Ob Tug Tshiab Ntawm Pab Uas Ntaus Thawj

THAUM lub 10 Hli tim 5 xyoo 2024, lub rooj sib txoos txwm xyoo tshaj tawm tias tau xaiv Kwv Tij Ntsaudim Ntsedalis thiab Ntsekam Leej nkawd los ua ob tug ntawm Pab Uas Ntaus Thawj tshiab. Nkawv ob leeg yeej kub siab lug teev tiam Yehauvas tau ntau xyoo los lawm.

Kwv Tij Ntsedalis yug hauv lub xeev Mixulis (Missouri) hauv teb chaws Yunaithim Xatej (United States) thiab nws niam nws txiv tu nws loj hlob los paub Yehauvas. Lawv tsev neeg nyob rau tej thaj chaw uas tsis muaj Yehauvas Cov Tim Khawv coob pes tsawg. Vim li ntawd nws thiaj tau ntsib cov kwv tij nkauj muam uas tuaj qhov txhia qhov chaw tuaj tshaj tawm hauv lawv lub zos. Lawv txoj kev hlub thiab qhov uas sawv daws sib koom siab txhawb tau Kwv Tij Ntsedalis heev. Nws ua kev cai raus dej rau lub 10 Hli tim 15 xyoo 1983 thaum nws haj tseem hluas. Nws nyiam mus tshaj tawm txoj xov zoo kawg li thiab tom qab nws kawm ntawv tiav nws txawm rau npe ua ib tug thov kev rau thaum lub 9 Hlis xyoo 1989.

Thaum Kwv Tij Ntsedalis tseem hluas, nws niam thiab nws txiv nkawd kheev kheev coj nws thiab nws tus muam nkawd mus saib Npe-ee. Qhov no pab tau kom nkawd ob tug me nyuam muaj lub zeem muag mus ua hauj lwm nyob rau hauv Npe-ee. Thaum nkawd loj hlob, nkawd kuj mus ua li nkawd npaj siab tseg. Kwv Tij Ntsedalis tau mus ua hauj lwm hauv Vakhiaj (Wallkill) thaum lub 9 Hlis xyoo 1990. Thawj txog hauj lwm yog nws ua rau hauv chav tu vaj tu tsev thiab tom qab no nws kuj mus ua rau chav saib xyuas kev kho mob.

Thaum tib lub sij hawm ntawd, cov koom txoos uas hais lus Xapee nyob ze ntawm nws nyob ntawd huam vam zuj zus tuaj thiab lawv xav tau cov kwv tij los mus saib xyuas cov koom txoos no. Yog li ntawd, Kwv Tij Ntsedalis thiaj li mus pab ib lub koom txoos thiab xyaum hais lus Xapee. Tsis ntev tom qab ntawd, nws thiaj li ntsib Damelis (Damaris) uas yog ib tug tho kev. Ntev mus ntev tuaj nkawd txawm sib yuav thiab nws tus poj niam kuj tuaj ua hauj lwm hauv Npe-ee lawm.

Xyoo 2005, nkawd tawm hauv Npe-ee mus tu niam pog thiab niam tais yawm txiv. Nyob rau ncua sij hawm uas nkawd tu cov laus, nkawd kuj tho kev thiab. Kwv Tij Ntsedalis kuj muaj lub cij fim los mus qhia txoj Kev Kawm Rau Cov Tho Kev. Ntxiv ntawd, nws kuj yog ib tug ntawm pab kwv tij sawv cev kev kho mob thiab Pab Uas Saib Xyuas Kev Tsa Vaj Tse.

Nyob rau xyoo 2013, Kwv Tij Ntsedalis thiab nws poj niam kuj rov qab mus ua hauj lwm rau Npe-ee thaum lawv tsa vaj tsa tsev hauv Vaviv (Warwick). Nkawd kuj tau mus ua hauj lwm hauv Padawxoos (Patterson) thiab Vakhiaj. Kwv Tij Ntsedalis ua hauj lwm hauv Chav Tsim Tsa Thiab Kho Tsev thiab Chav Qhia Txog Kev Kho Mob. Thaum lub 3 Hlis xyoo 2023, nws ua ib tug pab cuam rau Rooj Saib Xyuas Kev Tshaj Tawm. Thaum nws rov qab xav txog tej hauj lwm nws tau ua, nws hais tias: “Thaum yus nyuam qhuav tau txais ib txog hauj lwm tshiab mas yeej ua rau yus txhawj thiab ntshai heev. Thaum zoo li no ces yus yuav tau nco ntsoov tso siab rau Yehauvas vim Yehauvas yog tus xav kom peb ua tau yam twg ces peb ua tau yam ntawd.”

Kwv Tij Leej yug rau hauv teb chaws Yunaithim Xatej ntawm lub xeev Kalifaunias (California). Thaum nws tseem yau, nws niam tseg tsis mus kev sib txoos thiab tsis mus tshaj tawm. Tiam sis nws niam kuj qhia kom nws paub Vajtswv Txoj Lus. Txhua txhua xyoo nws kuj mus saib nws pog uas haj tseem kub siab lug teev tiam Yehauvas. Nws pog kuj pab kom nws xav paub ntxiv txog phau Vajlugkub ces thaum nws muaj 13 xyoos, nws thiaj li xav tau ib tug qhia Vajlugkub rau nws. Thaum lub 9 Hlis tim 27 xyoo 1992, nws txawm ua kev cai raus dej thaum nws haj tseem yog ib tug hluas. Nws niam kuj rov qab tuaj kev sib txoos thiab mus tshaj tawm dua. Ces tag nrho nws txiv thiab lawv tsev neeg kuj ua kev cai raus dej lawm thiab.

Thaum Kwv Tij Leej tseem hluas, nws pom tias cov tho kev muaj kev zoo siab kawg li. Tom qab nws kawm ntawv tag, nws thiaj li pib ua ib tug tho kev thaum lub 9 Hlis xyoo 1995. Xyoo 2000, nws txawm tsiv mus nyob rau teb chaws Ekadaus (Ecuador) mus pab rau thaj tsam uas tsis muaj cov Tim Khawv coob pes tsawg. Nws txawm ntsib ib tug tho kev uas tuaj teb chaws Kanada (Canada) tuaj npe hu ua Eenkas (Inga) thiab ntev mus ntev tuaj nkawd kuj sib sau ua neej lawm. Nkawd ob niam txiv kuj mus pab ib pawg hauv ib lub zos. Tam sim no nyob rau hauv lub zos ntawd muaj ib lub koom txoos.

Ntev mus ntev tuaj nkawd kuj ua ib tug tho kev tshwj xeeb thiab tom qab ntawd kuj tau mus ua ib tug saib xyuas thaj tsam. Nyob rau xyoo 2011, nkawd kuj tau mus kawm Kile-a pab 132. Tom qab nkawd kawm tiav, nkawd mus pab rau ntau lub teb chaws thiab tau txais ntau tes hauj lwm xws li Npe-ee, ua ob tug tub txib tshaj tawm txawv teb chaws, thiab saib xyuas thaj tsam. Kwv Tij Leej kuj tau qhia rau txoj Kev Kawm Rau Cov Qhia Lub Nceeg Vaj.

Vim muaj tus kab mob Khaus Viv-19 (COVID-19), nkawd ob niam txiv yuav tau rov qab los rau teb chaws Yunaithim Xatej. Nkawd kuj los nyob rau lub Npe-ee hauv Vakhiaj thiab Kwv Tij Leej kuj tau kawm kom txawj ua hauj lwm hauv Chav Saib Xyuas Kev Tshaj Tawm. Ntev mus ntev tuaj nkawd kuj tau rov qab mus rau ceg Npe-ee hauv Ekadaus ces Kwv Tij Leej kuj tau ua ib tug ntawm Pab Uas Saib Xyuas Ib Ceg. Xyoo 2023, nkawd kuj tau mus rau hauv Vaviv. Thaum lub 1 Hlis xyoo 2024, Kwv Tij Leej kuj tau los ua ib tug pab cuam rau Rooj Saib Xyuas Kev Tshaj Tawm. Thaum nws rov qab xav txog tej hauj lwm nws tau ua, nws hais tias, “Qhov chaw yus ua hauj lwm tsis yog qhov tseem ceeb tiam sis yog cov tib neeg yus ua hauj lwm nrog.”

Peb ris txiaj ntsig kawg li rau cov kwv tij zoo yam li no thiab peb “hlub tshua cov kwv tij uas zoo li ntawd.”​—Filipis 2:29.