Lub 8 Hli Yog Ib Lub Hlis Tseem Ceeb Rau Peb Qhuas Yehauvas
Yuav Tseb Ib Daim Ntawv Tseb Tshiab Thoob Ntiajteb
1. Vim xyoo no yog xyoo uas Yexus tau sawv ua Vajntxwv kav Vajtswv lub Nceeg Vaj tau 100 xyoo lawm, yog li peb thiaj yuav ua dabtsi rau lub 8 Hli?
1 Xyoo no yog xyoo uas Yexus tau sawv ua Vajntxwv kav Vajtswv lub Nceeg Vaj tau 100 xyoo txwm nkaus. Yog li ntawd, tsim nyog peb siv lub 8 Hli los qhuas Yehauvas. Lub hli ntawd peb thiaj yuav tseb daim ntawv tseb tshiab hu ua Yuav Nrhiav Tau Kev Pab Rau Peb Lub Neej Qhovtwg Los? Daim ntawv tseb no txhawb kom tibneeg mus nrhiav cov lus teb rau tej lus nug tseem ceeb ntsig txog lub neej hauv phau Vajlugkub, thiab kuj qhia seb lawv yuav siv lub Vej xaij (Web site) jw.org los pab lawv nrhiav li cas.
2. Peb yuav pab ‘tsa suab hu nrov nrov qhuas Yehauvas’ li cas rau lub 8 Hli?
2 Tsa Suab Hu Nrov Nrov: Yuav kom pab tau cov tshaj tawm uas ua kevcai raus dej ua haujlwm ntau ntxiv rau Yehauvas rau lub 8 Hli, lub koom haum thiaj cia cov uas xav ua ib tug pab tho kev rau lub hli ntawd tshaj tawm 30 teev xwb los tau. Vim lub 8 Hli muaj ntau hnub so, zoo rau coob tus tshaj tawm uas ua haujlwm lossis kawm ntawv ua tau ib tug pab tho kev. Yog muaj ib tug kawm Vajlugkub nrog koj uas kawm tau zoo heev lossis yog koj ib tug menyuam xav ua ib tug tshaj tawm uas tsis tau raus dej, mus nrog tus dhia haujlwm ntawm pab txwj laus tham sai sai. Yog nws ua ib tug tshaj tawm rau lub 8 Hli, yuav txhawb nws zog heev. Coob tus tho kev kheev so rau lub 8 Hli, rau qhov lawv tau sijhawm txaus lawm. Tiamsis xyoo no txawm lawv tau sijhawm txaus lawm los, zoo rau lawv xav seb lawv puas yuav siv tau lub sijhawm uas lawv muaj mus tseb daim ntawv tseb ntau li ntau tau. Tamsim no yog lub sijhawm zoo heev rau tsev neeg los tham seb lawv yuav pab ‘tsa suab hu nrov nrov qhuas Yehauvas’ li cas rau lub 8 Hli.—Exl. 3:11; P.L. 15:22.
3. Peb cia siab li cas rau tes haujlwm mus tseb daim ntawv tseb rau lub 8 Hli?
3 Yav tas los peb kuj tau tseb ntawv zoo li zaum no thiab, tiamsis peb vam tias zaum no yuav yog zaum uas nrov ncha mus deb tshaj plaws. Yog li ntawd, lub 8 Hli puas yuav yog lub hli uas peb mus tshaj tawm kom tau sijhawm ntau tshaj thiab kom muaj cov tshaj tawm thiab cov uas pab tho kev coob tshaj yav tas los? Xyoo no twb yuav xaus, yog li ntawd, thov Yehauvas foom koob hmoov kom lub 8 Hli yog lub hli uas Yehauvas tes haujlwm nrov ncha mus deb tshaj plaws.—Mth. 24:14.