Koj Puas Nco Qab?
Tej Phau Tsom Faj xyoo no koj puas tau nyeem txhua phau tib si? Nyeem mus seb koj teb puas tau cov lus nug nram qab no:
Vim li cas peb ho xav qhuas Yehauvas?
Vim peb xav hwm Yehauvas, hlub nws, thiab xav kom lwm tus paub txog nws.—w25.01, sab 3.
Thaum ib tug twg ua siab ua qis rau peb, yuav ua li cas peb thiaj tsis khaws chim?
Peb tsis txhob muab uv cia tiam sis peb yuav tau muab kev cib nyeej thiab kev npau taws tso tseg. Yog peb ua li no ces peb yuav tsis chim tas li.—w25.02, sab 15-16.
Vim li cas Malakaus ho tso tau ib tug yam ntxwv zoo rau cov tub hluas xyaum?
Malakaus txaus siab hlo ua tes hauj lwm uas muab tso rau nws ua. Txawm muaj ib zaug nws tu siab los nws tsis cia qhov ntawd tav nws txoj hauv kev. Ib qho uas kuj pab tau nws yog nws nrog Povlauj thiab cov uas paub tab sib raug zoo.—w25.04, sab 27.
Yexus tus nru lus yog li cas tiag thaum nws thov tias: “Kuv twb qhia koj lub npe rau lawv paub lawm”? (Yauhas 17:26)
Yexus cov thwj tim twb paub Vajtswv lub npe lawm tiam sis Yexus xav pab kom nws cov thwj tim paub Yehauvas tshaj qhov qub, paub Yehauvas lub ntsiab rau lub ntiaj teb thiab tib neeg, Yehauvas tau ua dab tsi, Yehauvas tseem yuav ua dab tsi, thiab Yehauvas tus xeeb ceem zoo li cas.—w25.05, sab 20-21.
Yog peb txo hwj chim peb yuav xam pom li cas?
Peb yuav xam pom tias peb tsis paub txhua yam. Xws li peb tsis paub thaum twg lub sim ceeb no mam kawg, tag kis yuav zoo li cas, thiab Yehauvas paub peb zoo npaum li cas.—w25.06, sab 15-18.
Thaum peb nyeem ib zaj kawm los sis mloog ib zaj lus qhia, yuav ua li cas thiaj pab tau peb?
Peb yuav tau tshuaj peb tus kheej li no tias: ‘Muaj pov thawj li cas qhia rau sawv daws? Puas muaj ib zaj piv txwv uas kuv kawm tau coj mus qhia lwm tus? Leej twg thiaj nyiam mloog lub ntsiab ntawd?’—w25.07, sab 19.
Peb khaws tau li cas los ntawm qhov uas Vajtswv zam Daviv lub txim?
Txawm Daviv tau ua txhaum loj los thaum nws hloov dua siab tshiab Yehauvas zam nws lub txim. (1 Vajntxwv 9:4, 5) Thaum Vajtswv zam ib tug twg lawm nws tsis suav txim rau tus ntawd ntxiv thiab tsis rov rhaub qub zaub.—w25.08, sab 17.
Thaum tus kawm Vajlugkub tsis nkag siab ib yam twg koj yuav ua li cas?
Yog nws tsis nkag siab tshab tshab txog ib yam twg no los kawm txuas ntxiv mus es lwm hnub mam rov qab los tham dua.—w25.09, sab 24.
Phau Vajlugkub hais tias kev txhaum dag ntxias heev es ho ntxias li cas? (Henplais 3:13)
Kev txhaum ntxias kom peb ua tej yam yuav kev thiab ua rau peb pheej ua xyem xyav tias xyov Vajtswv puas hlub peb.—w25.10, sab 16.
Peb yam twg pab tau kom peb tej lus thov muaj kuab?
(1) Yog xav txog Yehauvas seb nws zoo li cas. (2) Xav seb koj yuav hais li cas koj thiaj zam tau lwm tus. (3) Lauj sij hawm thov Vajtswv xwv peb thiaj hais tau tej yam nyob nraim nkoos hauv peb nruab siab.—w25.10, sab 19-20.
Yuav ua li cas peb thiaj pab tau cov laus?
Peb kuj mus xyuas tau lawv, hu xov tooj, nrog lawv mus saib kws tshuaj, thiab nrog lawv mus tshaj tawm txoj xov zoo.—w25.11, sab 6-7.
Yuav ua li cas thiaj ua tau ib lub tshoob ua rau Yehauvas tau ntsej muag?
Coj raws li nom tswv tej kev cai, ua raws li lub hwj huam coj, hnav tej tsoos tsho kom raug ntsej muag, txhob coj tej kev cai uas hla Vajtswv Txoj Lus, thiab thaum npaj rooj tshoob los qhia tshab tshab rau cov uas pab koj paub.—w25.12, sab 21-24.