Satani Bona Demoni Ita Tuari Henia Karana Dekenai Ita Kwalimu Diba!

1. Daidia ida ita tuari noho? (Efeso 6:​11, 12)

ITA BE Iehova ena hesiai taudia dainai, tanobada ena tuari lalonai ita vareai lasi. (Isa. 2:4; Ioa. 18:36) To, Baibel ese ia hahedinaraia ita ibounai ese Satani bona ena demoni ita tuari henia noho. (Efeso 6:​11, 12 duahia.) Unai siahu bada aneru dikadia ita tuari henia neganai, do ita kwalimu diba, a? Oibe, bema Iehova ena heduru ita abidadama henia. To Satani bona ena demoni ese iseda abidadama idia hamanokaia totona, idia gaukaralaia daladia ita diba be namo.

2. Inai atikol ai dahaka do ita herevalaia?

² Atikol gunana ai, Satani ese iseda abidadama Iehova Dirava bona Iesu Keriso dekenai ia hamanokaia daladia ita dibaia. Inai atikol ai Satani ese ita ia tuari henia totona ia gaukaralaia dala ma rua do ita herevalaia. Satani be ia gaukara goada ita huanai ia noho lalotamona karana ia hadikaia totona. Bona dagedage karadia amo ita ia hagaria, unai amo Iehova ese ia henia gaukara do ita karaia lasi.

SATANI IA URA ITA IA HAPARARAIA

3. Edena dala ai Satani ese ita ia hapararaia?

³ Satani ia ura ita bona iseda tadikaka taihu huanai hekwakwanai ia havaraia. Ena ura be iseda tadikaka taihu do ita badu henia to ia lasi. Edena dala ai unai ia karaia? Satani ena tanobada ai momo be idia kara auka bona lalokau idia hahedinaraia lasi. Nega momo ta ta idia trast henia lasi. Satani ia ura ita be unai bamona kara ita hahedinaraia. Ia ura iseda tadikaka taihu bona Iehova ena orea dekenai ita maumau bona iseda tadikaka taihu ita inai henia.—Roma 16:17.

4. Dahaka dainai King Saulo ese Davida ia inai henia? (Laulau herevalaia.)

⁴ Mani King Saulo ena sivarai ita laloa. Matamanai Saulo be Davida ia lalokau henia bona ia be tuari tauna goadana dainai, ia lalonamo henia. (1 Sam. 18:5) To, gabeai Saulo ia itaia taunimanima momo be Davida idia hanamoa neganai, ia mama. Unai dainai Saulo be nega momo dala ia tahua Davida ia hamasea totona. (1 Sam. 18:​9-11) Mani oi laloa, Iehova ena hakaua henunai, Davida be ia horoa vadaeni Israela ena king ai do ia lao totona. (1 Sam. 16:13) To Saulo be Davida dekenai ia badu dikadika bona ia ura Iehova ese ia abia hidi king ia hamasea. Bema Davida ia mase, Satani ena palani do ia guguru bona do ia moale bada.

5. Dahaka dainai Diabolo ia ura tadikaka taihu dekenai ita mama? (Iamesi 3:​14-16)

⁵ Satani ia diba iseda tadikaka taihu ita lalokau henia neganai, Iehova ese ita do ia durua bona hanamoa. (Sal. 133:1) Saulo ese Davida dekenai ia karaia bamona, bema iseda tadikaka taihu dekenai ita mama, Satani be unai dala amo kongrigeisen lalonai lalotamona bona lalokau heheni karana ia hadikaia. (Mar. 12:​30, 31) Bema unai ia vara, Iehova ese iseda tomadiho do ia abia dae, a? Hahediba tauna Iamesi be ita ia sisiba henia, bema iseda tadikaka taihu dekenai ita mama, unai ese dika ia havaraia diba.—Iamesi 3:​14-16 duahia.

6. Ionatana amo dahaka oi dibaia? (Laulau herevalaia.)

⁶ Iseda tadikaka taihu ita lalokau henia neganai idia dekenai do ita mama lasi, to idia ita tura henia namonamo. Saulo ena natuna Ionatana ena haheitalai namona ita laloa. Iena tamana be Davida ia inai henia, to Ionatana be ena turana Davida dekenai ia gwau, ia abia dae momokani Iehova ena ura be do ia guguru. Bona Davida ia hamaoroa: “Oi be Israela ena king ai do oi lao.” Ionatana be ia manau bona ia abia dae Iehova ia ura Davida be king ai do ia lao, unai dainai ia durua.—1 Sam. 23:​16, 17.

7. Satani ese kongrigeisen ai hekwakwanai ia havaraia lasi totona, dahaka ita karaia diba? (Efeso 4:​25-27)

⁷ Satani ese dala ma ta ia gaukaralaia ita bona iseda tadikaka taihu huanai hekwakwanai ia havaraia totona. Iehova ena taunimanima be bese idauidau amo idia mai. Ta ta edia kara bona idia ura henia gaudia be idauidau. Satani ia ura do ita laloa ita be ta ta amo ita idau dainai, ta ta ita tura henia diba lasi. Danu ia ura do ita lalotamona lasi bona ita hepapahuahu. To edena dala ai dala do oi kehoa lasi, Satani ese emu lalokau karana ia hadikaia totona? Bema oi bona tadikaka taihu huanai hekwakwanai ia vara, edia dika oi gwauatao be namo. (Efeso 4:​25-27 duahia.) Namona be emu tadikaka taihu oi lalokau henia. Laloatao, Iehova ena matana ai ita ibounai be mai anina bada, bona ta ta ita durua be namo, tauanina ena kahana ibounai idia gaukara hebou hegeregerena. (1 Kor. 12:12) Iseda tadikaka taihu ibounai be ita ida Satani bona ena demoni ita tuari henia noho.—1 Pet. 5:​8, 9.

8. Bema tadikaka eiava taihu ta ese ena hereva o kara amo ita ia hahisia, dahaka ita karaia be namo?

⁸ Tadikaka eiava taihu ta ese ena hereva o kara amo oi ia hahisia neganai, namona be oi laloatao ia danu be goevadae lasi. Bema haroro gaukara eiava hesiai gaukara ma haida lalonai umui gaukara hebou, edia kerere do oi itaia danu. (Had. 7:20) Unai ia vara neganai, Iehova ena sisiba ita badinaia, ta ta ena kara ita haheaukalaia. Bona ta ese oi ia hahisia neganai, ena dika oi gwauatao haraga. (Kol. 3:​12-14) Tadikaka taihu ida ita noho bona idia ita lalokau henia, badina ita diba Iehova bona Iesu idia ura unai bamona ita karaia.—Ioa. 17:​20, 21.

SATANI ESE DAGEDAGE KARANA AMO ITA IA HAMANOKAIA

9. Edena dala ai Satani ese dagedage karana ia gaukaralaia ita ia koua Iehova ita hesiai henia lasi totona?

⁹ Satani ese dagedage karana ia gaukaralaia ita ia koua Iehova ita hesiai henia lasi totona. Aposetolo Paulo ese Keristani taudia momokanidia ia hamaoroa, idia be dagedage do idia davaria. (2 Tim. 3:12) Taunimanima be maoro lasi ita idia dagedage henia totona. Unai dainai dagedage ita davaria neganai, reana do ita laloa ita idia kara namo henia be namo eiava edia kara dika ena davana idia abia be namo. To unai ita karaia neganai, iseda nega bona goada ia haorea, bona Dirava ese ia henia Basileia ena sivarai namona harorolaia gaukara do ita karaia lasi.—Roma 12:​19-21.

10. Isako be kara gageva ia davaria neganai, dahaka ia karaia?

¹⁰ Aberahamo ena natuna Isako ena haheitalai mani ita laloa. Isako be taga tauna ai ia lao bona ena animal be momo dainai, Filistia taudia be ia dekenai idia mama. Bona idia ese Isako ena ranu guri dekenai tano idia atoa, unai amo ranu ia abia diba lasi. (Gen. 26:​12-18) Isako, ena famili bona animal totona ranu be mai anina bada. Unai dainai Isako be gabu ma ta dekenai ia lao bona ranu guri ma haida ia geia. To Filistia taudia idia gwau, unai ranu guri danu be idia edia. Unai bamona kara gageva dainai Isako ia lalohisihisi diba. To, ia be ena mamoe naria taudia bona Filistia taudia huanai ia vara hepapahuahu ia koua. Dahaka ia karaia? Maino ia noho totona gabu ma ta dekenai ia lao bona Iehova ese ia hanamoa. (Gen. 26:​19-25) Isako hegeregerena, kara gageva ita davaria neganai, do ita manau bona haheauka noho, a?

11. Haida ese Iesu idia kara namo henia lasi neganai, dahaka ia karaia?

¹¹ Lagani handred momo murinai, Iesu, gwauhamata Mesiana unai, be tanobada dekenai ia mai bona hekwakwanai momo ia davaria. Hegeregere, Iesu ena varavara taudia haida idia laloa ia be kavakava. (Mar. 3:21) Tomadiho gunalaia taudia be nega momo Iesu idia koua ia haroro lasi totona. (Luka 11:​15, 16) Bona ena aposetolo tauna ta ia gwau, Iesu ia diba lasi. (Mat. 26:​14-16) Dubu biagudia be gavamani taudia ida idia gaukara hebou Iesu be kara dika tauna bamona idia hamasea totona. (Mar. 15:​1, 13-15) Iesu idia dogoatao neganai, aposetolo Petero ia ura Iesu ia gimaia dainai, hahelaga tauna badana ena hesiai tauna ena taiana ia utua oho. To Iesu be Petero ena dagedage karana dekenai ia lalotamona lasi bona hoa dalanai unai tauna ena taiana ia hanamoa. (Luka 22:​50, 51) Iesu ese ia davaria hekwakwanai ibounai lalonai ia idia dagedage henia taudia edia dika davana ia haloua lasi, bona Iehova ena hesiai gaukara ia atoa guna.

12. Mataio 5:​43, 44 bamona, edena dala ai ita idia dagedage henia taudia ita kara henia diba?

¹² Hari danu, ita davaria hekwakwanai dainai ita lalohisihisi. Satani ia ura ita do ia koua haroro gaukara ita karaia lasi totona. Witnes lasi varavara eiava famili taudia ese ita idia dagedage henia diba. To Iesu ese ita ia hadibaia ita idia dagedage henia taudia ita lalokau henia totona. (Mataio 5:​43, 44 duahia.) Unai ena anina be ita idia dagedage henia taudia ita inai henia lasi. Iesu ena hakaua hereva ita badinaia, bona ita gaukara goada taunimanima ibounai dekenai haheauka ita hahedinaraia, idia ita kara namo henia bona matauraia totona, ena be ita eiava iseda gaukara idia inai henia.—1 Kor. 13:4.

13. Dahaka dainai gavamani ita matauraia ena be ita idia dagedage henia? (Laulau herevalaia.)

¹³ Gavamani taudia ita matauraia danu be namo, ena be idia atoa taravatu ese iseda tomadiho karana ia koua eiava iseda mauri idia ha-aukaia. Dahaka dainai? Badina Dirava ia gwau gavamani taudia ita matauraia be namo. (Roma 13:​1, 2) Reana gavamani ese idia karaia abia hidi kereredia haida be Satani ese ia havaraia lasi. To, Satani ia ura gavamani taudia ita badu henia, unai amo idia ita gwauraia dika. Danu ia moale bema gini siri karana ita hahedinaraia lasi. Tanobada hegegemadai ai, taunimanima be abia hidi haida idia ura henia lasi dainai idia protest. To Keristani taudia be unai bamona do idia karaia lasi. (Aon. 24:​21, 22; Had. 8:​2, 3) Bema politikol karadia dekenai ita vareai, ita be Satani ena ura ita karaia noho.—Ioa. 15:19.

14. Dirava ena taunimanima idia dagedage henia taudia dekenai, dahaka ita laloatao be namo?

¹⁴ Guna Iehova ena Witnes taudia idia dagedage henia taudia haida be gabeai abidadama tadikaka taihu ai idia lao. (1 Tim. 1:​12, 13) Unai dainai “taunimanima ese [ita] idia gwauraia dika, idia dagedage henia bona hereva koikoi idauidau idia gwauraia neganai,” unai ita laloatao. (Mat. 5:11) Gavamani taudia totona ita guriguri noho, unai amo maino ai Iehova do ita tomadiho henia. (1 Tim. 2:​1, 2) Danu oi idia dagedage henia ruma bese taudia, gaukara turadia bona sikuli turadia totona oi guriguri. Iehova oi noia do oi diba dahaka oi karaia edia lalona oi veria totona. Bona oi haheauka! Lagani momo lalonai ena tau ia dagedage henia hahine be gabeai Witnes ai ia lao bona ia gwau, “Ta ia haheauka noho neganai, gau namodia do idia vara.”

15. Edena dala ai iseda nega ita gaukaralaia be namo bona dahaka dainai?

¹⁵ Iehova be ita haheaukalaia hekwakwanai ibounai ia diba. Danu ia diba unai gaudia ita haheaukalaia be mai ena hekwarahi. (Sal. 37:18) Hari idia vara kara gageva ita hamaoromaoroa diba lasi. (Had. 1:15) To, Iehova ese unai gaudia ibounai do ia hanamoa. Ia gwauhamata daudau lasi Satani bona ia idia durua taudia ese idia havaraia dika be ena Basileia ese do ia haorea. (1 Ioa. 3:8; Apok. 21:5) Unai nega ita naria noho lalonai, ita haheauka bona taunimanima ibounai dekenai lalokau ita hahedinaraia noho. Bona iseda nega bona goada ita gaukaralaia, taunimanima momo ita durua Iehova ena turana ai idia lao totona.

TUARI DEKENAI ITA KWALIMU DIBA!

16. Satani bona demoni ita tuari henia karana dekenai ita kwalimu totona, dahaka ese ita do ia durua? (Laulau herevalaia.)

¹⁶ Baibel ese ita ia hadibaia Satani bona demoni ita tuari henia karana dekenai ita kwalimu diba. (Iam. 4:7; 1 Ioa. 5:​4, 5) Bema Iehova bona Iesu dekenai iseda abidadama ita hagoadaia, unai ese ita do ia durua. (Efe. 6:16) Unai dainai idia dekenai iseda abidadama ita hagoadaia noho. Unai amo ita do idia durua iseda tadikaka taihu ita lalokau henia bona idia ida lalotamona ai ita noho.

17. Iseda lalona ita hadaia dahaka ita karaia totona?

¹⁷ Namo lasi dala ita kehoa Satani ia kwalimu totona. Do ia gaukara goada noho ita ia tohoa iseda tadikaka taihu ida ita hepapahuahu bona ita ia hamanokaia totona. Iehova bona Iesu idia gwauhamata, ita do idia durua noho bema idia ita badinaia. Iseda tadikaka bona taihu be ita ida iseda inai tauna badana Satani ita tuari henia noho. Iesu ena sisiba hegeregerena, ita idia dagedage henia taudia ita kara namo henia. (Luka 6:​27, 28) Namona be ita gaukara goada noho, Satani ese ita ia tuari henia totona ia gaukaralaia daladia ita dadaraia, bona ita abia dae ia bona ena demoni ita tuari henia karana dekenai do ita kwalimu!