Vajtswv Txojlus Yog Txoj Tseeb
1. Phau Vajlugkub muaj xov tseem ceeb dabtsi?
1 Tus sau nkauj sau tias, ‘koj txojlus yog txoj tseeb.’ (Nt.Nk. 119:160) Vajtswv Txojlus teb tau tej lus nug tseem ceeb uas tibneeg xav paub txog. Vajtswv Txojlus nplig tau cov uas muaj kev nyuaj siab thiab pab tau lawv muaj kev cia siab. Thiab Vajtswv Txojlus kuj qhia seb peb yuav ua li cas thiaj nrog tau Vajtswv sib raug zoo. Muaj ib tug pojniam tau hais tias: “Kawm qhov tseeb hauv phau Vajlugkub mas zoo yam nkaus li tawm hauv ib cha uas tsaus ntuj nti mus rau chav uas kaj nrig, ci lam lug, thiab kaj siab heev.” Yog li ntawd, koj puas yuav muab siab rau qhia qhov tseeb uas yog Vajtswv Txojlus txhua zaus uas koj muaj sijhawm?
2. Phau Vajlugkub pab tau tibneeg lub neej li cas?
2 Vajtswv Txojlus Muaj Hwjchim Thiab Pab Tau Tibneeg Thoob Ntiajteb: Qhov tseeb hauv phau Vajlugkub muaj hwjchim hloov tau tibneeg lub siab thiab kho tau lawv lub neej. (Hnpl. 4:12) Muaj ib tug ntxhais hu ua Rosa tau mus ua poj muag cev, quav dej quav cawv, thiab quav yeeb quav tshuaj. Nws hais tias, “Muaj ib hnub thaum kuv nyuaj siab kawg nkaus li ua rau kuv tas kev cia siab li lawm. Lub sijhawm ntawd, txawm muaj ib nkawm niam txiv uas yog Yehauvas cov Timkhawv qhia kuv tias phau Vajlugkub kho tau tibneeg tej teeb meem. Kuv thiaj pib kawm Vajtswv Txojlus, ua rau kuv nyiam heev. Tau ib lub hlis xwb kuv txawm hloov kuv lub neej es mam pib dua lub neej tshiab. Nimno kuv lub neej muaj hauv paus hauv ntsis lawm. Vim kuv xav ua Yehauvas tus phoojywg heev, kuv thiaj txiav txim siab tuag nthi ua kuv lub neej raws li nws tej kevcai. Yog tsis muaj Vajtswv Txojlus, ntshe kuv twb txo kuv txojsia los lawm ntev.”—Nt.Nk. 119:92.
3. Vim li cas peb yuav tsum qhia phau Vajlugkub txoj xov rau lwm tus?
3 Phau Vajlugkub zoo tsis thooj li tej ntaub ntawv niaj hnub no. Phau Vajlugkub yog ib phau ntawv uas pab tau tibneeg nyob rau ‘txhua lub tebchaws, txhua haiv, txhua xeem, thiab txhua yam lus.’ (QTsh. 7:9) Raws li Vajtswv lub siab nyiam, “nws xav kom ib tsoom neeg sawvdaws tau txais kev dim thiab paub txojkev tseeb.” (1Tmt. 2:4) Yog li ntawd, peb tsis txhob lam xav rau ib tug tibneeg twg tias ntshe nws yuav tsis nyiam txoj xov zoo vim nws yog nws ib haiv neeg. Cia peb siv phau Vajlugkub mus qhia txoj xov zoo txog lub Nceeg Vaj rau txhua leej txhua tus li peb ua tau.
4. Thaum nrog ib tug twg tham, peb yuav siv phau Vajlugkub li cas?
4 Siv Phau Vajlugkub: Thaum peb mus ua Vajtswv tes num, peb yuav tau siv phau Vajlugkub los qhia tus tswv tsev. Thaum tseb phau The Watchtower thiab Awake! nyeem nqe Vajlugkub uas nyob hauv lub ntsiab “Ua Qauv Qhia.” Thaum tseb phau ntawv uas tau teem tseg rau ib lub hlis twg, muaj ib txhia pom tias yog xaiv ib nqes Vajlugkub uas raug tus tswv tsev siab los nyeem, ces pab tau nws zoo siab txais phau ntawv dua. Thaum rov mus xyuas ib tug twg, nyeem ib ob nqes Vajlugkub rau tus tswv tsev, xwv thiaj pab tau nws paub qhov tseeb zuj zus. Thaum kawm Vajlugkub nrog ib tug twg, ua tib zoo tham tej nqe Vajlugkub tseem ceeb uas nyob hauv zaj ntawd. Tsis tas li ntawd xwb, lub sijhawm uas tsis yog txhob txwm mus qhia Vajlugkub los, yuav tau nqa rawv ib phau Vajlugkub, xwv thaum zoo sijhawm thiaj tau siv los qhia lwm tus.—2Tmt. 2:15.
5. Vim li cas thaum peb mus ua Vajtswv tes num, peb yuav tau siv phau Vajlugkub?
5 Yog peb siv phau Vajlugkub los qhia txhua zaus uas peb mus ua Vajtswv tes num, yuav pab tau lwm leej lwm tus los paub Vajtswv Txojlus uas yog txoj tseeb.—1Thxk. 2:13.