Cov Keeb Uas Txawj Xeeb Mus Ua Hauj Lwm Hauv Lub Cev

Thaum peb niam xeeb peb rau hauv plab, peb tsuas yog ib lub keeb me me lus Askiv hu ua zygote xwb. Lub keeb no me heev tib neeg qhov muag ntsia tsis pom. Ntau lub hli tom qab ntawd, peb niam mam yug tau peb. Sim xav seb phim hwj npaum li cas, ib lub keeb me me xwb kuj txawj faib thiab hloov mus ua lwm hom keeb tshaj li 200 hom uas nyias txawv nyias, muaj loj muaj me thiab nyias muaj nyias tes hauj lwm.

Xav Txog Qhov No: Lub keeb zygote txawj qog nws li DNA los sis noob ntsha thiab faib ua ob lub. Nws faib li no ntau zaus. Thaum xub thawj tag nrho cov keeb uas faib no yuav sib thooj nkaus thiab cov noob ntsha yuav qhia seb yuav xeeb mus ua hom keeb twg.

Tom qab xeeb tub tau ib lub lim tiam, cov keeb yuav pib faib ua ob hom. Ib hom yuav xeeb mus ua tus me nyuam. Hos ib hom yuav xeeb mus ua lub tsev me nyuam thiab tej hlab nqaij uas yuav yug tus me nyuam kom loj hlob.

Thaum xeeb tub tau peb lub lim tiam lawm, lub keeb me nyuam yuav faib ua peb txheej. Txheej sab nraud yuav xeeb mus ua tej hlab ntsha, paj hlwb, qhov ncauj, tawv nqaij thiab lwm yam. Hos txheej nruab nrab yuav xeeb mus ua ntshav, pob txha, ob lub raum, tej nqaij thiab lwm yam hlab nqaij. Thiab txheej peb xeeb mus ua siab ua ntsws, ua plab ua hnyuv thiab zais zis.

Rau lub caij uas xeeb tub ntawd, cov keeb me nyuam yuav txav chaw ib qho rau ib qho, ib txhia txav ua tsheej pab hos ib txhia tsuas txav nws ib leeg xwb. Dua cov los koom ua ke thiab ua ib daig ib daig los sis kauv ua ib txoj. Yuav kom muaj tau li no cov keeb yuav tsum txawj sib xa xov. Xws li cov keeb uas yuav xeeb mus ua tej leeg ntshav, thaum txog caij cov keeb uas sib txuas ua ib daig yuav kauv ua ib txoj me me. Thiab yuav ua li no tib txhij mus thoob plaws hauv tus me nyuam lub cev. Tej txoj no yuav pib ntev thiab ncau zuj zus mus txog thaum ua tau tej leeg ntshav thoob plaws ib ce.

Thaum yug tau tus me nyuam zoo tes zoo taw, tej plhom plhom keeb yeej xeeb mus ua raug nws hom, nyob raug chaw, thiab raug lub sij hawm lawm tiag.

Koj xav li cas? Puas yog cov keeb txawj xeeb txia mus raug nws hom xwb? Los yog muaj ib tug tsim?