteman ki lè l ap kòmanse. Nou pa konnen ki sa pisans politik yo pral di pou yo jistifye rezon ki fè yo pral atake relijyon yo. Nou pa konnen konbyen tan atak nasyon yo pral fè sou pèp Bondye a pral dire e ki sa k ap gen nan atak sa a. Nou pa konnen tou ki mwayen presi Jewova pral itilize pou l detwi mechan yo nan Amagedon.

Sepandan, ekriti yo ban n tout enfòmasyon n bezwen pou n fè fas ak lavni avèk konfyans e avèk kouraj. Pa egzanp, nou konnen n ap viv nan fen “dènye jou yo”. (2Ti 3:1.) Nou konnen atak yo pral fè sou relijyon yo pap dire paske “y ap retire nan jou sa yo”, yon fason pou vrè relijyon an pa detwi (Mt 24:22). Nou konnen Jewova pral sove pèp li a (2P 2:9). E nou konnen Sila yo Jewova te chwazi pou egzekite mechan yo e pou sove gwo foul la nan Amagedon jis e yo pisan. — Re 19:11, 15, 16.

Se sèten evènman ki pral rive yo pral fè moun yo “faya paske y ap pè”. Sepandan, lè nou li e nou medite sou aksyon Jewova te fè nan tan lontan pou l sove pèp li a, e sou sa li fè n konnen konsènan lavni, nou ka “kanpe dwat, [epi] leve tèt nou”, paske nou gen konfyans delivrans nou toupre. — Lk 21:26, 28.