Viktwa Wayòm nan: Nou fè rekonèt bon nouvèl la devan lajistis

PANDAN w ap preche kay an kay, ou tande bri yon sirèn delwen. Tikras pa tikras bri a ap vin pi fò. Pandan w kòmanse pale ak yon lòt moun, moun k ap preche avè w la vin distrè lè l wè yon machin polis vin parèt. Gen yon polisye ki desann machin nan epi l vin kote nou, li di n: “Èske se nou menm k ap plede mache kay moun yo pou pale avè yo sou Bib la? Gen plizyè moun ki deja pote plent pou nou!” Ou reponn polisye a avèk respè, epi w idantifye w antanke Temwen Jewova. Ki sa k pral pase annapre?

Sa depann de jan yo konn trete Temwen Jewova yo nan peyi w. Pandan ane ki pase yo, ki jan gouvènman peyi w la te konn trete Temwen Jewova yo? Èske yo kite yo adore Jewova jan yo vle? Si se wi, petèt se paske frè ak sè espirityèl nou yo te travay anpil pandan plizyè dizèn ane ki pase yo, yon fason pou yo ‘defann bon nouvèl la e pou yo fè rekonèt li devan lajistis’. (Fil. 1:7.) Kèlkeswa kote w ap viv, lè w reflechi ak viktwa Temwen Jewova yo ranpòte devan tribinal, sa ka fè lafwa w vin pi solid. Nan seksyon sa a, nou pral egzamine kèk nan kokennchenn viktwa sa yo. Viktwa nou ranpòte yo bay bonjan prèv Wayòm nan egziste toutbon paske nou pa t ap janm ka ranpòte tout viktwa sa yo poukont nou!