Cob Lub Siab Kom Paub Cais Qhov Zoo Qhov Phem

1-2. (1) Yehauvas tau muab dab tsi rau Adas thiab Evas nkawd? (2) Yog nkawd ris Yehauvas txiaj ntsig ces nkawd yuav ua li cas xwb?

TIB NEEG tsis zoo yam li tej tsiaj txhu thiab tej tshuab loj loj vim lawv muaj kev ywj pheej ua ub ua no. Nyob hauv phau Vajlugkub qhia tias thawj tug txiv neej uas Vajtswv tsim kuj muaj yam ntxwv ib yam li Vajtswv. (Chivkeeb 1:26, 27) Yehauvas tsim kom Adas thiab Evas nkawd txawj txiav txim siab ua ub ua no.

² Yehauvas tsis tau tsa kev cai ntau ntau rau Adas thiab Evas nkawd coj tiam sis nws tsuas hais kom nkawd tu lub ntiaj teb, yug me tub me nyuam, thiab saib taus nws ua tus tswj hwm nkawd. (Chivkeeb 1:28; 2:16, 17) Yog Adas thiab Evas nkawd ris txiaj ntsig tias Yehauvas muab txoj kev ywj pheej rau nkawd ces nkawd yeej yuav txaus siab hlo ua raws li nws hais.​—Pajlug 23:15.

3. Adas thiab Evas nkawd saib nkawd txoj kev ywj pheej li cas?

³ Nyob hauv phau Vajlugkub hais tias Adas thiab Evas nkawd tsis saib nkawd txoj kev ywj pheej rau nqi, nkawd thiaj li txiav txim siab tsis mloog Yehauvas lus. Tos nkawd ua li no los nkawd tsuas xam pom nkawd tus kheej xwb, nkawd tsis hlub thiab tsis ris Yehauvas txiaj ntsig. (Chivkeeb 3:1-7) Nkawd tej kev txiav txim siab haj tseem poob nroos los txog rau peb niaj hnub nim no.​—Loos 5:12.

4. (1) Raws li Kalatias 6:5, peb txhua tus yuav tsum tau ua dab tsi? (2) Yehauvas kuj muab dab tsi ntxiv los pab peb?

⁴ Niaj hnub nim no peb lub neej nyuaj kawg nkaus li vim peb yuav tau txiav txim siab ua ub ua no txhua hnub. (Nyeem Kalatias 6:5.) Muaj tej co kev txiav txim siab kuj tsis nyuaj ua luaj twg tiam sis muaj tej qhov mas ntxhov siab txoog xwb. Yog li ntawd, peb yuav ua li cas peb thiaj txiav txim siab tau haum Yehauvas siab? Qhov ua ntej tshaj mas yog peb yuav tau lees hlo hais tias peb xav tau Yehauvas txoj kev pab. (Pajlug 16:3; Yelemis 10:23) Txawm Yexus tsis muaj ib qho kev txhaum li los nws haj tseem xam pom tias nws yuav tsum tau muaj Yehauvas pab nws. (Henplais 5:7) Yog li ntawd peb yog noob txaug neeg txhaum xwb ces peb yim huab yuav tsum tau Yehauvas txoj kev pab. Txuas ntxiv no cia peb ho mus tham txog ib yam uas Yehauvas tau muab rau peb uas yog lub siab uas paub cais qhov zoo qhov phem.

PAUB CAIS QHOV ZOO QHOV PHEM

5. (1) Lub siab uas paub cais qhov zoo qhov phem yog dab tsi tiag? (2) Lub siab uas paub cais qhov zoo qhov phem ho pab tau peb li cas? (Loos 2:14, 15)

⁵ Vajtswv tsim peb kom muaj lub siab uas paub cais qhov zoo qhov phem. Txawm tus uas tsis tau paub Vajtswv los nws yeej muaj lub siab uas paub cais qhov zoo qhov phem tib yam nkaus. (2 Kauleethaus 4:2) Peb lub siab ntawd qhia rau peb tias peb ua zoo los sis ua phem. (Nyeem Loos 2:14, 15.) Thaum peb yuav ua tej yam tsis zoo ces peb lub siab ntawd yeej ceeb toom peb ua ntej lawm. (1 Xamuyees 26:8-11) Tsis tas li ntawd, lub siab no kuj txhob kom peb ua zoo. Qhov uas peb muaj kev ywj pheej tsis tau qhia tias peb yuav txiav txim tau haum Yehauvas siab, yog li ntawd peb yuav tsum muaj lub siab uas paub cais qhov zoo qhov phem los pab peb thiab.

6. Yog peb tsis tu lub siab uas paub cais qhov zoo qhov phem ces yuav muaj li cas xwb?

⁶ Vim peb yog noob txaug neeg txhaum ces peb lub siab uas paub cais qhov zoo qhov phem ntawd txawj npub ib yam li tej riam. Qhov uas ua rau kom npub ntawd yog nyob ntawm seb koj tsev neeg cob qhia li cas, koj haiv neeg coj li cas, thiab tej uas koj lub siab ntshaw yog li cas. Nyob hauv phau Vajlugkub hais tias lub siab uas paub cais qhov zoo qhov phem txawj nrwb, “qias,” “loog tas ib yam li xuas hlau hlawv” los sis tsis paub cais qhov phem. (1 Kauleethaus 8:12; Titus 1:15; 1 Timautes 4:2; Henplais 10:22) Thaum zoo li no ces yuav pab tsis tau peb txiav txim siab ua qhov zoo. Yog li ntawd, peb yuav tau tu peb lub siab uas paub cais qhov zoo qhov phem ntawd ntshuj qas ntshis xwv thiaj pab tau peb. (1 Petus 3:16) Peb yuav ua li cas thiaj paub tu?

YUAV COB LI CAS THIAJ TAU?

7-8. (1) Peb yuav tau ua dab tsi thiaj cob tau lub siab uas paub cais qhov zoo qhov phem? (2) Piav seb phau Vajlugkub tej hauv paus ntsiab lus pab tau peb li cas. (Saib daim duab.)

⁷ Yuav kom peb cob tau lub siab uas paub cais qhov zoo qhov phem, peb yuav tau nyeem phau Vajlugkub tsis tu ncua thiab kawm seb Yehauvas hais tias qhov twg phem qhov twg zoo. Tsis tas li ntawd, peb yuav tau kawm kom paub Yehauvas tej kev cai zoo zoo xwv peb thiaj paub tias nws txoj kev xav yog li cas rau li cas. Kev cai tsuas hais tau ntiav ntiav xwb ces peb kuj yuav tau nrhiav tej hauv paus ntsiab lus vim yuav hais tau tob tob kom peb thiaj li huab yam paub seb Yehauvas xav li cas.​—Yaxayas 55:9.

⁸ Peb ua neej nyob ces muab piv zoo nkaus li peb tab tom taug kev rau ntawm ib qho tiaj nrag uas tsis muaj kev los sis cov phiaj qhia kev. Tej zaud peb kuj yuav saib hnub saib hli los qhia seb peb yuav mus rau ces twg. Tiam sis yog peb muaj ib daim ntawv qhia kev mas haj tseem yuav pab tau peb zoo dua rau qhov yuav muaj tej roob thiab tej dej kos rau hauv qhia peb seb yuav mus rau seem twg thiaj tsis yuam kev. Ces zoo ib yam li ntawd, peb ua neej nyob yog los mus ua kom haum Yehauvas siab. Phau Vajlugkub piv txwv li daim ntawv qhia kev uas yuav pab taw seb qhov twg thiaj yog. Hos phau Vajlugkub tej hauv paus ntsiab lus piv ib yam li tej roob tej hav uas qhia tias peb mus yog kev lawm. Yog peb ua neej raws li tej hauv paus ntsiab lus hauv phau Vajlugkub ces peb yeej yuav ua tau rau Yehauvas zoo siab.

9. Muaj dab tsi ntxiv uas yuav pab tau kom peb cob qhia lub siab uas paub cais qhov zoo qhov phem? (Loos 9:1)

⁹ Yuav kom peb cob tau lub siab uas paub cais qhov zoo qhov phem, peb yuav tsum muaj Vajtswv lub hwj huam dawb huv pab peb. (Nyeem Loos 9:1.) Lub hwj huam dawb huv no yuav pab kom peb nkag siab seb Vajtswv xav li cas txog tej ub tej no thiab kuj txhawb kom peb muaj lub siab ua li Yehauvas lub siab nyiam. (Filipis 2:13) Yog li ntawd, peb yuav ua li cas peb thiaj li tau Yehauvas lub hwj huam dawb huv?

10. Yuav ua li cas peb thiaj li tau lub hwj huam dawb huv los pab peb? (Lukas 11:10, 13)

¹⁰ Thov Yehauvas kom nws pub lub hwj huam dawb huv. (Nyeem Lukas 11:10, 13.) Cia li tso siab plhuav tias Yehauvas yeej yuav muab lub hwj huam dawb huv los pab peb. (Yauhas 3:34) Nws yeej txaus siab hlo muab dawb paug rau tus uas mloog nws lus. (Pajlug 1:23; Yakaunpaus 1:5) Tiam sis tseem tshuav dab tsi ntxiv thiab, uas yuav pab cob qhia lub siab uas paub cais qhov zoo qhov phem?

11. (1) Peb yuav tau nco ntsoov li cas thaum peb txiav txim siab ua ub ua no? (2) Vim li cas peb yuav tau saib kom peb lub siab paub cais qhov zoo qhov phem?

¹¹ Tshuaj ntshis kom haum Yehauvas siab. (Pajlug 8:34, 35) Yog peb nco ntsoov li no thaum peb txiav txim siab ua ub ua no hauv peb lub neej ces yuav cob qhia tau peb lub siab kom paub cais qhov zoo qhov phem. Yog peb cob tau peb lub siab zoo zoo lawm ces peb yuav paub Yehauvas tej kev xav thiab txawj ntshai nyob tsam nws tu siab. Yeej tsim nyog rau peb cob peb lub siab kom zoo zoo vim peb nyob rau ib lub caij uas muaj kev nyuaj siab heev uas tej thaud peb yuav raug tej yam uas tsis hais muaj nyob hauv phau Vajlugkub. Xws li thaum peb so los sis muaj sij hawm, peb yuav tau txiav txim siab seb peb yuav tau mloog los sis saib dab tsi, peb yuav xaiv tej hauj lwm los sis tej kev kawm ntawv qeb siab zoo li cas los sis peb yuav mus poo tej tib neeg zoo li cas. Yuav ua li cas peb thiaj paub tias Yehauvas txaus siab rau tej yam uas peb tab tom txiav txim siab ua?​—2 Kauleethaus 1:12.

12. Yuav ua li cas peb thiaj paub tias peb lub siab paub cais qhov zoo qhov phem lawm? (Efexaus 5:10)

¹² Zaum tsaws xav txog tej lus koj nyeem hauv Vajtswv Txoj Lus. (Phau Ntawv Nkauj 49:3) Thaum koj nyeem phau Vajlugkub, nrhiav tej hauv paus ntsiab lus uas pab koj nkag siab Yehauvas txoj kev xav. (Nyeem Efexaus 5:10.) Peb ua neej nyob peb yuav ntsib ntau yam hauv peb lub neej, yog tias peb nco ntsoov nrhiav phau Vajlugkub tej hauv paus ntsiab lus los pab peb ces peb yuav txawj txiav txim siab ua tau qhov zoo qhov yog. (Pajlug 2:4-9, 11-13) Tej hauv paus ntsiab lus yuav pab kom peb txawj kho peb lub siab uas paub cais qhov zoo qhov phem xwv peb thiaj ua tau haum Yehauvas siab.​—Henplais 5:14.

13. Piav seb peb yuav tsum zam dab tsi.

¹³ Tsis txhob txiav txim siab ua ntej es mam li mus tshawb nrhiav phau Vajlugkub tej hauv paus ntsiab lus los txhawb nqa koj txoj kev txiav txim siab. Cia peb tsis txhob yoog raws li cov Ixayees uas pheej tseem nyob hauv lub teb chaws Yudas tab txawm lub nroog Yeluxalees twb raug puas tsuaj xyoo 607 ua ntej Yexus. Lawv twb txiav txim siab tias lawv yuav nyob ntawm lub teb chaws ntawd lawm los lawv ua txuj hais rau Yelemis tias: “Koj thov [Yehauvas] uas yog peb tus Vajtswv qhia rau peb saib peb yuav mus qhov twg thiab peb yuav ua li cas.” (Yelemis 42:3-6) Thaum Yehauvas txiav txim siab tau tsis haum lawv siab ces lawv ua li lawv twb npaj siab ua lawm xwb. Vim lawv coj li no muaj ntau yam xwm thiaj los raug rau lawv. (Yelemis 42:19-22; 43:1, 2, 4) Yog li ntawd ua ntej peb yuav txiav txim siab ua ib yam dab tsi, peb yuav tsum xub nrhiav tej hauv paus ntsiab lus hauv phau Vajlugkub ces ua raws li tej peb tshawb tau.

14. Vim li cas peb ho yuav tau siv phau Vajlugkub tej hauv paus ntsiab lus los pab peb txiav txim siab ua ub ua no?

¹⁴ Txiav txim siab raws li phau Vajlugkub tej hauv paus ntsiab lus. (Mathais 7:24-29; Yakaunpaus 1:23-25) Thaum peb txiav txim siab raws li phau Vajlugkub tej hauv paus ntsiab lus twb yog peb cia lub hwj huam dawb huv pab peb. Tsis tas li ntawd, Yehauvas haj tseem yuav yim huab muab nws lub hwj huam dawb huv pab peb ntxiv. (Tes Hauj Lwm 5:32) Yog tias peb tsis cia Yehauvas lub hwj huam dawb huv pab peb ces twb yog peb “cheem” tsis pub kom pab peb xwb. (Efexaus 4:30; Yaxayas 63:10; Tes Hauj Lwm 7:51) Thaum zoo li no Yehauvas kuj tseg tsis muab nws lub hwj huam los pab peb. (Phau Ntawv Nkauj 51:11; 1 Thexalaunikas 5:19) Ntxiv ntawd tsis yog ib yam zoo vim peb yuav tsum muaj lub hwj huam dawb huv los tsav kom peb muaj dag muaj zog.​—Efexaus 3:16.

NRHIAV PHAU VAJLUGKUB TEJ HAUV PAUS NTSIAB LUS

15-16. (1) Yuav ua li cas thiaj paub nrhiav phau Vajlugkub tej hauv paus ntsiab lus? (2) Tej hauv paus ntsiab lus twg yuav pab tau kom tus kawm Vajlugkub tsis txhob haus luam yeeb ntxiv lawm?

¹⁵ Nco ntsoov siv tej twj los tshawb nrhiav. Peb yuav tau paub mus tshawb nrhiav tej hauv paus ntsiab lus seb nyob qhov twg hauv phau Vajlugkub xwv peb thiaj paub muab coj los siv rau hauv peb lub neej. Xws li koj muaj ib tug uas koj mus qhia Vajlugkub rau tsis kam thum luam yeeb thiab nws hais tias: ‘Twb tsis muaj hais txog haus luam yeeb hauv phau Vajlugkub es ua li cas ho hais tias txhaum?’ Yuav ua li cas koj thiaj pab tau kom nws txawj tshawb nrhiav tau tej hauv paus ntsiab lus los mus pab nws? Qhia kom nws mus rau Phau Tsom Faj Lub Vej Xaij Tshawb Nrhiav Vajlugkub. Qhia kom nws ntaus lub npe “haus luam yeeb” ces nias tshawb nrhiav ces tom qab ntawd mam tawm ib co ntaub ntawv tuaj. Nws yuav pom ib lub ntsiab lus hu ua “Haus Luam Yeeb Puas Txhaum?” ces nias ntawm lub ntsiab lus ntawd ces mam mus nyeem.

¹⁶ Ces nws yuav pom peb lub hauv paus ntsiab lus. (1) Peb yuav tau txuag txoj sia vim yog Vajtswv pub. (Tes Hauj Lwm 17:24, 25) (2) Peb yuav tsum tsis txhob ua rau lwm tus xeeb mob. (Mathais 22:39) (3) Peb yuav tau tseg tej yam uas yuav ua rau peb lub cev muaj mob los sis qias vuab tsuab. (Loos 12:1; 2 Kauleethaus 7:1) Txawm tias tsis muaj lo lus luam yeeb hais nyob rau hauv phau Vajlugkub los yog nws mus saib tej hauv paus ntsiab lus ces nws yuav paub tias Yehauvas xav li cas txog kev haus luam yeeb.

17. Piav seb yog ib khub txij nkawm xav npaj nkawd rooj tshoob, nkawd yuav tau ua li cas thiaj nrhiav tau phau Vajlugkub tej hauv paus ntsiab lus los mus pab nkawd.

¹⁷ Yuav ua li cas ib khub uas xav sib yuav thiaj txawj nrhiav phau Vajlugkub tej hauv paus ntsiab lus pab nkawd npaj nkawd rooj tshoob? Nkawd kuj mus saib Phau Tsom Faj Lub Vej Xaij Tshawb Nrhiav Vajlugkub. Ces ntaus lub npe “tshoob” ces nias tshawb nrhiav ces tom qab ntawd mam tawm ib co ntaub ntawv tuaj. Ces yog nkawd mus nyeem ces nkawd yuav pom phau Vajlugkub tej hauv paus ntsiab lus tshwm rau hauv. Xws li rau lub hauv paus ntsiab lus no. (1) Ua zoo tshuaj kom rooj tshoob ua rau Yehauvas tau ntsej muag. (1 Kauleethaus 10:31, 32) (2) Hnav tsoos tsho kom raug ntsej muag. (1 Timautes 2:9; 1 Petus 3:3, 4) (3) Txhob ua tshoob kom nchuav lug. (Yauhas 17:14; Yakaunpaus 1:27; 1 Yauhas 2:15, 16) (4) Ua tib zoo npaj kom zoo zoo. (1 Kauleethaus 14:40) (5) Tsis txhob noj tsau haus qaug qw ua nqaj ua nqug. (Kalatias 5:21) (6) Yuav tau npaj ib tug kwv tij uas paub tab los mus ua tus saib xyuas rooj tshoob.​—Yauhas 2:8, 9.

18-19. (1) Kuj muaj ib yam twj twg pab tau peb thiab? (2) Yog koj xav paub seb puas zoo rau koj ua koob tsheej, koj yuav siv qhov twj no li cas thiaj nrhiav tau phau Vajlugkub tej hauv paus ntsiab lus los mus pab koj txiav txim siab? (Saib lub ntsiab “Koj Puas Nrhiav Tau Tej Hauv Paus Ntsiab Lus?”)

¹⁸ Muaj dua ib yam ntxiv uas yuav pab tau peb paub phau Vajlugkub tej hauv paus ntsiab lus yog phau ntawv Tej Nqe Vajlugkub Uas Pab Cov Khixatias. Phau no muaj ntau lub ntsiab thiab nyob rau ntawm cov ntsiab ntawd kuj muaj ntau nqe Vajlugkub los txhawb lub ntsiab. Thaum koj xaiv tau ib lub ntsiab twg tas, koj yuav pom ib co lus nug ces nyob hauv qab qhov lus nug yuav muaj ib co nqe Vajlugkub los teb qhov lus nug ntawd. Xws li tej zaud muaj ib tug Khixatias xav paub txog seb nws puas mus koom tau ib qho koob tsheej. Ces nws yuav tau mus rau ntawm lub ntsiab “Koob Tsheej.” Tom qab ntawd mam mus rau lub ntsiab “Tej koob tsheej uas cov Khixatias tsis koom.”

¹⁹ Txuas ntxiv ntawd koj yuav pom lo lus nug tias: “Vim li cas ho txhaum rau peb mus koom tej koob tsheej uas txuam nrog kev ntseeg cuav? (1 Kauleethaus 10:21; 2 Kauleethaus 6:14-18; Efexaus 5:10, 11).” Ntxiv ntawd yuav muaj ob qho piv txwv los qhia txog tej koob tsheej uas tsis zoo rau peb mus koom. Ces kuj muaj dua ib lub ntsiab ntxiv hu ua “Tej koob tsheej qhuas lub teb lub chaw” uas muaj hauv paus ntsiab lus los mus qhia seb puas zoo rau ib tug Khixatias mus koom thaum tib neeg ua lawv tej koob tsheej txog teb chaws, txog tej tsov rog uas lawv ntaus yeej los sis ua kab lig kev cai nco txog ib tug nom twg. Peb ua tsaug kawg li uas Yehauvas lub koom haum npaj tej twj li no los mus pab kom peb cob qhia tau peb lub siab kom paub cais qhov zoo qhov phem!

SAIB NTSHIS KOM KOJ LUB SIAB PAUB CAIS QHOV ZOO QHOV PHEM

20. Ua li cas peb thiaj paub tias peb cob qhia tau peb lub siab kom paub cais qhov zoo qhov phem?

²⁰ Peb ris txiaj ntsig kawg li uas peb muaj kev ywj pheej tiam sis peb yuav tau nco ntsoov cob qhia lub siab uas paub cais qhov zoo qhov phem xwv peb thiaj li txiav txim siab tau raws li Yehauvas lub siab nyiam. Yuav kom peb txawj cob qhia peb lub siab mas peb yuav tsum muaj Yehauvas lub hwj huam dawb huv pab peb, nco ntsoov thov Yehauvas peb thiaj tau, cia lub hwj huam coj peb, thiab siv phau Vajlugkub tej hauv paus ntsiab lus. Yog peb ua zoo siv tej uas Yehauvas muab pub rau peb ces peb yuav pom tau tias Yehauvas Txoj Lus pab tau peb lub neej lawm ntau heev.​—2 Timautes 3:16, 17; Henplais 4:12.