Tsis Txhob Nyob Ntsiag To Xwb
1. Peb yuav xyaum tus tubtxib Povlauj li cas thaum peb mus qhia Vajlugkub nrog lwm tus?
1 Tus tubtxib Povlauj pom tias lub sijhawm nws nrog cov ntseeg ua ke, yog lub uas “ib leeg yuav txhawb ib leeg lub zog.” (Loos 1:12) Thaum koj nrog lwm tus mus qhia Vajlugkub, koj puas siv lub sijhawm ntawd los pab thiab los txhawb nws? Lub sijhawm neb ua ke ntawd tsis txhob nyob ntsiag to xwb, tiamsis koj kuj qhia tej yam uas twb pab tau koj txawj qhia Vajlugkub lawd rau nws.
2. Peb yuav txhawb tus nrog peb ua ke li cas nws thiaj tsis ntshai? Vim li cas ho tseem ceeb rau peb ua li ntawd?
2 Txhawb Kom Txhob Ntshai: Cov tshaj tawm coob tus ntshai mus qhia Vajlugkub. Thaum lawv ntshai, tej zaum lawv yuav hais lus tshee na thiab ua ntsej muag puas tas. Yog peb pom lawv zoo li ntawd, peb yuav tau hais tej lus uas txhawb tau lawv. Peb yuav hais li cas thiaj txhawb tau lawv? Ib tug kwvtij uas ncig xyuas cov koom txoos tau qhia rau tus uas nrog nws tias, nws los kuj ntshai mus qhia Vajlugkub kawg li thiab. Nws kuj qhia tias qhov uas pab tau nws tsis ntshai lawd yog thov Vajtswv tsis tseg. Muaj dua ib tug kwvtij tau hais li no: “Yuav tsum ua lub ntsej muag luag ntxhi. Tej thaum kuv yuav tau thov Yehauvas pab kom kuv ua tau lub ntsej muag luag ntxhi.” Puas muaj tej yam uas twb pab tau koj tsis ntshai mus qhia Vajlugkub lawd? Muab tej yam ntawd los txhawb tus uas nrog koj ua ke mus qhia Vajlugkub.
3. Peb yuav qhia dabtsi rau tus uas nrog peb ua ke kom nws txawj mus qhia Vajlugkub ntxiv?
3 Qhia Tus Nrog Koj: Puas muaj tej lub ntsiab lossis tej zaj xwm twg uas koj siv tau los nug tus tswv tsev kom tau nrog nws tham? Puas muaj tej qauv qhia uas koj tau siv mus qhia lwm tus es raug lawv siab heev? Yog koj muaj tej qauv zoo li no, cia li muab qhia tus nrog koj ua ke mus qhia Vajlugkub. (P.L. 27:17) Lub sijhawm thaum neb tabtom rov mus xyuas ib tug twg, zoo rau koj qhia nws seb koj npaj mus qhia dabtsi thiab yuav qhia li cas. Tom qab neb qhia ib tug twg tas, qhia nws seb yog vim li cas koj thiaj siv lub ntsiab thiab nqe Vajlugkub uas koj siv los qhia tus kawm, thiab yog vim li cas koj thiaj qhia li ntawd kom tus kawm thiaj to taub.
4. Vim li cas peb yuav tsum txaus siab pab cov uas nrog peb mus tshaj tawm?
4 Cov tshaj tawm nyob rau thawj 100 xyoo pom tias tsis yog lawv yuav tau pab cov uas tsis ntseeg xwb, tiamsis lawv ib leeg yuav tau txhawb thiab pab ib leeg thiab. (Ttx. 11:23; 15:32) Tus tubtxib Povlauj tau cob tus tub hluas Timaute thiab txhawb kom nws muab tej uas nws tau kawm lawd coj los qhia lwm tus. (2Tmt. 2:2) Yog peb nco ntsoov txhawb peb cov kwvtij nkauj muam thaum peb mus qhia Vajlugkub ua ke, peb yuav pab tau lawv zoo siab thiab txawj qhia Vajlugkub ntxiv. Tsis tas li ntawd xwb, peb tseem ua rau Yehauvas zoo siab heev thiab.—Hnpl. 13:15, 16.