“ Èske nou konnen poukisa m pote lajan nou an tounen ? ”

‘MEZANMI ! Jan m bezwen lajan ! ’ Konsa Nana t ap reflechi. Nana se yon manman k ap leve twa pitit gason pou kont li. L ap viv nan yon zòn ki rele Kaspi nan Repiblik Jòji. Yon maten, rèv li pou l jwenn lajan te reyalize. Sou kote yon pòs polis, li te jwenn 300 lari, (yon valè lajan ki egal anviwon 4.050 goud). Pa t gen pyès moun nan zòn nan, e se te yon pakèt lajan. Anfèt, depi senk an se lari ki lajan nasyonal nan peyi Kaspi, je Nana pa t ko janm tonbe sou yon biyè 100 lari (anviwon 1.350 goud). Ata machann nan zòn nan pa t konn fè tout kòb sa a menm lè yo ta fin pase plizyè ane ap travay.

Nana di nan kè l : “ Sa pou m fè yon lajan konsa si m oblije pèdi ni lafwa m, ni lakrentif mwen genyen pou Bondye, ni espirityalite m ? ” Antanke kretyen, Nana te deja devlope kalite sa yo, menm lè li te oblije andire gwo pèsekisyon e menm lè li te konn pran baton pou kwayans li.

Pandan Nana sou wout pou l ale nan pòs polis la, li wè senk polisye ki fou ap chèche yon bagay. Li gentan konprann se lajan an y ap chèche. Li avanse bò kote yo, li di yo konsa : “ Nou pèdi yon bagay ? ”

Yo reponn : “ Yon lajan ”.

“ Konbyen ? ”

“ Twa san lari ! ”

Nana di yo : “ Mwen jwenn lajan an pou nou. ” Apre sa li mande yo : “ Èske nou konnen poukisa m pote lajan nou an tounen ? ” Yo pa t konnen.

Li kontinye li di yo : “ Se paske m se Temwen Jewova, si se pa t sa, mwen pa t ap pote l tounen. ”

Chèf polis la ki te pèdi lajan an fè Nana kado 20 lari (anviwon 270 goud), pou l montre jan li apresye konduit onèt li a.

Pawòl la te gaye vit nan tout zòn Kaspi. Nan demen, yon dam ki konn fè menaj soti nan pòs polis la, li di Nana : “ [Chèf la] toujou konn kenbe ti liv ou yo nan biwo l, men kounye a, ou mèt si l ap apresye yo pi plis. ” Yon polisye menm rive di : “ Si tout moun te Temwen Jewova, ou kwè ta gen moun k ap fè move zak ? ”