Ua Siab Tawv Thiab Npuab Siab Li Npenayas

Npenayas yog ib tug tub rog uas muaj lub siab tawv, nws ua hauj lwm rau Vaj Ntxwv Daviv thiab Vaj Ntxwv Xalaumoos. Npenayas yog ib tug pov thawj tus tub. Qhov tiag cov Levis tsis siv tej cuab yeej ua rog, tiam sis nws mus tua rog rau Yehauvas. Nws yog ib tug uas muaj lub siab tuab siab tawv heev. Muaj ib zaug nws tua tau ib tug tsov ntxhuav hauv qhov av los thiab tua yeej ib tug tub rog uas loj thiab siab heev. Daviv tso siab heev rau Npenayas. Daviv thiaj tsa nws ua tus thawj tub rog uas saib xyuas cov tub rog uas zov Daviv.​—2 Xamuyees 23:20-23.

Thaum Axaloos thiab Adauniyas sawv tawm tsam Daviv los Npenayas yeej npuab siab rawv rau Daviv. (2 Xamuyees 8:18; 15:18; 1 Vajntxwv 1:8) Thiab tom qab no thaum Daviv laus laus lawm, lawv tsa Xalaumoos los ua vaj ntxwv kav los nws yeej txhawb Xalaumoos. (1 Vajntxwv 1:32-40) Muaj tseeb tias Npenayas npuab siab rawv rau Yehauvas thiab cov uas Yehauvas tsa los kav, tab txawm lwm leej lwm tus yuav ntxeev siab rau lawv.

Peb los yuav tau ua lub siab tuab tawm tsam Xatas thiab cov uas ua raws li nws lub siab nyiam. Peb yuav tsum rau siab ntso ua peb lub neej raws li Yehauvas tej kev cai kam tiag. (Efexaus 6:11; 1 Petus 5:8, 9) Txawm lwm tus yuav tso Yehauvas tseg los, peb npuab siab thiab nrog nraim nws. Peb tso siab tias nws yeej yuav muab nqi zog rau peb.​—2 Xamuyees 22:26.