Yexus Yug Thaum Twg?
Phau Vajlugkub qhia li no
Phau Vajlugkub tsis qhia tsi ntsees tias Yexus yug rau hnub twg raws li cov ntawv tshawb fawb hauv qab no:
“Tsis muaj leej twg paub tias Yexus Khetos yug rau thaum twg tiag.”—Phau New Catholic Encyclopedia.
“Yeej tsis muaj leej twg paub tseeb tias Yexus Khetos yug rau hnub twg tiag tiag li.”—Phau Encyclopedia of Early Christianity.
Txawm tias phau Vajlugkub tsis qhia tias Yexus yug thaum twg los, nws kuj hais txog ob yam uas tau muaj tshwm sim rau lub sij hawm thaum yug Yexus uas qhia tau tseeb tias Yexus yeej tsis yog yug rau lub 12 hlis tim 25.
Tsis yog caij ntuj no
Mus rau npe. Tsis ntev ua ntej uas yuav yug Yexus, Xixas Aukatas sam hwm kom “cov pej xeem thoob plaws tej teb chaws uas Loos kav mus rau npe.” Txhua tus nyias yuav tsum tau rov mus rau npe hauv “nyias lub nroog” uas lawv yug. Ces vim li no, ib txhia thiaj yuav tau mus ob peb hnub ke los sis ntev tshaj ntawd thiaj li mus txog. (Lukas 2:1-3) Tej zaum Xixas sam hwm kom ua li no vim nws xav paub seb yuav sau se li cas thiab xav paub seb cov neeg ua tau tub rog muaj coob npaum li cas. Txawm yuav yog lub caij twg los xij, cov pej xeem yeej tsis xav tham txog ob lub ntsiab no li. Yog li ntawd, Xixas yeej yuav tsis lam tau lam yuam kom nws cov pej xeem mus kev deb deb rau lub caij ntuj no.
Cov yaj. Nyob rau thaj tsam ntawd, cov neeg yug yaj tseem “pw zov yaj tom teb, thaum tsaus ntuj.” (Lukas 2:8) Phau ntawv ua lus Askiv hu Daily Life in the Time of Jesus qhia tias cov yaj tseem nyob tom tej teb rau “lub lim tiam ua ntej hnub ua kev cai Hla Dhau [lub Peb Hlis xaus]” mus txog ntua lub 11 hlis ntuj nra. Phau ntawv hais ntxiv tias: “Thaum txog caij ntuj no, lawv rov los nyob hauv tsev tag lawm. Yog li ntawd, hnub uas Yexus yug yuav tsis yog yug rau lub caij ntuj no uas lawv muab teem los ua lub koob tsheej Khixamav (Christmas). Rau qhov phau Vajlugkub hais tias thaum ntawd, cov neeg yug yaj tseem zov yaj tom teb.”
Caij nplooj zeeg
Peb pom tau tias Yexus yug rau lub caij twg thaum peb muab xam raws li hais no. Yexus tuag rau hnub Ua Kev Cai Hla Dhau, lub hli Nixam 14 thaum nplooj ntoos hlav nyob rau xyoo 33 TQY. (Yauhas 19:14-16) Thaum Yexus muaj 30 xyoo nws pib mus tshaj tawm txoj xov zoo. Nws tshaj tawm tau 3 lub xyoos thiab ib nrab xyoo. Lub caij nplooj ntoos hlav yog lub 4 hlis ntuj. Thaum suav 6 lub hlis rov qab ntawm lub 4 hlis ntuj ces los poob rau lub 10 hli ntuj uas yog lub caij nplooj zeeg. Yog li ntawd, qhov no qhia tias Yexus yug rau thaum lub caij ntuj nplooj zeeg lub xyoo 2.—Lukas 3:23.
Vim li cas ho ua lub koob tsheej Khixamav rau lub 12 hlis tim 25?
Twb tsis muaj pov thawj qhov twg qhia tias Yexus Khetos yug rau lub 12 hlis tim 25, ua cas neeg ho ua lub koob tsheej Khixamav rau hnub ntawd? Phau Encyclopædia Britannica hais tias tej zaum cov thawj coj hauv tej tshawj xaiv hnub ntawd kom “phim hnub uas cov neeg Loos ua lawv lub koom tsheej uas lawv ntseeg tias hnub ntawd yog ‘hnub uas thaum yug lub hnub.’” Rau qhov lub caij ntuj no yog lub caij uas lub hnub tawm tuaj luv tshaj. Raws li phau Encyclopedia Americana, coob tus tshawb fawb ntseeg tias qhov uas lawv muab ua li no yog “kom cov uas nyuam qhuav los ntseeg thiaj li saib txoj kev uas ntseeg Yexus rau nqi.”