Verite Wayòm nan: Bay manje nan domèn espirityèl

OU WÈ je etidyan Labib ou a k ap briye toutpandan w ap esplike l vèsè ou fèk sot li avè l yo. Li di tou dousman: “Èske w vle di Bib la fè konnen nou ka viv pou toutan nan yon paradi sou tè a?” Pwoklamatè ki avè w la souri epi l di: “Bon, sa w wè Bib la di menm?” Avèk kè kontan, etidyan an souke tèt li tèlman l sezi, epi l di: “Mwen pa ka kwè yo pa t janm anseye m sa anvan!” Ou sonje l te di yon bagay konsa tou sa gen kèk semèn lè li te fèk aprann Bondye rele Jewova.

Èske w janm fè yon eksperyans konsa? Sa te rive anpil moun pami pèp Bondye a. Gen kèk bagay ki ka fè n sonje kado ki gen anpil valè nou genyen an: Nou konnen verite a. Sepandan, pran yon ti tan pou w reflechi: Ki jan w te fè vin gen kado sa a? Nan seksyon sa a nou pral jwenn repons pou kesyon sa a. Fason pèp Bondye a te rive jwenn limyè nan domèn espirityèl tikras pa tikras montre aklè Wayòm Bondye a egziste toutbon. Pandan yon syèk, Jezi Kris, Wa a, te fè tout sa l kapab pou l asire l pèp Bondye a te jwenn verite a.