Nug Lwm Tus

Maiv thiab nws tus txiv Vam Leeja nyob rau lub teb chaws uas cov neeg nyob hauv teb chaws Fis Liv Pis (Philippines) tuaj ua hauj lwm coob coob. Nkawd nyiam qhia txoj xov zoo rau cov tib neeg no heev. Thaum muaj tus kab mob Khaus Viv-19 (COVID-19), Maiv kawm Vajlugkub nrog coob coob tus tib neeg, tsis hais hauv lub teb chaws nws nyob los sis lwm lub teb chaws. Ua cas nws ho qhia tau?

Maiv nug cov kawm Vajlugkub nrog nws tias, “Koj puas paub leej twg xav kawm Vajlugkub?” Yog lawv teb tias lawv paub ces nws kom tus kawm Vajlugkub ntawd coj nws mus cuag tus xav kawm ntawd. Nug lwm tus li no yuav zoo heev vim cov uas kawm Vajlugkub nrog peb yeej xav kom lawv tsev neeg thiab lawv tej phooj ywg paub txog tej yam zoo zoo hauv Vajtswv Txoj Lus. Qhov uas Maiv nug tus kawm Vajlugkub li no ho pab tau li cas?

Paj tus uas kawm Vajlugkub nrog Maiv, qhia kom Maiv mus kawm nrog plaub tug tib neeg uas nws paub. Ib tug yog Xis. Xis nyiam kawm heev, nws thov kom Maiv qhia ib lub lim tiam ob zaug rau nws. Maiv txawm nug Xis tias puas muaj leej twg nws paub uas xav kawm Vajlugkub. Xis hais tias, “Kuv paub, kuv mam li qhia kuv cov phooj ywg rau koj.” Ob peb lub lim tiam tom qab xwb, Xis qhia nws plaub tug phooj ywg uas xav xav kawm Vajlugkub rau Maiv. Tsis ntev tom qab ntawd, Xis kuj qhia lwm tus phooj ywg uas xav kawm rau Maiv ntxiv thiab. Ces cov phooj ywg ntawd ho qhia rau Maiv txog ib co uas xav kawm thiab.

Xis kuj xav kom nws tsev neeg nyob hauv Fis Liv Pis kawm Vajlugkub thiab. Yog li ntawd, nws thiaj li qhia rau nws tus ntxhais Npauj. Npauj xav tias, ‘Cov Tim Khawv coj txawv txawv, lawv tsis ntseeg Yexus, thiab lawv tsuas ntseeg phau Vajlugkub uas yog Phau Qub xwb.’ Tiam sis thaum nws kawm Vajlugkub ib zaug nrog cov Tim Khawv, nws xam pom hais tias tej uas nws xav tsis muaj tseeb. Thaum nws kawm Vajlugkub, nws hais tias, “Yog phau Vajlugkub twb hais lawm ces yeej muaj tseeb li ntawd!”

Ntev mus ntev tuaj, Npauj txawm qhia nws ob tug phooj ywg thiab ib tug uas nrog nws ua hauj lwm ua ke uas xav kawm Vajlugkub rau Maiv. Maiv tsis paub tiam sis Npauj tus phauj hu ua Tswb kuj mloog mloog nkawd kawm Vajlugkub. Muaj ib hnub Tswb txawm hais rau Npauj tias kom hais rau Maiv paub tias nws xav kawm Vajlugkub thiab. Tswb nyiam tej uas nws kawm kawg li. Ib lub hlis ntawd xwb, nws cim tau tej nqe Vajlugkub thiab xav kawm Vajlugkub plaub zaug tuaj ib lub lim tiam! Npauj kuj pab Tswb kom nws mus tau tej kev sib txoos saum huab saum cua.

Thaum Maiv pom tias Xis tus txiv Ntsuab Rwg pheej mus mus los los tom qab thaum nkawd kawm Vajlugkub, Maiv thiaj li nug seb nws puas xav nrog nkawd kawm ua ke. Ntsuab Rwg hais tias, “Kuv tsuas mloog xwb. Yog neb leej twg lam nug kuv ib los ces kuv tsis nrog neb kawm lawm.” Tiam sis tsib feeb tom qab nws kawm Vajlugkub xwb, nws haj tseem nug ntau tshaj Xis nug lawm. Tsis tas li ntawd, nws kuj xav kawm Vajlugkub.

Qhov uas Maiv nug pab tau kom nws muaj ntau tus kawm Vajlugkub. Muaj ib txhia nws kuj muab faib rau lwm cov Tim Khawv mus pab qhia rau. Muab suav tag nrho mas Maiv muaj li 28 tus uas xav kawm Vajlugkub nyob rau plaub lub teb chaws.

Paj uas yog thawj tug kawm Vajlugkub nrog Maiv ua kev cai raus dej rau thaum lub 4 Hlis xyoo 2021. Hos Xis ua kev cai raus dej rau thaum lub 5 Hlis xyoo 2022, thiab nws rov qab mus nyob teb chaws Fis Liv Pis mus nrog nws tsev neeg nyob. Ob tug kawm Vajlugkub uas Xis qhia rau Maiv kuj ua kev cai raus dej lawm thiab. Tswb kuj ua kev cai raus dej ob peb lub hlis tom qab thiab nws kuj ua ib tug tho kev. Xis tus txiv Ntsuab Rwg thiab nkawd tus ntxhais Npauj thiab lwm cov uas kawm Vajlugkub tseem rau siab kawm tas zaj tas zog.

Nyob rau thawj 100 xyoo, txoj xov zoo nthuav dav zuj zus vim ib tse neeg qhia rau ib tse neeg thiab tej phoojywg kwv luag txog tej uas lawv kawm. (Yauhas 1:41, 42, thawj kab; Tes Hauj Lwm 10:24, 27, 48; 16:25-33) Zoo rau peb nug cov uas kawm Vajlugkub nrog peb los sis tej tug uas nyiam tias, “Koj puas paub tej tug uas xav kawm Vajlugkub?” Nug li no tej zaum yuav ua rau coob leej ntau tus kawm Vajlugkub nrog peb los tsis paub.