Nrhiav Kev Kaj Siab

KOJ LUB NEEJ PUAS MUAJ KEV KAJ SIAB? Yog koj muaj kev zoo siab, xav seb txojkev zoo siab ntawd los qhovtwg los? Puas yog los ntawm koj tsev neeg? Koj tes haujlwm? Los yog koj txojkev ntseeg? Tej zaum koj zoo siab vim koj tos ntsoov ib yam tshwj xeeb heev. Tej zaum koj tabtom kawm ntawv yuav tiav, koj yuav pib ua ib teg haujlwm tseem ceeb, lossis koj yuav tau ib lub tsheb tshiab lawm.

Coob leej ntau tus zoo siab heev thaum lawv tau yam uas lawv ntshaw. Tiamsis tej khoom ntawd tsuas ua rau lawv zoo siab ib nyuag vuag xwb.

Kev zoo siab yog li cas tiag? Tsis yog yus zoo siab ib vuag xwb. Tiamsis yus txojkev kaj siab cog ruaj rau tej yam tseem ceeb uas yuav kav ntev. Thaum yus kaj siab tiag, yus yeej txaus siab npaj yus lub neej rau yav tom hauv ntej.

Ib txhia hais tias: “Thaum kuv tau yam no lossis yam tod, kuv mam zoo siab.” Tiamsis tsis yog peb ua neej xws luag, peb mam zoo siab. Peb yuav tsum txaus siab rau tej uas peb muaj xwb.

Kev zoo siab piv ib yam li tus uas xav noj qab nyob zoo. Ua cas nws thiaj noj qab haus huv? Twb yog nws caiv ncauj, siv sijhawm dhia ua si, thiab tsis ua tej yam uas yuav ua rau nws raug mob raug nkeeg. Ib yam li ntawd, yog peb xav muaj kev zoo siab, peb yuav tsum coj raws li tej ntsiab lus uas yuav pab tau peb lub neej.

Yam twg yuav pab tau peb muaj kev zoo siab? Muaj ntau lub ntsiab tiamsis peb yuav kawm 6 yam no xwb:

• TXAUS SIAB RAU LUB NEEJ THIAB UA SIAB DAV

• TU KEV NOJ QAB HAUS HUV THIAB UA TIAG UV

• MUAJ KEV HLUB

• MUAJ KEV SIB ZAM

• LUB NEEJ MUAJ HAUV PAUS HAUV NTSIS

• MUAJ KEV CIA SIAB

Ib phau ntawv uas coob tus qhuas tias tsav tau tswvyim rau peb, hais li no tias: “Cov neeg uas lawv lub neej tsis muaj chaw thuam kuj tau nyob kaj siab lug.” (Ntawv Nkauj 119:1) Cia peb kawm seb cov uas tsis muaj chaw thuam coj lub neej zoo li cas lawv thiaj muaj kev kaj siab.